¹ ''Wululu le iyal al mutmeridin,'' de elaan ta Yahwah. ''Umon bi katitu lakin ma min ana; umon bi trabut ma umam tanin, lakin umon ma ligu tuwjih min Roho tai, yala umon bi zidu katiya fi katiya. ² Umon bi tala ruwa fi Masir, bidun ma asalu tuwjih tai. umon bi fetishu himaya min Faruon wa bi ruwa dusu tihit dulu ta Masir. ³ Ashan kida himaya ta Faroun bi kun fadiya takum, wa jere fi dulu ta Masir , bi kun hagara, ⁴ hata kan ruwasa tumon fi Soan, wa mursilin tumon ja fi Hanis. ⁵ Umon kulu bi fadihu be kalam ta nas al ma bi ageder saidu umon, al ma musada wele igasa, lakin fadiya. ⁶ Elaan an haiwanat ta junub: Be wasat ta ard ta mashkil wa kutura, ta lobuwa wa assed, debiba wa debiba la indu sim, umon bi arfa shukul ganiyan tumon fi dahar ta hamir, wa kunuz tumon fi ras ta jimal, le nas al ma bi ageder saidu umon. ⁷ Lanu musada ta Masir budun faida; ashan kida ana bi nadi hiya Rahab, al bi geni lisa. ⁸ Hasa ruwa wa katibu gidam tumon fi luhu, wa katif huwo fi sifir, ashan bi ayinu fi sinin al bi ja. ⁹ Lanu de yao nas al mutmeridin, bi kabasu iyal, iyal al ma bi asuma tuwjihad ta Yahwah. ¹⁰ Umon bi kelim al zol al be ayinu, ''Mata ayinu'', wa le ambiya, Matakum itnaba hagiga le anina; wunuso le anina kelimat ta kabasa, nubuwa ta kabasa. ¹¹ Wasa min sika, wuduru min sika; sibu Kudus ta Israel wegifu wunusa gidam usa tanina.'' ¹² Ashan kida Kudus Israel bi kelim, ''Ashan intakum aba kelima de wa kutu sikha fi zulum wa kabasa wa intakum teki fugu, ¹³ yala katiya de bi kun le intakum ze juzu al kasuru wa jahiz ashan bi waga, ze haja sugeru fuk fi hetta al waga tuo bi kun faja fi ayi zaman.'' ¹⁴ Huwo bi kasuru zw afash ta zol al bi sala hajat min tin; huwo ma bi sibu, ashan ma bi ligu fi nus tuo dagak tuo al bi ageder shilu nar min kanun, wele le gata moyo min hufura. ¹⁵ Lanu de yao kalam al Yahwah, Kudus ta Israel kelim, ''Be ruju takum wa geni be soukut bi kalisu intakum; fi hudu wa kutu sikha bi guwi intakum. Lakin intakum kan ma der. ¹⁶ Intakum kelim, 'La, lanu anina bi jere be hasin,' yal intakum bi jere, wa , ''Anina bi nutu fi ras hasin al bi jere guwam,' ashan kida nas bi turuju intakum bi kun serien. ¹⁷ Alif bi jere min tukwif ta wahid zol; intakum bi jere min kamsa nas lahadi bagi takum alaam wahid fi ras jebel.'' ¹⁸ Lisa Yahwah bi istena ashan bi arhamau intakum, ashan kida huwo jahiz ashan bi weri le intakum rahma. Lanu Yahwah huwo Allah ta adala; baraka le delin al kulu bi istena huwo. ¹⁹ Lanu shaab bi geni fi Sahiun, fi Urshelim, wa intakum ma bi kure tani mara. Lanu be hagiga huwo bi hin le intakum fi sout ta kure takum. Kan huwo asuma, huwo bi juwabu le intakum. ²⁰ Hatta kan Yahwah bi wedi le intakum eash ta zuruf wa moyo taab, hata kan kida, ustas takum ma bi dusu badun tani mara, lakin intakum bi ayinu mualim takum be uyon takum. ²¹ Adanat takum bi asuma kelima wara takum be kelim, ''Dau sika, duru fugu,'' matakum lifu yemin aw shumal. ²² Intakum bi nejisu timsalat takum al amulu be fidda wa dahab. Intakum bi jada umon bara wasaka ta heta. Intakum bi kelim le umon, ''Talatakum bara min hini.'' ²³ Huwo bi wedi muturu le buzur takum kan intakum zaru wata, wa akil ketir min wata, wa kudar bi kun ketir kalis. Fi yom dak mawashi takum bi akulu fi mahal al wasi. ²⁴ Teran takum, wa hamir takum, al bi kurju wata, bi akulu alaf tumon al amulu tamam. ²⁵ Fi ras ta kulu jebel al ali wa kulu murtefe, bi kun fi moyo bi nezil wa mujurat ta moyo, fi yom al azim ta katulu kan abraj waga. ²⁶ Nur ta gamara bi kun ze nur ta shemish, wa nur ta shemish bi kun abeyat saba marat, ze nur ta shemish ta saba ayam. Yahwah bi rubutu kesir ta shaab tuo wa bi aliju juruh ta dabara al huwo augu umon. ²⁷ Ayinu isim ta Yahwah bi ja min mahal bait, bi aragu be zalan tuo be dukhan kalis. Kasma tuo malian ma gadab, wa lisan tuo ze nar al bi akulu. ²⁸ Nefes tuo ze nahar al tuwil tihit bi wusulo lahadi ragabta, ashan bi garbilu umam be gurbal ta damar. Nefes tuo bi kun ze haja fi durus ta shaab al bi sibu umon wuduru. ²⁹ Intakum bi kun indu guna ze fi bilel kan bi kadisu aid, wa farah ta geliba, ze kan zol ruwa be nai le jebelta Yahwah, le sakra ta Israel. ³⁰ Yahwah bi wedi sout ta zalan tuo asumau wa bi weri iden tuo be habub ta zalan wa lehib ta nar, ma asifa, wa hawa ta muturu, wa hujar ta sekete. ³¹ Lanu Ashur bi kafu min sout ta Yahwah; huwo bi durubu umon be asaya. ³² Ayi darba ta asaya al Yahwah bi mururu fugu umon bi gedimu be musikah ta lugara wa adongu ze huwo bi shakila ma umon. ³³ Lanu mahal ta hargu jahisu bediri. Hagiga jahisu le melik, wa Allah amulu juwa wa wasi. Jahisu kuom ta kashab ketir wa nar. Nefes ta Yahwah, ze nahar ta kibirit, al walau.