¹ Wululu le Arieil, Ariei, medina al Daoud nezil fugu! Ziddu sena le sena; kede ihtifal ja tani. ² Lakin ana bi hawitu Arieil, wa hiya bi kure wa bi kun haznan; wa bi kun le ana ze Arieil. ³ Ana bi hawitu inta ze daira wa ana bi gufulu inta be hajat guwin, wa bi abinu hadaid hawili inta. ⁴ Bi nezilu inta tihit wa inta bi wunuso min wata; kalam taki bi kun tihit min turan. Sout taki bi kun ze roho al bi wunuso min wata, wa sout taki bi tala min turab. ⁵ Adad ta jumhur al adu taki bi kun ze turab, wa jumhur ta ta nas al guwin ze wasaka ta degik al gurbalu. Bi hasil faja, fi lahaza. ⁶ Yahwah Rabuna ta junud bi ja le intakum be sout ta muturu, wa zalzaal, wa ezaak ajib, be hawa guwi wa habub kalis, wa lehib ta nar al bi akulu. ⁷ Bi kun ze hilim, ruya ta bilel: Jumhur ta umam kulu bi shkil did Arieil wa mahalat tuo al guwi. Umon bi hajimu hiya wa delin al bi daigu hiya. ⁸ Bi kun ze kan rajil jian bi hilim inu huwo bi akulu, lakin kan huwo gum batna tuo fadi. Bi kun ze zol atshan bi hilim inu huwo bi shurubu, lakin kan huwo gum huwo atshan, mafi zol al bi batulu atash tuo. Nam, bi kun adad kebir min umam al bi shakila did Jebel Sahiun. ⁹ Istagrib be nefsa taki wa tala mustagrab; amulu nefsa taki amiyan wa tala amiyan! Tala sakaran be merisa; duru ze sakaran lakin ma be maskar. ¹⁰ Lanu Yahwah kubu fugu intakum roho ta num amiik. Huwo gufulu uyon takum, ya ambiya, wa kati ras takum ma, intakum al bi ayinu. ¹¹ Ruyat kulu bi le intakum ze kelimat ta kitab al gufulu, al insan bi wedi le de al alimu, bi kelim, ''Agara de,'' Huwo kaman bi kelim, ''Ana ma bi ageder, lanu mukful.'' ¹² Kan kitab de wedi le zol al ma bi ageder agara, wa kelim, ''Agara de,'' huwo bi kelim, ''Ana ma bi ageder.'' ¹³ Rabuna kelim, ''Shaab de bi ja gerib le ana be kasmat tumon wa bi akrimu ana be kasamat tumon, lakin geliba tumon bait min ana. Kafu tumon le ana bes biga wesiya al insan alimu. ¹⁴ Ashan kida, ayinu takum, ana bi ruwa gidam wa bi amulu haja ajeeb fi nus ta shaab de, mujiza wara mujiza. Hikima ta hukama tumon bi mutu, wa fahimu ta mutkebirin tumon ma bi zahir.'' ¹⁵ Wululu le delin al bi dusu kutat tumon min Yahwah, wa amail tumon fi duluma. Umon bi kelim, ''Munu bi ayinu anina, wa munu arufu anina?'' ¹⁶ Inta gilibu hajat ras tihit! Hala zol al bi sala hajat ta tin be idu sawa ma tin, ashan haja al salau bi kelim le de al salau huwo, ''Huwo yao ma amulu ana,'' wele haja al kalagu bi kelim le de al kalagu uwu, ''Huwo ma bi fahim''? ¹⁷ Bes fi lahza besit, Lobnan bi agilibu le mahal zara, wa mahal zara de bi tala gaba. ¹⁸ Fi yom dak de al atarahs bi asuma kelimat ta kitab, wa uyon ta amiyan bi ayinu juwa duluma. ¹⁹ Nas al taabu umon bi afrah fi Yahwah, wa nas al masakin bi afrah fi de al Kudus barau fi Israel. ²⁰ Lanu de al mutkebir mutu, wa de al bi alisu mutu. Kulu delin al hibu amulu sher bi shilu umon bara, ²¹ de la be kilima bi jarihu zo tani. Umon bi kutu shabaka le huwo al bi fetishu adala fi kasma bab wa bi nezilu de al bar be akzib al fadi. ²² Ashan kida de haja al Yahwah kelim be kusus bet ta Yagub- Yahwah, al angizu Abrahim, ''Tani fadiya ma bi gubudu Yagub, wele huwo bi kafu. ²³ Lakin kan huwo ayinu iyal tuo, shukul ta idenat tai, umon bi kadisu isim tai. Umon bi kadisu isimta de al kudus ta Yagub wa umon bi wegif fi haiba ta Allah ta Israel. ²⁴ Delin al wuduru fi fahimu roho bi ligu faham, wa delin al bi neng neng bi ligu marafa.''