¹ Wululu le iklil ta kebir nefsa ta al libusu be sakaranin ta Afraim, wa le zuhur ta ta jamala tuo al bi luon tuo bi gairu, de iklil al kutu fi ras ta delin al glibu umon ma merisa! ² Ayinu Rabuna bi rasulu de al guwi wa azim; ze habub ta wa hawa al ta damar. ze muturu al bi shilu hajat wa moyo ketir; wa huwo jada ayi iklil ta kibiria fi turab. ³ Iklil ta kibiria ta sakaranin ta Afraim bi dusu tihit kura. ⁴ Zuhur ta mejid tuo al luon ta jamalatuo biga bi gairu, al fi fi ras ta wadi al ganiyan, bi kun ze awel simar ta shejera tin fi shahar ta rebee, al kan zol ayinu, ligu lisa fi iden tuo, huwo bi abula. ⁵ Fi yom dak Yahwah Rabuna ta junud bi kun iklil giyafa wa taj ta jamala le bagi shaab tuo, ⁶ roho ta adala le de al bi geni fi kuris ta gata gedia, wa guwa le delin al bi turuju adu tumon min kasma abuab. ⁷ Lakin jama de kaman wuduru be merisa, wa lesegu be merisa al guwi. Kahin wa nebi wuduru be merisa al guwi, wa abulau umon be kumur. umon lesegu be mushurub al guwi, wuduru min ruya wa lesegu fi shilu garar. ⁸ Hagiga tarabizat kulu kati be turash, lahadi mafi mahal al nedif. ⁹ Huwo bi derisu marifa le munu, wa huwo bi wadihu risala le munu? Le delin al futumu min leben wele le delin al shilu umon bara min sudur? ¹⁰ Ashan de awamir fi ras awamir, awamir fi ras awamir; nizam fi ras nizam, nizam fi ras nizam; hina besit, wa hinak besit. ¹¹ Hagiga, be kasma ta shitima wa lisan al garib huwo bi wunuso le shaab de. ¹² Bediri huwo kelim le umon ''De yao raha, wedi raha le de al bi kafu; wa de yao tejdid,'' lakin umon ma bi asuma. ¹³ Yala kelima ta Yahwah bi ja le umon awamir fuk awamir, awamir fuk awamir; nizam fuk nizam, nizam fuk niza; hina besit wa hinak besit; ashan umon bi ruwa wa waga be dahar, wa bi kasuru, wa sidu umon wa bi gubudu umon. ¹⁴ Asuma le soiut ta Yahwah, intakum al bi shitimu, intakum al bi hukumu shaab de al fi Urshelim. ¹⁵ De bi hasil ashan intakum kelim, ''Anina amulu tifagia ma mutu, wa ma Hawiya anina wusulo le tifagia. Ashan kida kan mutu bi murur ma bi wusulo le anina. Ashan anina kutu kidi yao mahal dusu ta mina, wa anina kati be kabasa.'' ¹⁶ Ashan kida Rabuna Yahwah kelim, ''Ayinu, Ana bi kutu fi Sahiun hajer asas, hajer imtihan, hajer zawiya kerim. De al amin ma bi faddihu. ¹⁷ Ana bi kutu adala yao asaya ta mizan, wa bir tao kat ta moyo. Yala Sekete bi shilu mahal dusu ta kizib de bara, wa moyo ketir bi mahal ta dusu tumon. ¹⁸ Ahad taki ma mutu de bi karabu, wa tifagiya taki ma Hawiya ma nbi kun fi. Kan moyo ketir de mururu, bi kati inta be uwu. ¹⁹ Ayi zaman al moyo de mururu bi kati inta, wa fi kulu sabah uwu bi mururu wa kaman be bilel wa nahar bi ja. Kan kabara de fahimu, uwu bi sabibu kuf. ²⁰ Lanu serir de guser kalis ashan insan bi midu fugu, wa bataniya deik kalis ashan insan bi kati beu.'' ²¹ Yahwah bi gum fuk ze fi jebel Farasim; wa huwo bi nezil nefsa tuo ze fi wadi Jabun ashan bi amulu shukul tuo, shukul tuo al garib, wa amail tuo al barau. ²² Hasa matakum shitimu, wele udam takum bi shiddu. Ana asuma min Yahwah Rabuna ta junud, elaan ta damar ta ard. ²³ Kutu takum bala takum wa asuma takum le sout tai; wa kutu takum bala ashan bi asuma kelimat tai. ²⁴ Hala muzari al bi kuruju yom kulu ashan bi zara, best be kuruju wata? Hal huwo ma bi istemir nedifu wa kuruju mahal zara? ²⁵ Kan huwo jahizu wata, huwo ma bi ruahu biaira ta shuner, wa kamoon, wa bi kutu hintta fi mahalat tuo, wa gatani fi hudud tuo? ²⁶ Allah tuo bi wejihu huwo; huwo bi derisu huwo be hikma. ²⁷ Bizira ta Shunez ma bi atanu be nuraj, wele badal ta ajila bi lifu le Kumoon; lakin shunez bi dugu be asaya, wa kumoon be kasab. ²⁸ Gemeh bi dugu le rekif lakin ma bi dugu ta kulu kulu, hata kan huwo bi sugu badal wa kura ta arabiya ta husan tuo, husan tuo ma bi sedimu uwu. ²⁹ De kaman bi ja min Yahwah Rabuna ta junud, al ajeeb fi tuwjihat wa mumtaz fi hikima.