¹ Elaan min wadi ta ruya: Saba shunu al intakum kulu ruwa fuk fi ras juwa? ² Hal ashan intakum bi asuma medina malian be ezaaj, medina malian ma zahama? Meatin taki ma katulu umon be sef, wa umon ma mutu fi harib. ³ Kulu hukam taki jere sawa, lakin gubudu umon budun danga; umon kulu gubudu sawa, hata umon jere barau barau. ⁴ Ashan kida Ana kelim, ''Matakum ayinun le Ana, Ana bi kure be marara; Matkum hawil azzi ana be kalam ta damar ta biniya ta shaab tai.'' ⁵ Lanu fi yom ta Yahwah ta jesh ta fuoda, wa dusu nas wa kuf, fi wadi ta Ruya, kasuru hiyat, wa nas bi kure le jibal. ⁶ Elam arfa kis ta danga, ma markibat ta harib wa rujal be hassin, wa Gir zahiru turs. ⁷ Bi hasil inu wadi taki ta markibat bi kun malian ma markibat, wa rujal ta hassin bi shilu mahalat tumon fi bab. ⁸ Huwo shilu himaya ta Yahuza; wa intakum bi ayinu fi yom dak de silahat al fi Gasir ta gaba. ⁹ Intakum ayinu shuguk ta medina ta Daoud, umon biga ketir, wa intakum limu moyo ta biir al tihit. ¹⁰ Intakum iddu biut ta Urshelim, wa intakum kasuru tihit al bi guwa hetta. ¹¹ Intakum amulu kandak bainu itnin hetta min moyo ta biir al gedim. Lakin intakum ma kutu bala le alama ta medina, al amulu zaman tuwil wara. ¹² Yahwah Rabuna ta jesh fi yom dak de bi nadi kure, huzon, haligu ras, wa libisu gumash ta huzun. ¹³ Lakin ayinu, ihtifal wa farah, katulu abugar wa daba kurfan, akulu laham wa ashurubu merisa; kede anina akulu wa ashurubu, lanu bukura anina bi mutu. ¹⁴ De kan wunuso fi adana tai be Yahwah Rabuna ta jesh: ''Be takid sher de ma bi afi intakum, hata kan intakum mutu,'' Yahwah Rabuna ta jesh kelim. ¹⁵ Yahwah Rabuna ta jesh, kelim kida, ''Ruwa takum le Shabna, al musoul min bet ta melik, wa kelim, ¹⁶ Inta bi amulu shunu hini wa munu wedi le inta izin ashan bi afura magbir le badun taki, inta al bi afura gubur fuk wa kasuru kasuru le nefsa mahal geni fi mahal al hajer?'' ¹⁷ Ayinu Yahwah der jada inta, rajil al azim, der jadu inta tihit; huwo be amsuku inta guwi. ¹⁸ Be takid huwo bi lifu inta gulung gulung, wa bi jada inta ze kura le al atraf tuo wassi. Inta bi mutu hinak, wa markibat taki al azim bi fadulu hinak; inta bi kun faddiya ta bet ta said taki! ¹⁹ ''Ana bi nezil inta min wezifa taki wa bi truju inta min mahal taki. Bi juru inta tihit. ²⁰ Bi hasil fi yom dak de Ana bi nadi kadam tai Aliakim weled ta Hilkiah. ²¹ Ana bi libisu huwo be gumash taki wa bi libisu le huwo gash taki, wa bi hawilu sultan le iden tuo. Huwo bi kun abu le sukan ta Urshelim wa le bet Yahuza. ²² Ana bi kutu muftah ta bet ta daoud fi kitifa tuo ; huwo bi fatta, wamafi zol bi gufulu; huwo bi gufulu wa mafi zol bi fataat. ²³ Ana bi sabitu huwo, ze witid fi mahal al amin, wa huwo bi kun kurisi ta mejid le bet ta abu tuo. ²⁴ Umon bi aligu fugu huwo kulu mejid ta bet ta abu tuo, jiel wa iyal, ayi iliba suker min kubaya le jak. ²⁵ Fi yom dak, de yao elaan ta Yahwah Rabuna ta jesh- witid al sabitu fi mahal al amin de bi agila, wa bi kasuru, wa bi waga, wa tegil tuo bi shilu bara- lanu Yahwah wunuso.