¹ Elaan an sahara be taraf bahar. Ze habub al bi masa min junub wa bi ja mururu be sahara, min beled al saab. ² Ruya al saab weri le ana: zol ta malia bi seregu, wa de al bi demiro bi demiro. Ruwa wa hajimu, ya Elam; hawitu ya Maadi; Ana bi wegifu kulu kure tuo. ³ Ashan kida suluba tai malu be waja; waja ze waja ta mara al der weledu bi waja jisim tai kulu; Dengiru ras tai tihit be kalam al ana asuma; karabu geliba tai be haja al ana ayinu. ⁴ Geliba tai wuduru; hizu ana ma kuf. Niya tai kan fi nur ta bilel, lakin bi jibu le ana kuf. ⁵ Umon jahisu terebeza, umon kutu huras wa umon bi akulu wa ashurubu; gum takum, ya ruwasa, masa takum turs takum be zeat. ⁶ De yao haja al Rabuna kelim le ana, ''Ruwa takum, kutu takum gafir; kede kabaro haja al huwo bi ayinu. ⁷ Kan huwo ayinu arabat ta harib, itnin min rujal ta hasin, nas fi ras hamir, wa nas fi ras jimal, yala kede huwo kutu bala wa ena tuo kede kun faddi.'' ⁸ Kafir de bi kure, ''Rabuna, fi ras mahal al huwo bi harisu fugu Ana bi wegif yom kulu, kulu yom, wa fi shukul tai ana bi wegif bilel kulu.'' ⁹ Hini arabia ta harib ja ma itnin rujal fi hassin. Huwo bi kure, ''Babil waga, waga, wa kulu asnam ta rabunat tuo bi kasuru fi wata.'' ¹⁰ Gurbal ma gemeh tai, iyal ta degig gemeh tai! Haja al ana asuma min Yahwah Rabuna ta jesh, Allah ta Israel, Ana alinu le intakum. ¹¹ Elaan an Adum. Wahid kure le ana min Seir, ''Ya Gafir, shunu yao fadulu min bilel? Ya Gafir, shunu yao fadulu min bilel?'' ¹² Gafir de kelim, ''Sabah bi ja wa kaman bilel. Kan inta der asalu, yala asalu; wa rija tani mara.'' ¹³ Elaan an Arabia. Fi sahara ta bilad ta Arab inta bi num hinak bilel, inta ya mujmuwa ta Dadaniin. ¹⁴ Jibu moyo le atshanin; sukan ta ard timah, limu takum ma de al bi tefes be rekif. ¹⁵ Ashan umon tefes min sef, min gidam ta sef al juru bara, wa min gidam ta danga al shiddu kues, wa min saab ta harib. ¹⁶ Lanu de haja al Rabuna kelim le ana, ''Fi sena wahid, ze amil al bi ajuru le sena wahid bi ayinu, kulu mejid ta Saidar bi kalasu. ¹⁷ Bes besit min min dangat, muharibin ta Saidar bi fadulu,'' ashan Yahwah, Allah ta Israel, wunuso.