¹ Elaan an Sour: Lifu lifu sambala, ya sufun ta Tarshish; lanu mafi bet wele madkal; min ard ta Ketim zahiru le umon. ² Askut takum, intakum sukan ta taraf bahar; tujar ta Saidon, al bi sfir be sika ta bahar, mala inta. ³ Fi ras moyo al ketir kan fi gemeh ta Shihor, hasad ta nil yao kan intaj tuo; wa biga tijar ta umam. ⁴ Kede faddiya gubudu inta ya Saidon; bahar wunuso, al azim ta bahar de. Huwo kelim, ''Ana ma ligu waja wele weledu, wele Ana raba shabab wele raba banat.'' ⁵ Wekit kanbara wusulo fi Masir, umon bi tala azalanin be kalam ta Sour. ⁶ Mururu takum le Tarshish; kure takum ya sukan ta gata bahar. ⁷ Hal de hasil le intakum, medina al murtah, al asili tuo min ayam ta zaman, al kura tuo shilu huwo bait ashan bi geni fi beled ta ajanib? ⁸ Munu yao katitu did Sour, de al bi wedi Akalil, al tujar tuo ruwasa, al tujarin tuo akram nsa fi dunia? ⁹ Yahwah Rabuna ta jesh katitu ashan ma bi akrimu kibiria tuo wa mejid tuo kulu, ashan bi fadihu kulu delin al indu karama fi ard. ¹⁰ Mururu fi beled taki ze Nil, ya biniya ta Tarshish. Biga mafi suk fi Sour. ¹¹ Yahwah midu iden tuo fi ras bahar, wa huwo hizu mamalik; huwo wedi awamir be kusus ta Kanaan, ashan bi demiro mudon tuo al kubar. ¹² Huwo kelim, ''Inta ma afrah tani, inta al bi intehik huguk ta azra biniya ta Saidon; guma, mururu le Ketim; lakin wele inta biligu raha hinak.'' ¹³ Yao ard ta Kaldaniin. Shaab de biga mafi; Ashuriin amulu huwo sahara le haiwanat ta gaba. Umon abinu abraj tumon; umon demiro mudon tuo; umon sibu biga kuom ta turab. ¹⁴ Kure tkum, intakum sufun ta Tarshish; lanu mahal dusu takum demiro. ¹⁵ Fi yom dak bi nisitu Sour le sebein sena, ze fi ayamat ta melik. Baad nihaya ta sebein sena bi hasil fi Sour haja ze al hasil fi guna ta zaniya. ¹⁶ Shilu gesh, ruwa ya medina, inta ya zaniya al nisitu; dugu kues guna gunat ketir, ashan bi zekiru. ¹⁷ Bi hasil baad sebein sena de, Yahwah bi saidu Sour, wa hiya bi bada ligu gurush tani be shukul zinna tuo, wa hiya be wedi kidima tuo le mamalik ta ard kulu. ¹⁸ Dakli wa faidu tuo mukasas le Yahwah. Ma bi limu fi makzan wele fi maliya, lanu faida tuo de bi wedi le delin al bi ish fi gidam ta Yahwah wa bi istakdimu ashan bi jibu akil ketir le umon ashan umon bi kun indu ahsen nu ta gumash.