¹ Yahwoh bi kun indu rahma fi Yacob; huwo bi iktar Israel tani wa bi rija humon fi dakil arid bitomon al kas. Nas al garibiin bi limu ma humon wa bi domu nufus bitomon le bet yacob. ² Al uma bi jibu humon le mahal bitomon al kas. Biga bet ta Israel bi shilu humon fi arid ta Yahwoh ze abiid rujal wa nusuwan. Humon bi sijinu del al kan gobudu humon, wa humon bikun indu sulta le del al zolomu humon. ³ Fi yom dak yahwoh bi wodi le intum raha min tab takumwa muana, wa min shokol al saab al kan talabu min intum ashan bi nefizu. ⁴ Intum bi wonusu kelimat ta istifzaz de diid melik ta Babil, kef al zalim wosulu le nihaya, sokol zalan al shedid ta al mutukebir intaha! ⁵ Yahwoh kan kasuru asaya ta al ashrar, gadib ta del al fi sulta. ⁶ Al bi durubu shuob be gadab shedid be dun ingita, al hakimu uma be gadab. Ma taab le de al kan ma gobudu. ⁷ Kulu al arid fi raha wa sukut; humon bada ihtefil ma guna. ⁸ Hata shejera ta suru farhan le inta ma urz ta Libnan; humon kelim, wokit inta waja, mafi zol al bi gata kashab ja tala ashan bi gata nina tehet. ⁹ Hawiya min tehet musteaid ashan bi gabilu inta kan ruwa hinak. Huwo touru al mot le inta, kulu muluk ta arid, humon gom fok min karasi bitomon. Kulu mulukta uma. ¹⁰ Humon kulu wonusu wa kelim le inta, inta biga tala deif ze nina. Inta biga tala ze nina. ¹¹ Azama taki nezilu tehet fi hawiya ma sot ta adawat awtar taki. Morogot taki bi intesir tehet taki, wa dud bi kati inta. ¹² Kef inta waga min samaa, nigima ta nahar, jena ta saba! kef gatau inta for tehet fi wata, inta al ghaza al alddual ¹³ Inta lean kelim fi geliba taki, ana tala fok le sama, ana bi arfa kursi bitai fok nujum ta Allah. Wa ana bi geni fi jebel ta ijtima. Fi awakir ta shamal. ¹⁴ ana bi saeid murtafaeat fo fi sahab; ana bi kutu gisim zee mezm Rabuna al fok futu kulu. ¹⁵ Biga inta hasa jadau tehet le hawiya, le tehet ta hufura. ¹⁶ del al bi ainu wa humon bi kutu bala le inta. Humon bi kelim, de yau rajil al kutu arid hizuhizu, al hizu mamalik, ¹⁷ Al kutu dunia biga ze sahara, al karabu mudun bitou wa ma sibu masajin bitou ashan bi ruwa le bet? ¹⁸ Kulu mamalikta uma, humon kulu num tehet be kharama. Kulu wahid fi gubur bitou. ¹⁹ Lakin jadau inta min gubur taki ze fere al jadau bara. Mutu kati inta ze malabis, del al mujuruhin be sef, al waga tehet hujar ta hufura. ²⁰ Inta ma limu humon fi defin, leanu inta kan demir arid taki wa katulu nas taki. Iyal ta ashrar ma bi zekiru. ²¹ Jahizu mazbah taki le iyal bitou, le katiya ta abuhat bitomon, yala humon ma bi tala fok wa bimeliku al arid wa mala kulu dunia ma mudun. ²² Ana bi tala fok diid humon”- de yau aiylan ta yahwah ta junud. “Ana bi gata isim min babil. Iyal ta iyal wa ajiyal al jai” de yau ayilan ta Yahwah. ²³ “Ana Kaman bi kutu hia milkiya ta buma”buam”, wa le moyo ta hamamat, wa ana bi nedifu hia ma maknasa ta dammar” de yau ayilan ta Yahwah ta junud. ²⁴ Yahwah ta junud kan halifu, “be taakid, ze ana gasid, biga huwo bi tala hagiga; wa ze ana kan der, biga huwo bi kun; ²⁵ Ana bi kasuru ashur fi arid tai, wa ana bi dusu huwo tehet kura tai fi jibal. Yala tigila bitou bi arfau min humon wa humula bitou min ketfa bitomon.” ²⁶ De yau khuta al jahizu le kulu arid, wa de yau al arfau le kulu aluma. ²⁷ Leanu Yahwah ta junud kan khatitu de; munu bi wogifu huwo? Ida bitou morfu, wa munu bi rija huwo wara? ²⁸ Fi sena al melik Ahaz mutu aiylan de ja: ²⁹ Mata kun farhan, ya kulu Filistiniin, inu gadib al durubu inta kasuru. Leanu min zuzur ta debiba bi tala dabayib, wa iyal ta iyal bitou bi kun dabayib musamam bi tiri. ³⁰ Bikiria ta meskin bi sugu koruf bitomon fi mahal bitai, wa al muhtaj bi num fi aman(salam). ana bi katulu asli taki ma majaa al bi kutu bagi taki kulu bi mutu. ³¹ Ana bi kun kef, ya bab; kore, ya medina intum kulu bi intah, ya Filistin. Leanu mi nahiya ta shamal dukhan ta sihab jai, wa hinak mafi al bi jere fi sufuf bitou. ³² Kef humon bi juwabu le rosul tau ma dak? “Yahwah asisu Sahion, wa shaab bitou bi ligo himaya fi hia.”