¹ Ana bi kelim inu, lu al waris lisa jena suker, ma indu ferig ma abid, hata lu uwu yau sido hajat kulu. ² Lakin uwu tihit musulia ta abuhat wa wukala lahadi yom al bigariru be Abu. ³ Inna bardu: kan ze de zaman inna kan sukerin, inna kan abeed tihit arkan ta alam. ⁴ Lakin laman zaman timu, Allah rasulu Jena tuo, al weledu be mara, weledu tihit Namus. ⁵ Uwu amulu kida ashan bi afdi delin al tihit namus, ashan inna biligu tebeni ze Eyal. ⁶ Wa ashan itakum Eyal, Allah rasulu Roho ta Jena tuo fi gulub ta nina, al kure, ''Ya Aba al Ab'' ⁷ Izen ita tani ma abeed, lakin Jena, kan Jena, Izen itta bardu be werisu bewasat Allah. ⁸ Lakin fi zaman dak, al itakum kan ma arufu Allah, amulu itakum abeed le delin al, be gowat tumun al tebii, ma aliha ta kulu kulu. ⁹ Lakin hasa itakum biga arufu Allah, aw arufu itakum ma Allah, kef itakum bi rija wara le hajat al daif wa al taban itakum der kun abeed tumun min jedid? Hal itakum der kun abeed tani mara? ¹⁰ Itakum gi hafizu ayamwa shuhur al jedid wa mauasim wa sinin! ¹¹ Ana gi kafu le itakum inu taab tai fugu itakum birua sakit. ¹² Ana gi asadu itakum, ikua, ashan bikun ze Ana, ashan zatu biga ze itakum. ¹³ Lakin itakum arufu de kan be ayan ta gisim Ana beshiru le itakum fi bidaya. ¹⁴ Ragmi inu ayan tai kutu itakum fi imtihan, itakum ma karihu wele aba Ana. Lakin itakum rahibu Ana ze malaika ta Allah, ze kaanu Ana yau kan Yesua al Messih benefsu. ¹⁵ Taib, wenu, baraka tkum hasa? Lanu ana shahidu le itakum inu, lu kan bi agider, kan itakum agila uyun takum wa wedi le Ana. ¹⁶ Ashan kida Ana biga adu takum ashan Ana gi weri le itakum hagiga? ¹⁷ Umun indu gira ashan bi juru itakum, lakin ma le kues. Umun der gufulu itakum bara, ashan itakum bikun indu gira le umun. ¹⁸ Uwu daimen kues ashan inta bikun indu gira le hadaf al kues, ma bes kan Ana fi ma itakum. ¹⁹ Eyal tai al sukerin, Ana tani biga fi waja ta jena min ajili takum lakadi al Messih bija fugu itakum. ²⁰ Ana gi itemana kede Ana kun fi ma itakum hasa ashan bi gairu sut tai, lanu Ana mustagrib fugu itakum. ²¹ Weri takum le Ana itakum al der kun tahet ganoon, hal itakum ma gi asuma le ganoon? ²² Ashan muktub Abrahim indu itnin awlad, wahid min biniya al abeed wa wahid min Mara al hur. ²³ Lakin de al weledu ma biniya al abeed be hasab gisim, lakin tani de kan weledu be mara al hur bewasat waad. ²⁴ Hajat de mumkin fasiru ze Remzi, ashan nusuwan del gi weri itnin itifagia. Wahid min umun min jebel Sina wa weledu Eyal al abeed. De yau Hajir. ²⁵ Hasa Hajir gi mesil Jebel Sina fi bilad ta Arab; wa Hiya gi mesil Urshelim al fi alela, ashan hiya fi abudia ma Eyal tou. ²⁶ Lakin Urshelim al fi fuk de hur, wa hiya yau uma ta nina. ²⁷ Ashan muktub, ''Afrah, ita al ma gi weledu. Kure bara wa asruk be farah, ita al ma gi ligu taab ta weledu. Ashan eyal ta mara al sibu barau aktar min eyal ta mara al indu rajil.'' ²⁸ Lakin itakum, ikua, ze Ishak, itakum eyal ta waad. ²⁹ Fi zaman dak de al weledu behasab gisim idtehidu de al weledu be hasab Roho. Uwu nefsa haja hasa. ³⁰ Lakin kitab gi wunuso shunu? ''Turuju bara biniya al abeed ma Jena tuo. Ashan Jena ta biniya al abeed ma shariku fi werisa ma Jena ta mara al hur.'' ³¹ Ashan kida, ikua, inna ma eyal ta biniya al abeed, lakin ta mara al hur.