¹ Yala Rajil de jibu ana wara le bara baab mazbah al muteji sherik; kan mokful tamam- tamam. ² Yahweh kelim le ana, “ Baab de gofulu kulu- kulu; wa huwo mabi fatau. Mafi insan bi ruah bewasad huwo, le Yahweh, Allah ta Israel, lianu huwo ja be wasad baab de,ashan kida gofulu kulu-kulu. ³ Hakim ta Israel bi geni fogo ashan akulu akil gidam ta Yahweh. Huwo bi dakalu min sika ta dikor wa tala bara be nefsu sika. ⁴ Yala huwo jibu ana min sika ta baab Shamal min gidam ta Haikal, wa ana ainu, istena, mejid ta Yahweh malau bed ta Yahweh, wa ana waga be wusa tai. ⁵ Yala Yahweh kelim le ana,” jena ta insan, fetishu gelbak wa ainu be eina taki wa asuma ma adana taki le kulu al ana bi kararu le inta, le kulu alfi bed ta Yahweh wa kulu gawaniin towo. Fekiri an dukul ta baab wa kuruj towo. ⁶ Yala kelim le mutmeridin alfi bed Israel, Rabuna Yahweh kelim kida: Kede amael takum al afiin kun kifaya le intum bed Israel- ⁷ Al intum jibu ajanib ma gulub alma mutehir wa jisim alma mutehir ashan kun fi membar tai, bi foguru isim tai, wokit intum bi gedim le ana akil, shaham wa dom- intum kasuru ahad tai ma amael takum al afiin. ⁸ Intum ma shilu shokol takum le hasab ganun ta hajat tai alkudus, lakin intum iktaru taniin ashan istakal wa kalifum ashan iktam ma mahal tai alkudus. ⁹ Rabuna Yahweh kelim kida: Mafi ajnebi , alma mutehir fi gelib wa jisim, min kulu albi aishin fi wasad nas ta Israel, kede dakalu fi mahal tai alkudus. ¹⁰ Lisa lawiin ruah beid min ana- humon tala bara min ana, bi ruah wara asnaam tomon- lakin humon bi dafau le katiyaat tomon. ¹¹ Humon kudam fi membar tai, bi harisu baab ta bed wa kadimu fi bed wa humon bi dabau zebiha albi haragu wa zabaya ta nas, wa humon bi wogif gidam ta nas wa kadimum. ¹² Lakin ashan humon bi amulu zabaya gidam asnaam ,humon biga waga wa hajis katiya le bed ta Israel, Ashan kida ana bi arfa yeden tai wa halifu diddum- de karar ta Rabuna Yahweh- Humon bi ithamal ikaab tomon. ¹³ Humon mabi ja gerib le ana ashan amulu ze gusus tai au wosulu fi aiya mahalaat tai alkudus, hajat alkudus kaalis. Bel ax humon bi ithhamal adam aklak ta zambi tomon le amael al afiin alhumon amulu. ¹⁴ lakin ana bi kutu humon ze gufara ta shokol fi bed, le kulu shokolaat wa aiya haja albi amulu fogo. ¹⁵ Yala Gusus al lawiin, del al aulat ta Zadok albi kemilu wajibaat ta membar tai wokit kan nas ta Israel tala bara min ana- Humon bija gerib ma ana ashan abidu ana. Humon bi wogif gidam ana ashan gedimu le ana shaham wa dom- de karar ta Rabuna Yahweh. ¹⁶ Humon bija fi membar tai; Humon bija fi tarbaza tai ashan abidu ana wa kemilu wajibat tomon le ana. ¹⁷ Yala huwo bikun wokit kan humon ja le baab ta bed ta mahkama. Humon bi libisu gumash gitani, humon lazim mabi ja ma gumash shuf fi dakil bed ta mahkama. ¹⁸ Bikun hima gitani fi raas tomon wa jalabiya gitani fi sulba tomon. Humon mabi libisu gumash albi jibu haragan. ¹⁹ Ashan kan humon bi ruah min gurfa le gurfa ashan bi ruah le nas, Humon lazim bi agilau bara gumash al humon libisu wokit humon bi kadimu; humon bi agilau bara wa kutum tehed fi gurfa alkudus. Ashan mabi amulu nas taniin kudusin kasaten be wasad lemesu humon ma gumash alkas. ²⁰ Kaman humon lazim wele haligu raas tomon au rudu ashan shar tomon tala tuwaal kaalis, lakin humon bi nagisu shar ta raas tomon. ²¹ Mafi Gesis albi ashurub merisa wokit huwo jai le dakil Haikal, ²² Wala bi shilu armala au mara altalagu ze mara le huwo, lakin bes binia fata min silsila ta bed Israel au armala alkan bediri zowiju le Gesis. ²³ Lianu humon bi derisu nas tai alferik bein ALKUDUS wa Al HARAM; humon bikutum arafu almanedif wa alnedif. ²⁴ Fi mashakil humon bi wogif ma karar tai; Humon bikun adiliin. Humon bi hafizu ganun tai wa kararaat tai fi aiya eid. Wa humon bi iktefil yom tai alkudus alsaabe. ²⁵ Humon mabi ruah le zol almutu ashan bikun waskan, ile izakan de abu au umu, weledu au bitu, aku, au uktu alma num ma rajil;ima humon bikun waskan. ²⁶ Baad kan Gesis biga waskan, Humon bi hasibu fatara zaman ta saba ayam le huwo. ²⁷ Fi yom alhuwo be nefsu bi dakalu fi mahal kudus, fi dakil Haikal ashan kadimu fi mahal kudus, huwo lazim bi jibu zebiha ta katiya le nefsu- de karar ta Rabuna Yahweh. ²⁸ De yau bikun warisa tomon: Ana warisa tomon, wa intum lazim mabi wodi le humon mumtakat fi Israel; Ana bikun mumtalakat tomon! ²⁹ Humon bi akulu tekdima ta akil, tekdima ta katiya,tekdima ta zam, wa aiya haja alwodi le Yahweh fi Israel ,bikun tomon. ³⁰ Al aksen fawakea alawel ta kulu hajaat wa kulu tabaruwaat ,aiya haja min kulu tabaruwaat bi kun ta Gusus, wa intum bi wodi al aksen min maakulaat takum tekdima le Gusus ashan barakaat bi geni fi bed takum. ³¹ Gusus mabi akulu aiya haiwan alkatulu ma wahash au fetis, wala Ter au wahash.