¹ Hasa inta, jena insan, nabau did Gog wa kelim, Rabuna Yahweh kelim kida: Istena! Ana did inta, Gog, sultan ta Meshech wa Tubal. ² Ana bi gelibu inta wa bi kudu inta gidam; Ana bi jibu inta min beid fi shamal wa jibu inta le jubal ta Israel. ³ Yala ana bi nofutu danga taki bara min yeden shamal taki wa kutu nishab taki waga min yeden yemen taki. ⁴ Inta bi waga fi jubal ta Israel-inta ma kulu jesh wa asaker alma inta. Ana bi wodi inta le tuyur ta gaba wa haiwanaat ta gaba ze akil. ⁵ Inta bi waga fi midan fadi, ana be nefsa tai kararu –De Rabubuna Yahweh karar towo. ⁶ Yala ana bi rasulu bara nar le Magog le del albi ish fi aman fi taraf bihar. Wa humon bi arufu inu Ana Yahweh. ⁷ Ana bi amulu isim tai alkudus maruf fi nus ta nas tai Israel, wa ana mabi tani mara sibu isim tai alkudus foguru; umam bi arufu ana Yahweh,alkudu ta Israel. ⁸ Istena! Yom bi jaw a bi amulu nefsu- De yau karar ta Rabuna Yahweh. ⁹ Wahid albi ish fi mudun ta Israel bi ruah bara wa bi istakdimu sila le hariga tanar – wa daragaat al sukar, daragaat al kubar, danga wa nishabaat wa harbaat ; humon bi amulu nar ma humon le muda saba siniin. ¹⁰ Humon mabi limu kashab min gaba au gata tehed shejera ta gabat min humon bi walau sila; humon bi shilu min del al deiru kede shilu minum; Humon bi nahabu del al deiru nahabu humon- De karar ta Rabuna Yahweh.” ¹¹ Yala bi hasil fi yom dak inu ana bi amulu mahal le Gog- Turba fi Israel, waadi le del l bi ruah le sherik ta bahar. Bi gofulu del al deiru abir. Hinak humon bi dofunu Gog ma kemiyaa towo de. Humon bi semi waadi de Hamon Gog. ¹² Le muda saba shuhur bed ta Israel bi dofunu humon ashan bi nedifu ardi. ¹³ Lianu kulu nas ta ardi bi dofunu humon; bikun lom yom ta zikra wokit bi mejidu ana- de yau karar ta Rabuna Yahweh. ¹⁴ Biga humon bi kalifu rujal al daiman bi ruah le ardi, ashan bi ligo del albi ruah abri, lakin del al mutu wa jusas tomon fadulu fi wata fi ardi, ashan humon bi dofunum, ashan bi nedifu ardi.Baad nihaya ta saba shahar humon bi bada teftish. ¹⁵ Ze rujal del bi abir fi wasad ardi, wokit kan humon ainu fadalaat ta adum ta insan, humon bi kutu alama fogo, lahaidi del ta hafura turba jaw a dofunu fi waadi ta Hamon Gog. ¹⁶ Hinak bikun medina ma isim Hamonah. Fi teriga de humon bi nedifu ardi. ¹⁷ Hasa le intum, jena insan, Rabuna Yahweh kelimu kida: Kelim le kulu Tuyur alma jina wa kulu haiwanaat ta gabaat, ‘limu sawa wa wa taal. Limu min hawili kulu le zebiha al ana be nefsa tai bi amulu le intum, zebiha kebir fi jebel ta Israel, ashan intum bi akulu laham wa ashurubu dom. ¹⁸ Intum bi akulu laham ta takiyanin wa ashurubu dom ta umara ta dunia; humon bikun korfan, korfan, aknaam wa teraan, humon kulu sumaan fi Bashan. ¹⁹ Yala intum bi akulu shaham lahaidi shabaan; intu bi ashrab dom lahaidi sakaran; de yau zebiha al ana al ana bi dabau le intum. ²⁰ Intum bikun shabaaniin fi tarabeza ta ma husan, karlo, muharib, wa aiya rajil ta harib-de yau karar ta Rabuna Yahweh. ²¹ 21Ana bi kutu mejid tai fi wasad umam, wa kulu umam bi ainu hukum tai al Ana bi amulu wa yeden tai al ana bi kutu did humon. ²² Bed ta Israel bi arufu inu Ana Yahweh Allah tomon min yom dak le gidam. ²³ Umam bi arufu inu be ta Israel ruah le abudiya ashan katiyaat tomon al humon biu ana, yala ana dusu wusa tai min humon le ardi ta adaa tomon ashan kulu humon bi waga ma sef. ²⁴ Ana amulu le humon le hasab najasa tomon wa katiyaat tomon, wokit ana dusu wusa tai minum. ²⁵ Ashan kida Rabuna Yahweh kelim kida: Hasa ana bi arfau has ta Yakub, wa ana bi indu muhaba le bed ta Yakub, wokit kan ana amulu ma harara le isim tai alkudus ²⁶ Yala humon humon bi ithamal fadiha wa kulu kayana al humon tebiyu ana. Humon bi nesitu kulu de wokit humon bikun fi raha fi ardi tomon fi aman, be wele wahid bi galgalu humon. ²⁷ wokit Ana bi arfaum min nas wa limum min aradi ta adaa tomon, Ana bi wori nefsa tai kudus fi eina ta umam. ²⁸ Yala humon bi arufu inu Ana Yahweh Allah tomon,lianu ana rasulum le abudiya fi wasad umam.Lakin yala ana bi limum wara le ardi tomon. Ana mabi bi sibu wele wahid minum fi wasad umam. ²⁹ Ana tani mabi dusu wusa tai minum wokit Ana dofugu Roho tai fi bed ta Israel- de yau karar ta Rabuna Yahweh.”