¹ Kalam taYahwa ja le ana, bi gul, ² "Ibin al insan, itnaba wa gul, 'Rabuna Yahwa kelim: kore, "Wu le yom al bi ja." ³ Yom de gerib. Yom de gerib le Yahwa. Huwo bikun yom ta sihab, wokit ta hajat batal le dual. ⁴ Bad dak shakila bi ja le Masir, wa taab bikun le Cush zaman nas al katulu waga fi Masir- kan humon shilu mali tou, wa kan asas tou damar. ⁵ Cush wa Put, Lydia, wa Arabia kulu, wa Libya, sawa be nas al tabe le tifagiya- humon kulu bi waga fi harib(shakila). ⁶ Yahwa kelimu: Yala del al saidu Masir bi waga(sagit), wa kibriya ta guwa tou bi rua tehet. Min Migdol le Syene jes tomon bi waga be shakila-de karar min Rabuna Yahwa. ⁷ Bi kafu humon fi nus ta ardi al sibu, wa mudun tomon bikun beinu mudun al mudamar. ⁸ Bad dak humon bi arufu inu ana Yahwa, kan ana wala nar fi Masir, wa kan nas al bi saidu huwo kulu demiru. ⁹ Fi yom dak murasilin bi ruwa min gidami fi sufun ashan bi koufu Cush al amin, wa kore bikun fi beinu humon fi yom ta waga ta Masir. Fa suf! huwo bi ja. ¹⁰ Rabuna Yahwa kelimu: Ana bi kutu nihaya le Masir al ketir fi idan ta Nebuchadnezzar, melik ta Babylon. ¹¹ Huwo be jesh tou, Irhab ta dual, bi jibu ashan demiru ard; humon bi talau sef tomon did Masir wa bi mala ardi be del al kan katulu. ¹² Ana bi kutu anhar bikun ard al yabis, wa ana bi biyu ardi de le nas ashrar. Ana bi amulu ardi de wa mahal tou kulu fadi be idan ta adu- Ana, Yahwa, kalas wonusu. ¹³ Rabuna Yahwa kelimu: Ana bi demiru asnam, wa ana bi jibu(kutu) nihaya le asnam ta Memphis al ma nafe . Amir bikun mafi tanimara fi ardi ta Masir, wa Ana bi kutu kof fi ardi ta Masir. ¹⁴ Bad dak ana bi kutu Pathros ashan bi kun fadi wa bi kutu nar fi Zoan, wa ana bi nafisu hukum fi Thebes. ¹⁵ Ana bi kubu zel tai le Pelusium, Mahal al gowi ta Masir, wa bi gata jamahir ta Thebes. ¹⁶ Bad dak ana bi kutu nar fi Masir; Pelusium bikun fi waja shedid, Bi kasuru Thebes, wa Memphis kulu yom bi wajihu adu. ¹⁷ Shabab al fi Heliopolis wa Bubastis bi waga be shakila, wa mudun tomon bikun fi sijin(abudiya). ¹⁸ Fi Tahpanhes, nahar bikun duluma kan ana kasuru niir(tegila) ta Masir wa kibiriya ta guwa tou bi kalasu. Sihaf bi kati huwo, wa banat tou bi douru fi abudiya. ¹⁹ Ana bi nafisu hukum fi Masir, yala humon bi arufu inu ana Yahwa.'" ²⁰ Bad dak ja fi zaman fi sena nimira idasar, fi shahar al awel, fi yom sabah ta shahar, al kalam ta Yahwa ja le ana, ²¹ "Ibin al insan, Ana kasuru idan ta Pharaoh, melik ta Masir Suf! Ma robutu, au ma aliju be rubat, ashan bikun gowi shedid ashan bi amsuku sef. ²² Ashan kida Rabuna Yahwa kelimu, 'suf, Ana did Pharaoh, melik ta Masir. Ana bi kasuru idan tou, al gowi wa al moksur, wa ana bi sibu sef bi waga min idan tou. ²³ Bad dak ana bi shetetu Masir beinu dual wa bi wazau humon fi bein al aradi. ²⁴ Ana bi gowi idan ta melik ta Babylon wa bi kutu sef fi idan tou ashan ana bi demiru idan ta Pharaoh. Huwo bi indu abushihek gidam melik ta Babylon ma abushihek ta zol al bi mutu. ²⁵ Ana bi gowi idan ta melik ta Babylon, ama idan ta Pharaoh bi waga. Bad dak humon bi arufu inu ana Yahwa, zaman kan ana kutu sef fi idan ta melik ta Babylon; huwo bi hajimu ardi ta Masir be huwo. ²⁶ Yala ana bi shetetu Masir beinu dual wa wazau humon fi kulu aradi. Bad dak humon bi arfu inu ana Yahwa."'