¹ Musa gum juwabu wa gali, wa lakin yau humon ma bi sedek ana a le bi asuma le kalam tai, humon bi gul, “Rabuna ma zahir le inta” ² Yala Rabuna kelem le huwo, “De shunu fi ida taki? Uwo gali, Asaya” ³ Alla kelim le uwo gali “Jada asaya de tehet” huwo jada asaya de tehet wa asaya de agilibu debiba, wa Musa jere min asaya al biga debiba de. ⁴ Rabuna biga kelim le Musa, “midu ida taki wa amsuku min danaba. Musa midu ida too wa amsuku, debiba de rija tani mara le asaya fi ida bi too ⁵ Ashan umon bi sedek gali, Rabuna Allah ta Ibrahim wa Allah ta Ishaak wa Allah ta Yagoub yau zahir le inta” ⁶ Wa baadi kida Rabuna Kaman gali, Dakhalu ida taki fi Jeba taki” huwo dakhalu ida too fi jeba too wa tala bara, wa ida de biga indu judam ali gi beinu ze talig abu abiad. ⁷ Yala Rabuna kelem gali; “rija dakalu ida taki fi jeba tani mara.” Wa ida de rija tala kwes ze kan awel. ⁸ Kan umon ma bi sedek inta fi aya nimira wahid de, umon bi sedek fi aya al akhir. ⁹ Wa kan umon ma bi sedek itnin aya de, wa umon aba asuma le kalam taki, keli inta shilu min moyo ta nahar wa kubu fi mahal ali nasif, wa moyo de bi tala dom fi kulu mahal. ¹⁰ Musa Kaman kelim le Rabuna gali “Asma ya seid, ana ma zol ta kalam ana ma bi arufu wonusu min bediri, lisan tai tegil.” ¹¹ Rabuna gum kelim gali; Munu yau sala kasuma le zol? Wa munu yau sala ali tamtam au ali ma gi asuma au zol ali amiyan? De ma ana Rabuna yau gi sala? ¹² Ruwa hasa wa ana bikun ma kasuma taki wa bi wori le inta sunu inta bi kelim. ¹³ Musa Kaman gal le Rabuna; asma ya seid, rasulu zol tani” ¹⁴ Rabuna biga tala zalan min Musa wa kelem le huwo gali” Haroun de ma akhu taki? Ana arufu gali Haroun bi arufu wonusa, wa huwo Kaman hasa jai fi sika ashan bi gabilu inta. Huwo kan aniu inta huwo bitala farhan shedid, fi gelba too. ¹⁵ Yala inta bi kelem le Haroun wa kutu kalamat fi kasuma too, wa ana bikun ma kasuma taki wa ma kasuma bitoo, wa ana bi alimu itakum haja ali itakum bi amulu. ¹⁶ Wa huwo bi kelem le shaab bi kalam taki. Wa huwo bi kun kasuma le inta wa inta bi kun Rabuna bitoo. ¹⁷ Wa inta bi shilu asaya de fi ida taki ashan inta bi amulu bi asaya de ayat.” ¹⁸ Yala Musa gum wa rija le Nesiba bitoo Yathroun wa kelim gali “ana Mashi wa birija le akhwana tai ali fi Masir ashan bi ainu kan sei umon fi hai lisa” Yathroun nesiba ta Musa kelim gali Ruwa bi salam” ¹⁹ Wa Rabuna gum kelim le Musa gali; “Rija le Masir leanu nas al kan der katulu inta umon kulu mutu. ²⁰ Yala Musa gum wa shillu mara too wa iyal too wa rekibu umon fok hamir wa rija le Masir. Wa Musa shillu asaya ta Allah fi ida too. ²¹ Wa Rabuna gum kelim le Musa; “Naman inta rija le Masir, ainu kulu al ajaib ali ana kutu ashan inta bi amulu fi gidam ta Foroun Melik ta Masir. Wa lakin ana bi gowi felba bitoo wa huwo ma bi fiku al shaab. ²² Inta bi kelim le Foroun; Rabuna bi gul kida; Israel de weled tai ali bikir. ²³ Ana kelimu le inta; Sibu weled tai ashan bi abidu ana, inta ma der sibu huwo. Yau ana bi katulu weled bitaki ali bikir. ²⁴ Wa hasil fi sika fi bet umon limu ma Rabuna wa Rabuna kan de katulu huwo. ²⁵ Sefura mara ta Musa gum shillu siwana wa gala ghurila ta weled too wa kelim gali” inta aris bita dom leanu” ²⁶ Yala huwo sibu huwo ruwa biya hiya gum kelim gali; “Aris ta dom ashan tahiru” ²⁷ Rabuna gum kelim le Haroun gali; Ruwa istagbil Musa bara inak” huwo ruwa wa gabil ma Musa fi Jebel ta Allah. ²⁸ Musa gum wori le Haroun kulu kalam ta Rabuna ali rasulu huwo, wa huwo wori kulu ayat ali Rabuna wodi wosiya too. ²⁹ Musa wa Haroun gum ruwa wa limu nas kubar to iyal ta Israel. ³⁰ Haroun gum wa kelim wa wori kulu kalam ta Rabuna ali huwo le Musa, wa huwo amulu ayat fi uyun ta shaab. ³¹ Shaab gum aamin badi umon asuma anu Rabuna zekir iyal ta Israel wa huwo ainu taab tomon. Umon gum dengir wa geni ma rukuba le Rabuna.