¹ Yala Musa kan gi douru wara ganamayat ta gesis ta Midian, huwo sugu ganamayat wa wosulu le Jebel ta Allah ali isimu Khorib. ² Wa malaka zahir le huwo fi lisan ta naar fi nus sejera. Huwo ainu sejera de gi wala bi naar, wa ma gi haragu. ³ Musa kelim gal; “Ana bi ja gerib ashan bi shuf manzar al kebir de. Lee shajer de ma bi haragu? ⁴ Huwo gum ja gerib ashan bi shuf, Allah nadi huwo min nus ta Shajer wa gali; “Musa! Wa Musa gali “ana yau” ⁵ Yala Allah gal le Musa: “mata ja gerib le hina. Agila jezma taki de min kura taki, leanu mahal al inta gi wogif fogo de mahal mukadas. ⁶ Yala Kaman sot de kelim le Musa gal: “Ana Allah ta abu taki, Allah ta Ibrahim wa Allah ta Ishaak wa Allah ta Yagoub”. Musa khati usa too leanu huwo khafu ashan bi ainu le allah. ⁷ Allah Rabuna gum kelim gali; “ana khalas asuma taab ta Shaab bitai al fi Masir wa ana ali gi istamir umon. Ana afrufu waja bitaum, ⁸ Ana nezil ashan alagu umon min ida ta Masriin (nas ta Masir), wa tala umon min beled de wa shilu umon le beled al gi geni taman wa kebir le mahal al gi dofugu leben wa asel, le mahal ta nas ta kanaan wa Hasiin wa Amuriin wa Farziin wa Howiin wa Yabusiin. ⁹ Wa hasa yau kore ta Israelin khalas wosulu le ana, wa ana Kaman ainu tab bitohum ali umon gi ligo min nas ta Masir, ¹⁰ Yala hasa taali keli ana rasulu inta le Melik Foroun, wa inta bi tala nas tai iyal ta Israel min Masir?” ¹¹ Musa gum kelim le Allah gli; Ana munu ashan bi mashi le Foroun, wa bi tala nas ta Israel min Masir?” ¹² Wa Allah kelim le Musa gali; Ana bi kun ma inta, wa de yau alama ali bi wori gali ana yau rasulu inta, kan khalas inta tala shab min Masir, intum bi abidu Allah fok Jebel de” ¹³ Musa gum kelim le Allah; yau ana bi mashi le iyal ta Israel wa ana bi kelim le umon gali; Allah ta Abuhat takum rasulu ana le itakum. Wa kan umon gal le ana; Isim too munu? Ana bi Juwabu umon kef?” ¹⁴ Allah gal le Musa; “Ana yahu ana” wa gal; kelim zede le iyal ta Israel: Ana yau rasulu ana le intum” ¹⁵ Wa Allah Kaman gali le Musa; “Wori le iyal ta Israel; yawe Allah ta Abu takum, Allah to Ibrahim wa Allah ta ishaak wa Allah ta Yagoub yau rasulu ana le intum, de isim tai ali ma bi geru wa zikra bitai fi kulu dor. ¹⁶ Amshi wa limu nas kubar ta Israel wa wori le umon gali “Rabuna ta Abuhat takum, Allah ta Ibrahim wa Allah ta Ishaak wa Allah ta Yagoub zahir leana wag li; ana ainu haja ali amulu le itakum fi Masir. ¹⁷ Ana kelem; ana bi tala itakum min istimar ta Masir wa bi shilu intum le arid ta kanaaniin wa Hasiin wa Amuriin wa Farziin wa Hawiin wa Yabusiin, le Arid ali gi dofugu Leben wa Aasel. ¹⁸ Kan umon asuma le kalam taki, inta wan as kubar ta iyal ta Israel bi ruwa le Melik ta Masir wa intum bi kelem gali; Rabuna Allah ta Ibraniin ligo, has keli nina safir le bara bi talata ayam ashan nina bi gedim le Allah zebiha. ¹⁹ Lakin ana arufu Melik ta Masir ma bi sibu intum tala min Masir shal bi ida al gowi. ²⁰ Ana bi kulu ajaib tai ali ana bi amulu fogo. Wa biga huwo bi sibu intum. ²¹ Wa ana bi wodi neima le shaab ta Israel fi oyun ta nas ta Masir yalla naman intum gi tala bara min Masir intum ma bitala ma iden fadi. ²² Lakin kulu nuswan bi nadi min jiran tomon wa min sidi ta bet bitoo fidal wa Dahab wa malabis, wa intum bi sibu iyal takum arfa. Wa intum bi nyakamu nas ta Masir.