¹ Isim al kwes ahsiin min riha al ghali, wa yom ta mutu ahsiin min yom ta welada. ² Duwru fi biet ta beka afdal min duwru fi biet ta farah, ashan huzun bi jaa le kulu nas fi nihaya ta haya, wa keli nas kutu kalam de fi gelba. ³ Huzun afdal min dehek( ataku), ashan baad huzun al fi wasa farah bi jaa fi gelba. ⁴ Gelba ta zol al hakim fii biet ta huzun, lakin gelba ta zol al belied fi biet ta farah. ⁵ Afdal keli inya asuma le tuobikh ta zol al hakim min inta bi asuma le guna ta beliedeen. ⁶ Ashan howo amulu zi sut ta negitu ta shuk tahat ghuruma, wa kaman ataku ta beliedeen.de kaman ma indu maana. ⁷ Insan al hakim bi kun belied bi sabab ta zulum, wa rushwa bi karabu gelba. ⁸ Nihaya ta kalam ( mudua) afdal min bidaya ta kalam; wa nas al indu ruhu ta sabur afdal min nas al indu ruhu ta kebriya. ⁹ Keli ruhu taki ma kun zalaan bi suraa, ashan zalaan gi geni fi gelba ta nas al beliedeen. ¹⁰ Keli inta ma kelim, " Wenu ayam ta zaman al afdal min ayam ta hasa de?" Leanu de ma ashan hikma yahu inta asalu sual de. ¹¹ Hikma, howo kwes, zi worisa. howo faida le nas al gi ainu shemish. ¹² Leanu hikma bi jebu himaya zi al malibi agder jebu himaya, lakin faida ta maarafa howo inu hikma bi wodi haya le ayi zol al inud. ¹³ Keli intum ihtam maa hajat al Allah gi amulu: Howo bi agdeer amulu haja al kan howo mielu wa bi rejaa adiil tani mara. ¹⁴ Zaman ta hajat al kwes, afrah bi hajat de, lakin iza zaman ta hajat al batal, keli inta arufu keda, Allah asmahu (rudu) keli kulu itnii bi hasiil sawa. Ashan sabab de, mafi zol al bi arufu shunu yahu bi jaa hasiil le howo. ¹⁵ Ana ainu ayi haja fi haya tai al ma indu faida. mumkin insan al bar bi mutu raghmi shukul bar tuo, wa insan al sherir bi iesh haya towil raghmi aamal ta shar al howo gi amulu. ¹⁶ Keli inta ma kun Bar, hakim fi ena ta nefsa taki. leh inta bi demiru nefsa taki? ¹⁷ Keli inta ma kun sherir aw belied shedid. Leh inta deeru mutu gubal zaman taki? ¹⁸ Howo kwes ashan inta bi amsuku hikma de, wa inta ma keli ma sibu geni bar. ashan insan al bi kafu Allah howo bi amulu kulu wajibat tuo. ¹⁹ Hikma gowi shedid fi insan al hakim, aktar min ashara hukam fi al medina. ²⁰ Mafi insan fi ardi al bar al gi amulu hajat al kwes wa ma bi amulu khatiya kulu kulu. ²¹ Keli inta ma asuma ayi kalam al wonusu, ashan yemkininta bi asuma khadam taki bi laanu inta. ²² Bi nefsu teriga, inta bi arufu nefsa taki fi jowa gelba taki inu daiman inta bi laanu nas taniin. ²³ Kulu hajat de ana jeribu bi wasat hikma. Ana kelim, " Ana bi kun hakim," lakin howo kan aktar min al ana bi agdeer. ²⁴ Hikma baeid shedid wa amaegh shedid. munu yahu bi ligu howo? ²⁵ Ana hawil gelba tai ashan alimu wa jeribu (imtehin) wa fetishu hikma wa asalu sualat aan hagiga, wa ashan bi fahim inu shar howo belied wa belied de howo junun. ²⁶ Ana ligu inu ayi Mara al gelba tuo maliyan maa sharik wa shabakat, wa edan tuo fogu ganziir hiya mur shedid aktar min mutu. zol al gi mejedu Allah bi najah min hiya, lakin hiya bi gubudu zol al ta khatiya. ²⁷ Keli intum arufu inu ana ikteshif ( ana ligu), " Al mualim yahu kelim. "Ana bi ligu haja wara tani ashan ana bi ligu sherih al hagiga. ²⁸ De haja al ana lisa gi fetishu, lisa ana ma ligu howo. ana ligu insan bar wahid min nus ta Alfi nafar. lakin ana ma ligu Mara min beina nas deel kulu. ²⁹ Ana bes ligu haja wahid : Allah kalagu insan mustaghim. lakin homon ruwa fetishu suabat ketiir."