¹ Munu yahu insan al hakim? al bi arufu hajat al bi hasiil fi haya ta insan? Hikma al fi inasan bi wodi wosa tuo wala, wa wosa tuo al nashif de bi geiru. ² Ana bikelim keli inta hafisu awamiir ta al melik ashan de halifa ta Allah le himaya tuo. ³ Keli inta ma jere bara min wosa tuo, wa ma keli inta saidu fi haja al ghalat(al ma sah) leanu al melik gi amulu ayi haja al fi niya tuo. ⁴ kalam ta al melik yahu bi hakimu, biga munu yahu bi kelim le howo, " Inta gi amulu shunu?" ⁵ Zol al gi hafisu awamiir ta al melik haja batal ma bi ligu howo. Gelba ta Zol al hakim bi arufu amulu hajat bi teriga al kwes wa fi zaman al munasib. ⁶ Ashan ayi mushkila hal al sah wa zaman tuo, laanu mashakil ta insan ketiir. ⁷ Mafi inasan bi arufu shunu yahu gi jaa hasiil. Munu bi wori le howo yahu gi jaa? ⁸ Mafi insan indu sulta ashan bi wogif hawa, wa, mafi insan indu sulta le yom ta mutu tuo. mafi insan bi talau min jesh fi wokit ta harb, wa al sherir ma bi agdeer angizu khadameen tuo. ⁹ Ana arufu hajat de kulu; ana wodi gelba tai le ayi noua ta shukul al tehet al shemish. fii wokit al insan bi zulumu insan tani ashan bi awugu howo. ¹⁰ Wa biga ana ainu nas al ashrar dufunu. shilu homon min mahal al mugadus wa dufunu wa kan kerimu homon maa nas fi medina al homon amlu fogu hajat tomon ta al shar. kaman de howo ma indu maana( Batil). ¹¹ Iza kan hakimu jeriima ta shar bi eadaam wa ma nefizu bi sura, bi juru gulub ta nas ashan bi amulu shar. ¹² Hata insan al khati kan amulu shar miya mara 100 wa howo lisa gi iesh aumur towil, kaman ana arufu inu afdal le nas al gi kafu Allah. ashan deel al gi wogif gedam ta Allah wa gi kafu howo. ¹³ Lakin ma bi kun kwes le insan al sherir; haya tuo ma bi kun towil. ayamat tuo bi kun zi dul al gi jere ashan howo ma Kafu (Azimu)Allah. ¹⁴ Fii hajat taniin al ma indu faida ( Batil) al amulu fi al ardi: Hajat al kan bi hasiil le nas al asharar gi hasiil le nas al abrar, wa hajat al kan bi le nas al abrar gi hasiil le nas al al asharar. wa kaman ana kelim inu de ma indu faida( Batil). ¹⁵ Ashan keda ana bi wosi le geni muksut, ashan insan ma indu afdal haja tehet shemish ashan bi akulu wa shrab wa bi geni muksut. geni muksut bi ruwa maa howo fi zaman taab tuo fi kulu ayam ta haya tuo al Allah wodi le howo tehet al shemish. ¹⁶ Zaman ana wodi gelba tai ashan bi arufu hikma wa ashan bi fahimshukul al amulu fi al ardi, shukul al amulu bi dun ena ma bi numbi lellel aw bi nahar, ¹⁷ Biga ana arufu kulu aamal ta Allah, wa insan dak ma bi agdeer fahim al shukul al amulu tehet al shemish. ma muhim kam insan taaban ashan bi ligu netijat, howo ma bi ligu homon. bi raghmi insan al hakim bi sedik inu howo arufu, howo hagiga ma arufu.