¹ Melik Nabukhaznasr gom rasulo karar tou le kulu nas, umam, wa lugat al bi geni fi duniya: Kede salam takum zido. ² Huwo kuwas le ana ashan bi wori le intum alamat wa ajaib al Allah al Fok amolo le ana. ³ Kef kan ayat tou azim, wa kef kan ajaib tou gawi! Molokot tou ma indo nihaya, wa sultan tou bi geni min jel le jel." ⁴ Ana Nabukhaznasr, kan bi geni fi bet tai be salam, wa ana kan bi itmata be najah tai fi kasr tai. Lakin hilim kutu ana kafo. ⁵ Zaman ana nom, sura al ana aino wa rauya fi mukh tai lakabato ras tai. ⁶ Ashan keda ana tala karar kede jibo fi gidam tai kulu rujal ta Babil al indo hikma ashan bi fesiro le ana hilim de. ⁷ Nas majoseen ja, delin al bi wonuso ma meit (Kaldaneen), hukama, wa al bi agara nujom. Ana wori le hilim tai, lakin humon ma agder fesiro le ana. ⁸ Lakin fi nihaya Danel ja- al bi nadi isim tou Beltashasir ze isim ta illah tai, wa al indo ruhu ta illah - fa ana wari le huwo hilim tai. ⁹ "Beltashasir, reis ta majoseen, ana arufo ino ita indo roho ta aliha al kuduseen wa mafi haja saab le ita. Wori le ana de shono al ana aino fi hlim wa mana ta tou. ¹⁰ De yao ruya al ana aino fi zaman ana num fi serir: Ana aino, wa kan fi shejera kebir fi nus ta ard, wa huwo kan towil shedid. ¹¹ Shejera de raba wa tala gowi. Ras tou wosulo lahadi fi samawat, wa bi agder aino fi kulu atraf ta ard. ¹² Safagat tou giyafa, simar tou ketir, wa fogo akil le kulu nas. Haiwanat ta gaba ligo dul fi tihit tou, wa tiyor al fi samawat bi geni fi furu tou. Kulu khaliga al hai bi akulu min fogo. ¹³ Fi zaman al ana num fi serir ana aino ruya, wa fi haris, kudus al wahid nenzil min samawat. ¹⁴ Huwo kore wa kelimo, 'Gata shejera de tihit, wa gata furu tou, sheteto safagat tou, wa sheteto simar tou. Kede haiwanat jere min tihit tou wa tiyor tiri beid min furu tou. ¹⁵ Sibo asl juzor tou fi wata, rubuto be hadid wa nihas fi nus gesh ta gaba. Kede bilo huwo be nada ta samawat. Kede huwo ish ma haiwanat fi nos ashjar ta gaba. ¹⁶ Kede mukh tou gero min ta insan, wa kede wodi le hwo mukh ta haiwanat lahadi ma saba sena bi kalaso. ¹⁷ Hukom de tala haris yao wodi awamir, karar de talao be al kudos al wahid, ashan kulu hai kede arufo ino Al bi geni fok indo sultan fogo kulu mamalik ta nas wa bi wodi le ai zol al huwo der, hata le zol al hagar.' ¹⁸ Ana, melik Nabukhaznasr, de yao hilim tai. Hasa de ita Beltashasir, wori le ana tefsir ta hilim de, ashan mafi wahid min rujal al indo hikma fi mamlaka tai agder fesir le ana hilim de. Lakin ita bi agder amolo, ashan ruhu ta ailha al kuduseen fi le ita." ¹⁹ Biga Daniel, al isim to kaman Belashazir, tala hazin le fatra guser, wa afakar tou kutk huwo kafo. Melik gom kelimo, "Beltashazir, mata sibo hilim wa tefsir tou wodi khof le ita." Beltashazir rudu, "Sead tai, kede hilim de amolo nefsa tou le delin al bi akrah ita; kede tefsir tou kon le addo taki. ²⁰ Shejera al ita ain- al raba wa tala gowi, wa ras tou wosulo le samawat, wa agdero aino fi kulu atraf ta ard- ²¹ al ssafagat tou giyafa, wa simar tou ketir, al fogo akil le kulu khaliga, wa fi tihit tou haiwanat ta gaba bi ligo dol, wa tiyor ta samawat bi ish fogo- ²² shejera de yao ita, melik, ita yao raba gowi shedid. Azama taki raba wa wosolo lahadi samawat, wa sultan taki wosolo lahadi atraf ta ard. ²³ Ya melik, ita aino haris, al kudos al wahid bi nenzil min sama wa kelimo, 'Gata tihit shejera de wa demiro huwo, lakin sibo kura ta juzor tou fi ard, rubuto be hadid wa nihas, fi nus gesh ta gaba. Kede huwo bilo be nada min samawat. Kede huwo ish ma haiwanat ta gaba fi mazra lahadi saba sena kalaso.' ²⁴ Ya melik, de yao tefsir ta hilim de. De amr ta Al Gadir fok yao wosulo le ita, ya sead tai al melik. ²⁵ Bi turujo ita min nos ta nas, wa ita bi geni ma haiwanat ta gaba. Ita bi geni akilo gesh ze bagara, wa bi bilo ita be nada ta samawat, lahadi ma saba senawat bi kalaso wa ita bi arufo ino Al bi geni fok indo sultan fogo mamalik ta nas wa huwo bi wodi le ai zol al huwo der ²⁶ Ze ma wodi awamir ino kede sibo kasab ta shejera de, be nefsa teriga mamlaka taki bi rijao le ita fi zaman al ita arufo ino samawat yao bi hukomo ai haja. ²⁷ Ashan keda, ya melik, kede ita asom le nesiha tai. Sibo katiya wa amolo haja al sah. Rija wara min katiya be wari rahma le del al mozlomin, wa ihtimal najah taki bi zido." ²⁸ Hajat dekulu kan hasille melik Nabukhaznasr ze ma kelimo. ²⁹ Bad hidashar shahar huwo kan bi dawro fi suluh ta kasr fi Babil, wa huwo gom kelimo, ³⁰ "De ma yao Babil al azim, al ana abino ashan bi geni asiama , le mejid ta jalala tai?" ³¹ Fi zaman al kalam de lisa fi kasuma ta melik, sot ja min sama:"Melik Nabukhaznasr, de ilan le ita ino mamlaka de shelo bara min ita. ³² Bi turujo ita bab min nos nas, wa bet taki bi kon ma haiwanat ta gaba. Bi kuto ita akolo gesh ze bagara. Lahadi ma saba sena bi kalaso waita bi arufo ino fi Al bi geni fok indo sultan fi mamalik ta nas wea huwo bi wodi le ai zol al huwo dero." ³³ Hukom al did Nabukhaznasr nefizo tawali. Turjo huwo min nos nas. Huwo akolo gesh ze bagara, wa jesim tou bilo be nada ta samawat. Shar tou raba ze rish ta nesr, dufor tala towil ze ta tiyor. ³⁴ Fi nihaya ta zaman al kelimo, ana Nabukhznasr, arofa ena tai le sama, wa mokh tai rija le ana. "Ana sabiho Al bi geni fok, wa kerimo wa mejido al wahid al bi geni lelabad. Ashan mulk tou bi geni min jil le jil ³⁵ Ard wa kulu al bi geni fogo ma haja fi gidam tou; huwo bi amolo ai haja al huwo dero kan fi junod ta sama wa sukan ta ard. Mafi zol bi agder wagifo huwo aw ithada huwo. Mafi zol bi agder kelimo le huwo, "Lee ita amolo haja de?" ³⁶ Fi zaman dak mukh tai rija le ana, sultan tai wa azama rija le ana shan mejid ta mamlak tai. Mostasharin tai wa nubala tai fetiso ana. Rijao ana wara le kursi tai, hata zedo le ana azama tai. ³⁷ Hasa ana, Nabukhaznasr, bi sabiho, mejido, wa azimo melikmta samawat, ashan amail tou kulu hag, wa sikat tou adiel. Huwo bi agder nenzil delin al bi daoro be kebriya.