¹ Melik Nabokhaznasr amolo sanam min dahab tol tou siteen zira (talata mitir) wa ord tou siteen zira. Huwo kutu fi mahal al sath tou motasawi fi wilaya ta Babil. ² Bad daak melik Nabokhaznasr rasulo kabara ino kede kulu hukam ta wilaya, hukam ta aklim, wa hukam al mahaileen, kede limo ma mustasharin, umana ta gurush, gudda, wa kulu makatib al fok ta wilaya kede ja ashan bi kerizo sana al huwo amolo. ³ Yala hukam ta wilayat, hukam ta akalim, wa hukam ta iklim, sawa ma mostasharin, umana ta gurush, gudda, hukam, wa kulu nas al kubarin ta wilaya humon limo sawa ashan tekriz ta sanam ta Nabukhaznasr. Humon wogif gidam tou. ⁴ Gom nadi be sot ali, "Wodi awamir le intum, shab, umam, wa lisan, ⁵ ino fi zaan intum asuma sot ta gurun, nai, gitar, rabab, wa kulu anwa ta musega, intum lazim bi dengir tihit wa abido sanam ta dahab al melik Nabukhaznasr amolo. ⁶ Ai zol al ma dengir tihi wa abido, fi zaman dak, bi jadao fi juwa nar kebir." ⁷ Zaman nas kulu asoma sot ta gurun, nai, gitar, rabab, wa kulu nou ma moziga, kulu shab, umam, wa lisan dengir tihi wa abido sanam al min dahab al melik Nabukhaznasr amolo. ⁸ Fi zaman daak juzu min Kaldaneen ja wa gedimo shakwa le melik did Yahudin. ⁹ Humon kelimo le melik Nabukhaznasr, "Melik, ish lel abad! ¹⁰ Ya, melik, ita tala garar ino ai zol asuma sot ta gurun, nai, gitar, rabab, wa kulu nou ta mozika, lazim bi dengir tihit wa abido sanam ta dahab. ¹¹ Ai zol ma dengir tihi wa abido lazim bi jadao fi hufra ta nar. ¹² Hasa fi juzu min Yahodeen al ita aino ashan bi ishtaka fi mohafaza ta Babil; isim tumon yao Shadrakh, Meshak, wa Abdango. Rujal de, ya melik, ma kutu bala le kalam taki. Humon ma dengir le aliha taki, wele abido sanam al ita amolo min dahab de." ¹³ Biga Nabukhaznasr, tala zalan shedid, wa wedi awamir kede jebo Shadrakh, Mishakh, wa Abdengo fi gidam tou. Fa gom jibo rujal de gidam ta melik. ¹⁴ Nabukhaznasr kelimo le humon, "Hal intum kutu fi mokh takum, ya Shadrakh, Mishakh, wa Abdango, ino intum ma abido aw dengir le sanam ta dahab al ana kutu? ¹⁵ Kan intum jahizeen - fi zaman al intum asuma sot ta gurun, nai, gitar, rabab, sufara, wa kulu nou ta mozika, dengir takum wa abido sanam al ana amolo, kulu haja bi kon tamam. Lakin kan intum aba abido, bi jadao intum tawali fi foron ta nar. De yato allah al bi agerd inkizo intum min iden tai?" ¹⁶ Shadrakh, Mishakh, wa Abdango juwabo le melik, "Nabukhaznasr, mafi dai ashan kede enna bi juwabo le itak fi kalam de. ¹⁷ Kan fi ijaba, Allah al enna bi abido huwo gadir ashan khaliso enna min foron ta nar , wa huwo bi ankizo enna min iden taki, ya melik. ¹⁸ Lakin iza kan huwo ma amolo, kede ita arofo, ya melik, ino enna ma bi ruwa dengir le aliha taki, wa enna am bi ruwa abido sanam ta dahab al ita amolo." ¹⁹ Biga Nabukhaznasr big tala zalan shedid; shikil ta wosa tou geiro tijah Shadrakh, Mishakh, wa Abdengo. Huwo wodi awamir ino kede zido nar ta foron de sokon saba marat min al kan fogo. ²⁰ Biga huwo amiro baad min rujal al indo guwa fi jesh tou kede robuto Shadrakh, Meshakh, wa Abdengo wa jadao humon fi foron ta nar. ²¹ Gom ruboto rujal de wa humon be gumashat tumon, surowal, gunsan, wa ardia tumon, wa jadao humon fi fororn ta nar. ²² Ashan talimat ta melik kan gowi wa foron ta nar de kan sokon shedid, harara ta nar de katulu rujal al jadao Shadrakh, Mishekh, wa Abdengo. ²³ Talata rujal de, Shadrakh, Mishekh, wa Abdengo, humon waga fi nar wa humon morbutin. ²⁴ Bad daak melik Nabukhasr istagarab wa wogif fok be sura. Huwo gom asalo mustasharin tou, "Enna mosh jadao talata rujal mobutin fi nar?" Humon gom rudu le melik, "Huwo hagiga, ya melik." ²⁵ Huwo gom kelimo, "Lakin ana bi aino arba rujal ma morbutin bi daoro fi nus ta nar, wa aogo humon. Shikil ta nimra arba de ze jena ta alliha." ²⁶ Biga Nabukhaznasr ja gerib min foron ta nar de wa nadi shedid, "Shadrakh, Mishakh, wa Abdengo, abed ta Allah al Fok, tal takom bara! Tal takom hini!" Biga Shadrakh, Mishakh, wa Abdengo tala min nar. ²⁷ Hukam ta wilayat, hukam ta akalim, bagi hukam, wa melik humon limo sawa ashan bi aino rujal de. Nar ma asir fi jissem tumon; shar ta ras tumon ma harago; gumash tumon ma asir be nar; wa mafi riha ta nar fi jissem tumon. ²⁸ Nabukhaznasr kelimo, "Kede enna mejido Allah ta Shadrakh, Mishakh, wa Abdengo, al rasulo rosol tou wa ankizo khudam tou al wodi siga le huwo, wa khalifo awamir ta melik, wa wodi jisem tumon bedal ma bi dengir aw abido ai allah tani ile Allah tumon. ²⁹ Ashan keda ana tala karar ino ai shab, umma, wa luga al wonuso ai haja didi Allah ta Shadrakh, Mishakh, wa Abdengo bi gatao huwo hita hita, wa beyot tumon bi demiro, ashan mafi illah tani al bi agder ankizo ze huwo. ³⁰ Biga melik wodi tergia le Shadrakh, Mishak, wa Abdengo fi wilaya ta Babil.