¹ Fi sena nimra itniin ta Jehoash welet ta Jehoahaz, melik ta Israil, Amaziah welet ta Joash, melik ta Yahuzah, bada le hukum. ² Uwo kan kamsa_isirin senawat fi umur zaman uwo bada le hukum; uwo hakam tisa_isirin senawat fi Arselim. Isim uma tao kan Jehoaddan, ta Arselim. ³ Uwo amulu sunu kan sah fi uyuun ta Yahuah, lakin lisa ma ze Daud abu tao. Uwo amulu ayihaja al Joash, abu tao, kan amulu. ⁴ Lakin al amakin ali kan ma silu bara. Al nas lisa bi zabihu wa haragu bakurat fi al amakin ali. ⁵ Uwo kan hasal inu gali ze guam ze hukum tao kan biga asisu kuwes, uwo katulu al kudam al kan katulu abu tao, al melik. ⁶ Lisa uwo ma katulu al awulat ta al katilun; belaks, uwo amulu alahasab le sunu kan moktub fi al kitab ta al ganun Musa, ze Yahuah kan amiru, kelim, ''Al abuhat lazim ma bi katulu le sabab iyal tomon, wele lazim al iyal bi katulu le sabab abuhat tomon. Belaks, ayi zol lazim bi katulu le sabab katia rao.'' ⁷ Uwo katulu asara alf asakir ta Adom fi al Wadi ta Milah; uwo kaman salu Sela fi harb wa nadi uwo Joktheel, al yau sunu uwo yau bi nadi le yom alela. ⁸ Biga Amaziah rasal murasilin le Jehoash welet ta Jehoahaz welet ta Jehu melik ta Israil, kelim, ''Taal, kede nina limu mabat usa le usa fi sakila.'' ⁹ Lakin Jehoash al melik ta Israil rasal murasilin wara le Amaziah melik ta Yahuzah, kelim, ''Al kasab sok al kan fi Lubnan rasal risala le Cedarn fi Lubnan, kelim, 'Wodi binia taki le welet tai le bi kun mara,' lakin haiwan ta gaba fi Lubnan rua be inak wa dusu tehet al sok. ¹⁰ Ita kalas hagiga hajamu Adom, wa gelba taki kalas arfa ita fok. Silu dala fi intisar taki, lakin geni fi bet, lianu le bes ita der sabibu lenesfsak muskila wa waga, kulumin ita wa Yahuzah ma ita?'' ¹¹ Lakin Amaziah kan ma asama. Kida Jehoash melik ta Israil hajam wa uwo wa Amaziah melik ta Yahuzah limu badun usa le usa fi Beth Shemesh, al tabi le Yahuzah. ¹² Yahuzah kan gilibu be Israil, wa ayi rajil jere le bet. ¹³ Jehoash melik ta Israil, gobudu Amaziah, melik ta Yahuzah welet ta Jehoash welet ta Ahaziah, fi Beth Shemesh. Uwo ja le Arselim wa kasuru tehet al heta ta Arselim min al bab Ephraim le al bab Corner, arbumia mitirat musafa. ¹⁴ Uwo salu kulu al dahab wa fida, kulu al hajat al kan ligo fi al bet ta Yahuah, wa al hajat kayima fi al gasrat melik, ma masajin kaman, wa rajaa le Samiria. ¹⁵ Ze le al hajat tanin bekusus Jehoash, kulu al uwo amal, guwa tao, wa kef uwo sakal ma Amaziah melik ta Yahuzah, delin umon ma moktub fi al kitab ta al ahdas ta al muluk ta Israil? ¹⁶ Biga Jehoash ragat ma judud tao wa kan dofunu fi Samiria ma al muluk ta Israil, wa Yeroboam, welet tao, biga melik fi makan tao. ¹⁷ Amaziah welet ta Joash, meik ta Yahuzah, ass kamistara senawata bat al mutu ta Jehoash welet ta Jehoahaz, melik ta Israil. ¹⁸ Ze le al hajat tanin bekusus Amaziah, delin umon ma motub fi al kitab ta al ahdas ta al muluk ta Yahuzah? ¹⁹ Umon amulu muamara dit Amaziah fi Arselim, wa umon rasal rujal wara uwo le Lachish wa katulu uwo inak. ²⁰ Umon jabu uwo wara fok hasasin, wa uwo kan dofunu ma judud tao fi medina ta Daud. ²¹ Kulu al nas ta Yahuzah salu Azariah, al kan sitasar senawat fi umur, wa amulu uwo melik fi makan ta abu tao Amaziah. ²² Azariah yau kan al abinu Elath wa rijau uwo le Yahuzah, bat melik Amaziah ragat ma judud tao. ²³ Fi al kamistasar sena ta Amaziah welet ta Joash melik ta Yahuzah, Yeroboam welet ta Jehoash melik ta Israil bada le hukum fi Samiria; uwo hakam wahi-arbain senawat. ²⁴ Uwo amal sunu kan batal fi al nazar ta Yahuah. Uwo kan ma tala min ayi min al katiat ta Yeroboam welet ta Nebat, al kan sabibu Israil le kaita. ²⁵ Uwo rijau al hudut ta Israil min Lebo Hamath le bahar ta al Arabah, tabao al awamir ta al kalam ta Yahuah, al Allah ta Israil, al uwo wonusu be wasat kadam tao Yunan welet ta Amitai, al nebi, al kan min Gath Hepher. ²⁶ Lianu Yahuah saf al muanat/taab ta Israil, al uwo kan biga mur shedid le ayiwahid, kulumin abid wa hur, wa gali kan inak mafi munkis le Israil. ²⁷ Kida Yahuah kelim gali uwo lisa ma masa bara al isim ta Israil min tehet sama; beaks, uwo kalisu umon be al ida ta Yeroboam welet ta Jehoash. ²⁸ Ze le al hajat tanin bekusus Yeroboam, kulu al uwo amulu, guwa tao, kef uwo gowomu sakila/harb wa ankisu Dimask wa Hamath, al kan tabi le Yahuzah, le Israil, delin umon ma moktub fi al kitab ta al ahdas ta al muluk ta Israil? ²⁹ Yeroboam ragat ma judud tao, ma al muluk ta Israil, wa Zechariah welet tao biga melik fi makan tao.