¹ Fi kalam ta kidma le nas al kudusiin ta Allah, huow ma dururi le ana ashan bi katibu le intakum. ² Ana arufu an neia takum, ale ana bi dala mawo le nas ta Macedonia. Ana wori le humon inu Achaia biga jahiz min sena al fat. Hamas takum harigo ketir min uitakum le shokool. ³ Hasa ana rasulu akuwan tai ashan dala tanina ma bi le sakit, wa ashan intakum bi kun jahiz, ze ma Ana kelim bi kun. ⁴ wa ila, kan aye min Macedonien ja ma ana wa ligo itakum ma jahiziin, anina bi kun ma fadiya__Ana ma kelim haja an itakum__le anu ana indu sikha fogo itakum. ⁵ Ashan keda ana fekiri huwo kan mohim ashan bi asalu akuwan ashan bi ja le itakum wa ashan bi amulu tertebat gidam le hadiya al itakum kelimu. De ashan bi kun jahiz ze baraka, wa ma ze haja bi mrara. ⁶ Al kalam yau de al bi zara besit bi ligo besit, wa al bi zara ma sabab ta barakat bi ligo ma barakat kaman. ⁷ Kede kulu wahid wodi ze ma huwo katitu fi gelba tou, ma bi guwa aw bi asuru huwo leanu Allah bi hibu gelba al bi wodi ma mokosut. ⁸ Wa Allah huwo gader ashan bi sibu neima dufugu le itakum, ashan fi kulu hajat itakum kulu bi kun indu ihteyaj. De bi kun ashan itakum bi weledu amayiel al kwes. ⁹ Huwo ze ma katibu: ''Huwo gesimu gena tou wa wodu le masakiin shokol kwes tou bi geni ila abad.'' ¹⁰ Huwo albi wodi tirab le muzari al bi zara wa regif le akil kaman bi zidu tirab ta zira takum. Huwo bi wodi zidu hasad ta beer takum. ¹¹ Itakum bi kun ganiyaniin fi kulu sika ashan itakum bi kun ma barakat ketir. De bi jibu rija shokuran le Allah bi wsat anina. ¹² Leanu ta kidma de ma bes bi kati ihteyajat ta nas ta Rabuna, lakin kaman bi dofugu le ketir min amal ta rija shokuran le Allah. ¹³ Leanu jeribu itakum ma kidma de, itakum kaman bi mejido Allah ma ihteram ta ihteraf takum le injil ta Mesi. Itakum kaman bi mejido Allah ma shokol kwes ta hagiga takum le humon wa le kulu wahid. ¹⁴ Huwomon ma limu ma itakum zaman touwil, humon bi seli an itakum. Huwomon amulu ze de ashan neima ta Allah al kebir fogo itakum. ¹⁵ Kede shokuran kun le Allah ashan neima tou al ma bi agder fesiru!