¹ Nina deir kede intum aruf, ya akuwana, kalam neima ta Allah al wodi le kanais al fi Makadoniya. ² Fi wokit bita tejriba al kebir al kan hasil, al kutu farah tomon biga mafi wa zuruf ta sokol meskin al talau humon ganiyanin kalis. ³ Ana bi shahidu gali humon wodi ze godur al humon agder, wa kaman ziyada min godur al kan humon bi agder, wa min niya tomon. ⁴ Wa be sura kida humon asalu nina bira ashan kede nina ligo fursa ta limu sawa fi kidma ta nas al kedisin ta Allah. ⁵ De ma hasil ze kan nina deiru, lakin humon awel wodi nufus tomon le Rabuna wa baad dak le nina be niya ta Allah. ⁶ Kaman nina kutu Titos, al kan bada shokol de, ashan bi timu fi nus takum shokol ta neima. ⁷ Lakin ze ma intum bi zidu fi ai haja - fi iman, fi kalam, fi ilim, fi kulu ijtihad, wa fi muhaba takum le nina. Kaman ashan kede intum zidu fi shokol ta iman de. ⁸ Ana kelim zede ma talimat. Lakin, Ana kelim kida ashan bi jeribu amana ta muhaba takum kan ana aburu be hamas ta nas tanin. ⁹ Ashan intum aruf neima ta Rabuna ta nina Yesuah al Mesih. Sala kan Huwo ganiyan, ashan intum Huwo biga meskin, ashan be wasit sokol meskin Bito intum bi kun ganiyanin. ¹⁰ fi kalam de ana bi wodi le intum nesiya al bi saudu intum. Wahid sena al fat, intum ma bes bada ashan bi amulu haja, lakin intum indu niya ashan bi amulu. ¹¹ Hasa kede intum kalasu. Ze kanu fi hamas wa niya ashan bi amulu kaman, kaman kede intum agder kalasu, ze al intum bi agder. ¹² Ashan kan intum indakum hamas ashan bi amulu shokol de, bi kun haja kuwes wa al deiru. Lazim kede asisu godur al zol indu, ma godur al huwo ma imndu. ¹³ Shokol ze de ma ashn tanin bi kun fi raha wa intum bi kun fi taab. Lakin, kede kun fi adala. ¹⁴ Ketir bitak fi zaman ta hasa bi zidu haja al humon deiru. De kaman ashan ketir tomon bi zidu haja al inta deir. wa min hinak bi kun fi adala. ¹⁵ Huwo ze katibu: "Zol al indu haja ketir ma bi indu ai haja al bi sibu wara, wa zol al indu haja besit ma bi indu ai haja nagis." ¹⁶ Lakin shukuran le Allah, al kutu fi geliba ta Titos jidiya ze al ana indu le intum. ¹⁷ Huwo ma bes rudu tilba bita nina, lakin huwo kan jadi shedid be sabab bito. Huwo ja le intum be niya bito. ¹⁸ Nina rasulu ma huwo aku bita nina al wonusu kuwes bito gidam nas fi Kanais kulu ashan shokol bito al kuwes fi beshiru Injil. ¹⁹ Ma de bes, lakin kaman kanais hazilu huwo ashan bi safir ma nina fi shokol ta neima de. De ashan bi mejidu Rabuna zatu wa le hamas bita nina lemusada. ²⁰ Nina bi wasa bara min kalam al bi kutu ai wahid bi loumu nina fi shokol al nina bi amulu de. ²¹ Nina kutu bala bes ashan amulu haja al bi jibu suma kuwes, ma bes gidam Rabuna, lakin kaman gidam nas. ²² Nina kaman bi rasulu aku tani ma humon. Nina jeribu huwo fi ai safa wa nina ligo huwo kuwes fi amulu shokolat ketir. Huwo kaman haris shedid ashan thiqa al kebir al huwo ligo min intum. ²³ Titos, huwo sabi wa nina bi ishtakal sawa ashan intum. Wa kan akuwana ta nina tanin del, rasulu humon min kanais. Humon kaman nas kuweisin le al Mesih. ²⁴ Beinu le humon muhaba takum, wori takum le kanais hinak sabab al nina bi dala be intum.