¹ Akuwana al habaib, min zaman nina ligo waad de, kede nina nedifu nufus ta nina min ai haja al bi kutu nina nijis fi jisim ta nina wa roho. Kede nina dowuru wara ta kadasa fi kafu ta Allah. ² Salau takum juwa le nina! Nina m zulumu ai wahid. nina ma awgu ai wahid wole geliba ta nina ma waga fi haja ta ai wahid. ³ Ana kelim kida ma ashan ana deir hukumu intum. Ashan ana kelim gubal kida gali intum fi gulub ta nina, ashan nina bi mutu sawa wa bi hai sawa. ⁴ Ana indu thiqa kebir fi intum, wa ana fokhur be intum. Ana maliyan be raha. ana maliyan ziada be farah sala fi dikat ta nina. ⁵ Wokit nina ja fi Makadoniya, jisim tanina ma akudu raha. Lakin, nina kan mushkila fi ai sika be suraat min bara wa kof min juwa. ⁶ Lakin Allah, al bi sheja del al tehet, Huwo sheja nina be wusul ta Titos. ⁷ Ma bes be wusul bito Allah sheja nina. De kaman be teshji al Titos ligo min intum. Huwo wori le nina tasir takum al kebir, huzun takum, wa ihtimam takum al ketir le ana. Kida, Ana biga moksut kalis. ⁸ Sala kan risala bitai kutu intum haznanin, Ana ma bi kun mutuasif fogo. Lakin ana kan mutuasif wokit ana aynu risal bitai kutu intum haznanin fi zaman besit. ⁹ Ana murtah, ma ashan kan intum haznanin, lakin ashan huzun takum jibu intum le touba. Intum jeribu huzun al bi tifagu ma Allah, wa intum ligo taab ashan ma bi kun fi kusara le intum be sabab ta nina. ¹⁰ Ashan huzun al bi tifagu ma Allah bi jibu touba le kulasa al mafi fogo nadama. Huzun ta duniya fi kulu ahwal bi jibu mutu. ¹¹ Aynu de yatu jidiya ta huzun al bi tifagu ma Allah bi talau min intum. Godur shunu kan jidiya takum kan nedif. Godur shunu kan zalan takum, kafu takum, tama intum takum, hamas takum, wa niya takum ashan bi aynu lazim adala bi amulu! fi kulu haja intum asbit nufus takum ashan bi kun nedif fi mushkila de. ¹² Sala kan ana katibu lt intum, ana ma bi katibu ashan ana der maslaha, wole ashan dak al ligo taab huwo kan galtan, lakin ashan niya takum al kuwes le nina bi arufu le intum fi safa ta Allah. ¹³ Kida nina ligo teshji, nina kaman mokosut ketir be mokosut ta Titos, ashan roho bito biga jedid min be sabab takum kulu. ¹⁴ Ashan kan iftekhir le huwo be kalam takum, Fadiya kan ma amsuku ana. Bel aks, bes ze ai haja nina kelim le intum kan hagiga, iftikhar ta nina be sabab takum le Titos isbitu gali bi kun sah. ¹⁵ Tasir bito le intum kebir kalis ze ma huwo zekir taa takum kulu, teriga al intum istagbilu huwo be kafu wa rogus. ¹⁶ Ana mokosut ashan ana kalasu thiqa fi intum.