¹ Baat haja de wa shukul ta amana de, Sinharib melik ta Ashur, ja wa dakalu fi Yahuza. Huwo nezil asahn bi hajimu mudon al tuwal wa guwi, al hiuwo der gubudu le badun tuo. ² Wekit Hazekiah ayinu inu Sinharib ja wa der shakila ma Urshelim, ³ huwo shawiru ruwasa tuo wa rujal al guwin kede dufunu abiyar al kan bara medina; umon saido huwo. ⁴ Nas ketir limu sawa wa dufunu kulu abara wa keran al bi jibu moyo be nus ta ard. Umon kelim ''Leh melik ta Ashur bi ja ligu moyo?'' ⁵ Hazekiah shilu shuja wa abinu hetta al kan kasuru tihit. Huwo abinu abraj de fuk, wa kaman hiti al tani be bara. Huwo kaman guwi Gaalaa medin ta Dauod, wa amulu silah ketir wa Attras. ⁶ Huwo kutu ruwasa ta jesh le shaab. Huwo limu umon le huwo fi medina ta bab medina wa wunuso le umon be shuja. Huwo kelim, ⁷ ''Kede itakum kun guwin wa shuja. Matakum kafu wele geliba takum kede ma karabu be kalam ta melik ta Ashur wa jesh al fu ma huwo kulu, lanu al fi anina de azam min delin al ma huwo. ⁸ Al fi ma huwo de bes guwa ta insan, lakin Yahwah fi ma anina, Ilah ta anina, bi saido anina, wa bi shakila le anina.'' Yala shaab shaju badun tumon be kelimat ta Hazekiah melik ta Yahuza. ⁹ Baad de Sinharib, melik ta Ashur rasulu kadamin tuo le Urshelim (huwo kan fi gidam ta Lachish, wa jesh tuo kulu kan fi ma huwo), le Hazekiah, ,elik ta Yahuza wa le kulu nas ta Yahuza al kan fi Urshelim. Huwo kelim, ¹⁰ ''De haja al Sinharib, melik Ashur, bi wunuso: Itakum bi teki le munu ligu gufulu itakum juwa Urshelim? ¹¹ Saei Hazekiah ma bi kabasu itakum, ashan itakum bi mutu be jian wa atash, kan huwo bi kelim le itakum, 'Yahwah Ilah ta anina bi angizu anina min iden ta melik Ashur'? ¹² De ma nfsa Hazekiah al kasuru murtafaat wa mazabih tuo wa wedi awamir le Yahuza ma Urshelim, 'Itakum bi abudu fi mazbah wahid, wa itakum bi gedimu zabaeih takum fugu'? ¹³ Itakum ma arufu haja al ana wa judud tai amulu le kulu shaab ta ard? Saei kan rabunat ta nas hawil anina kulu ageder angizu ard tumon min guwa tai? ¹⁴ Min nus kulu rabunat ta umamal judud tai demiro de, kan rabuna al ageder angizu nas tuo min iden tai? Saei Ilah takum de bi ageder angizu itakum min iden tai? ¹⁵ Hasa matakum sibu Hazekiah kabasu itakum wele agana itakum be teriga de. Matakum sedek huwo, lanu mafi ayi rabuna wele ilah ta ayi shaab wele mamalaka al kan ageder angizu nas tuo min iden tai, wele min iden ta judud tai. Kef biga Ialah takum bi angizu itakum min iden tai?'' ¹⁶ Kadamin ta Sanharib kaman wunuso ketir did Yahwah Ilah wa did kadam tuo Hazekiah. ¹⁷ Kaman Sanharib katibu rasseil ashan bi alisu Yahwah, Ilah ta Israel, wa bi wunuso did huwo. Huwo kelim, ''Ze ma rabunat ta nas tanin ma ageder angizu nas tumon min iden tai, Ilah ta Hazekiah kaman ma bi ageder angizu nas tuo min iden tai.'' ¹⁸ Umon kure be luga ta Ibranin le nas ta Urshelim al kan fi ras hetta, ashan bi kuofu umon, ashan umon bi gubudu medina. ¹⁹ Umon wunuso an Ilah ta Israel ze ma umon wunuso an rabunat ta shaab tanin fi ard, al amulu be idenat ta insan. ²⁰ Melik Hazekiah ma nebi Ashaya jena ta Amos, seli fi kalam de wa huwo kueri le sama. ²¹ Yahwah rasulu malaika, al ja katulu rujal ta harib wa ruwasa wa nas al musulin tumon fi mahal tumo. Yala Sinharib rija fi beled tuo be fadiya fi usa tuo. Zaman huwo ruwa juwa bet ta ilah tuo, baad min iyal tuo katulu huwo be sef. ²² Be teriga de Yahwah kalisu Hazekiah ma sukan ta Urshelim min iden ta Sinharib, melik ta Ashur, wa min iden ta nas tanin de, wa wedi le umon raha min kulu tijah. ²³ Ketirin kan bi jibu zabaeih le Yahwah fi Urshelim, wa haday al gali le melik ta Yahuza, ashan huwo kan murfu fi ena ta umam kulu. ²⁴ Fi ayamat dak Hazekiah kan ayan ayan ta mutu. Huwo seli le Yahwah, al wunuso le huwo wa wedi le huwo alama inu huwo ligu shifa. ²⁵ Lakin Hazekiah ma dafa Yahwah le musada al amulu le huwo, lanu geliba tuo kan kebir. Yala zalan nezil fugu huwo wa Yahuza wa Urshelim. ²⁶ Fi nihaya tuo Hazekiah rija nefsa tuo min takubur ta geliba tuo, huwo wa sukan ta Urshelim, ashan zalan ta Yahwah ma bi nezil fugu umon fi ayamat Hazekiah. ²⁷ Hazekiah indu ginna ketir wa karama. Huwo amulu le huwo makazin ta fidda, dahab hujar al kerim, wa hajat al tamam, wa afashat ta kulu hajat al mugayam. ²⁸ Wa kaman huwo indu makazin ta hinta wa mistar wa zeat wa zatraib ta kulu anwa ta mawashi. Wa huwo amulu le badun tuo abraj wa mawashi ketir fi Hazair tumon. ²⁹ Wa kaman huwo abinun le huwo mudon kubarin wa mumtalakat min mawashi wa bagarat ketir, lanu Allah wedi le huwo ginna ketir. ³⁰ De nfsa Hazekiah al kan gufulu abiyar ta moyo ta Jihon al kan fuk, wa kutu umon jere be tihit wata safa garib ta medina ta Dauod. Hazekiah naja fi mashari tuo kulu. ³¹ Kaman fi muduo ta ruwasa ta Babil, al rsulu le huwo ashan bi asalu suwal be kusus mujiza al amulu fi ard, Allah rafa huwo le nefsa tuo, ashan bi imtehin huwo, wa ashan bi arufu al fi geliba tuo. ³² Bagi hajat ta Hazekiah, sawa bi hajat al huwo amulu be amana fi waad tuo, kulu katibu fi kitab ta nebi Ashaya jena ta Amos, wa fi kuitub ta muluk ta Israel wa Yahuza. ³³ Hazekiah num wara judud tuo, wa umon dufunu huwo fi magabir ta iyal ta Dauod. Yahuza kulu ma sukan ta Urshelim akrimu huwo fi mutu tuo. Manassa jena tuo biga melik fi mahal tuo.