¹ Hasa wekit hajat dfe kulu kalasu, kulu shaab Israel al kan fi hinak ruwa le mudon ta Yahuza wa kasuru kasuru sukerin amida ta hujar wa umon gata sawari tumon, wa kasuru murtafaat wa mazabih al fi Yahuza kulu wa Benyamin, wa fi Afraim wa Manassa, lahadi umon demiro hajat de kulu. Yala shaab Israel kulu rija ayi zol le mahal fi medina tuo. ² Hazekiah gesimu furuk ta kahana hasab mujmuwat tumon, ayi zol be shukul tuo, kulu kahana wa Lawin. Huwo wedi umon kede gedimu muhragat wa zebiha ta salama, ashan bi amuli kidima, wa be wedi shukur, wa bi sabihu fi kasma bab ta bet ta Yahwah. ³ Huwo kaman wedi nisba ta melik min min maal tuo le muhragat ta sabah wa assia, wa muhraga t ta ayamat ta sebit, wa shuhur wa mawasim ze kan katibu fi kitab ta ganoon ta Mosa. ⁴ Kaman huwo wedi awamir le delin al bi geni fi Urshelim kede wedi nisba ta kahana wa Lawin, ashan umon bi rekiz fi teii ganoon ta Yahwah. ⁵ Ze awamir de rsulu bara guwam, shaab Israel wedi awel simar tumon be geliba ta atta, kumur jedid, zaet, assel wa min kulu hasat tumon ta mahal zara. Umon jibu Ushur ta ayi haja, al kan be adad kebir. ⁶ Shaab Israel wa Yahuza al bi geni fi mudon ta Yahuza kaman jibu Ushur ta bagarat wa kurfan, wa ushur ta hajat al mukadas al kasisu le Yahwah Ilah tumon, umon limu haja de kulu fi kuom kuom. ⁷ De kan fi shahar nimra talata wekit umon bada limu musahamat tumon de kuom kuom, wa umon kalasu fi shahar nimra saba. ⁸ Wekit Hazekiah ma ruwasa ja wa ayinu keman de, umon bariku Yahwah wa shaab tuo Israel. ⁹ Yala Hazekiah asalu kahana wa Lawin be kusus hajat ala limu de. ¹⁰ Azariah rais ta kahana, ta bet Sadok, juwabu huwo wa kelim, ''Min ma shaab bada jibu hadaya fi bet ta Yahwah, anina akulu wa indu kifaya, wa indu bagi ketir al fadulu, lanu Yahwah bariku shaab tuo. Haja al fadulu de adad kebir yao hini.'' ¹¹ Yala Hazekiah wedi awamir kede jahizu makazin fi bet ta Yahwah. ¹² Yala be amana umon jibu hadaya, wa ushur wa hajat al tabi le Yahwah. Wa Konaniah yao kan rais al musul min umon ma aku tuo Shemei al ja be wara tuo. ¹³ Yahiel, wa Azaziah, wa Nahas, Asaeil, Yarmus, wa Yuzabad, Eliel, Yamaskiah, Mahas wa Banaya umon kan musulin tihit iden ta Konaniah ma Shemei aku tuo, be iktiar ta Hazekiah al melik wa Azariha rais al musul min bet ta Allah. ¹⁴ Gori jena ta Yamnna al min Lawin, zol al bi angulu hajat fi bab ta sherik, huwo kan musul min tabaruwat al bi jibu le Allah, wa musul min gesimu ta hadaya le Yahwah wa hadiya ta kuds al akdas. ¹⁵ Tihit musulia tuo kan fi Eden, Miniamin, Yahsu, Shemaiah, Amriah, wa Shakebiah, fi mudon ta kahana. Ruwasa la bi ishtakal bara, ashan bi wedi hadaya de le akuwana tumon mujmuwa mujmuwa, le itnin al muhim wa ma muhim. ¹⁶ Kaman umon wedi le awulad al ta talata sena le gidam, al katibu umon le judud tumon, al dakalu fi bet ta Yahwah, be hasab nizam ta kulu yom, ashan bi amulu shukul tumon fi mujumuwat tumon. ¹⁷ Umon wazaau le kahana hasab asma ta judud tumon, wa be nefsa teriga le Lawin min umor ishirin sena wa ziada, be hasab shukul tumon wa mujumuwat tumon. ¹⁸ Sawa ma sukerin tumon, nusuwan tumon, awulad tumon, wa banat tumon, fi mujtama kulu, lanu umon kan aminin fi hafisu nufus tumon mukadasin. ¹⁹ Lanu kahana iyal ta Haron, al kan fi mahal zira tumon la tabei le mudon tumon, aw fi ayi medina, kan fi rujal al musulin be asma tumon ashan bi wedi nisba le kulu zol al rajil fi nus ta kahana, wa le kulu delin al sejilu ma judud tumon fi nus ta Lawin. ²⁰ Hazekiah amulu kida fi Yahuza kulu. Huwo kalasu haja al kan kues, wa sah, wa amin fi gidam ta Yahwah, Ilah tuo. ²¹ Fi kulu mushru al huwo bada fi kidima ta bet ta Allah, ganoon, wa wasaya, ashan bi fetishu Ilah tuo, huwo amulu be geliba tuo kulu, wa huwo najah.