¹ Manassa kan umor tuo itnashar sena wekit huwo bada hakimu; huwo hakimu kamsa wa kamsin sena fi Urshelim. ² Huwo amulu sher fi ena ta Yahwah hasab wasaka ta umam al Yahwah trudu min gidam ta shaab Israel. ³ Lanu huwo abinu murtafaat al abu tuo Hazekiah kasuru tihit, wa huwo abinu mzabih le Baaalim, wa amulu sawari wa huwo degir le nujum ta sama kulu wa abudu umon. ⁴ Manassa abinu mazbih fi bet ta Yahwah, ragmi inu Yahwah kelim, ''Fi Urshelim yao isim tai bikun lel abad.'' ⁵ Huwo abinu mazabih le kulu nujum ta sama fi bet ta Yahwah. ⁶ Wa huwo mururu iyal tuo fi nar fi wadi Hinnom. Wa istamil sihir, wa Aaf wa jan, wa huwo kan bi shwiru delin al bi wunuso ma maiteen wa ma arwah. Manassa amulu sher ketir gidam ta Yahwah, wa kutu huwo tala zalan. ⁷ Wa shikil ta timsal al huwo amulu de, huwo kutu fi bet ta Allah. Fi bet al Allah kelim le Dauod ma Siliman jena tuo; ''Fi bet de wa fi Urshelim, yao ana iktar ashan isim tai be geni fugu lel abad. ⁸ Ana ma bi hariku shaab Israel tani mara min bara min ard al Ana wedi le judud tumon, kan umon bi hafisu wesiya ala Ana wesi umon, bi tabi kulu ganoon, wa nuzum al Ana wedi le umon le Mosa.'' ⁹ Manassa sibu Yahuza wa kulu sukan ta Urshelim amulu sher hata aktar min umam al Yahwah demiro min gidam ta shaab Israel. ¹⁰ Yahwah wunuso le Mosa, wa le shaab tuo, lakin umon ma kutu bala. ¹¹ Yahwah jibu le umon ruwasa ta jesh ta melik Ashur, al shilu Manassa be janazir, wa rubutu huwo be hadid kubarin, wa shilu huwo fi Babil. ¹² Wekit daigu huwo, huwo kure le Yahwah, Ilah tuo, wa rija nefsa tuo tihit gidam ta Ilah ta judud tuo. ¹³ Huwo seli le huwo; wa huwo asado Allah, wa Allah asuma asado tuo wa rija huwo wara fi Urshelim, le mamlaka tuo. Yala Manassa aruf gali Yahwah Ilah. ¹⁴ Baat kida huwo abinu hush be bara ta medina ta Dauod, be sfa ta garib ta wadi Jihon, le madkal ta bab ta Samaga. Huwo lifu murtafa de be hush de wa arfa hush de fuk shedid. Huwo kutu ruwasa al shuja fi kulu mudon ta Yahuza al kubarin. ¹⁵ Huwo wasa kulu alihat al garib, asnam kulu bara min bet ta Yahwah, wa kulu mazbih al huwo abinu fi ras jebel ta bet ta Yahwah wa fi Urshelim, wa jada umon bara min medina. ¹⁶ Huwo abinu mazbah ta Yahwah min jedid wa gedim fugu zabaeih ta salama zabaeih ta shukur; huwo weri kede Yahuza amulu kidima ta Yahwah, Ilah Israel. ¹⁷ Ragmi inu shaab lis bi gedimu fi murtafaat, lakin le Yahwah, Ilah tumon. ¹⁸ Bagi hajat ta Manassa, salawat tuo le Ilah tuo, Raein al wunuso le huwo be isim ta Yahwah, Ilah ta Isarel, katibu ma hajat al melik ta Israel amulu. ¹⁹ Fi tarik ta salawat tuo, wa kef salawat de hariku Allah. Wa kaman katiay wa sher al huwo amulu kulu muktib, wa mahalat al huwo abinu fugu murtafaat wa sawari wa timsalat gubal huwo ma rija nefsa tuo gidam ta Allah, kulu katibu fi akbar ta Raein. ²⁰ Manassa num ma judud tuo, wa umon dufunu huwo fi bet tuo. Jena tuo Amon, yao biga melik fi mahal tuo. ²¹ Amon kan indu itnin wa isherin sena wekit huwo bada hakimu; huwo hakimu itnin sena fi Urshelim. ²² Huwo amulu sher fi ena ta Yahwah, ze ma abu tuo Manassa amulu, wa huwo abudu umon. ²³ Huwo ma rija nefsa tuo gidam ta Yahwah, ze Manassa abu tuo amulu. Lakin Amon amulu sher ketir wa ketir. ²⁴ Abeed tuo amulu fitna did huwo wa katulu huwo fi bet tuo. ²⁵ Lakin nas ta ard katulu delin al amulu fitna did melik Amon, wa umon kutu Yushia jena tuo fi mahal tuo.