¹ Zaman Samuel kan biga kebir, uwo amulu awulat tao guda ala Israil. ² Al isim ta bikir tao kan Yuel, wa al isim ta welet tao nimra itniin kan abijah. Umon kan guda fi Beersheba. ³ Awulat tao kan ma rua fi sikat tao, lakin jere wara maksab mamohtaram. Umon bi silu rasawi wa karabu adala. ⁴ Biga kulu al sihuk ta Israil limu sawa wa ja le Samuel fi Ramah. ⁵ Umon kelim le uwo, ''Ayinu, ita kalas kebir, wa awulat taki ma bi rua fi sikat taki. Ainu le nina melik le hukumu nina ze kulu al umam.'' ⁶ Lakin de sibu Samuel ma moksut zaman umon kelim, ''wodi le nina melik le hukumu nina.'' Biga Samuel sala le Yahuah. ⁷ Yahuah kelim le Samuel, ''Tii al sort ta al nas fi ayihaja umon kelim le ita; lianu umon ma aba ita, lakin umon kalas aba ana min geni melik tomon. ⁸ Umon biga amulu hasa al nefu ze umon amalu mini al yom Ana jibu umon bara min Masir, abau ana, wa kadimu aliha tanin, wa kida umon kaman bi amulu le ita. ⁹ Hasa asma le umon; lakin anziru umon besida wa kede umon aruf al teriga al melik bi hukumu fogo umon.'' ¹⁰ Kida Samuel wori kulu al kilimat ta Yahuah le al nas al kan asalu le melik. ¹¹ Uwo kelim, ''De bi kun al mumarasat ta al melik al bi aslit fogo itakum. Uwo bi silu awulwt takum wa kutu umon le markibat tao wa le bikun rujal hasasin tao, wa le jere gidam markibat tao. ¹² Uwo bi ainu le nefsatao kiyadat ta alaf wa kiyadat ta kamsinat. Uwo bi amulu juzu le zarau wata tao, juzu bi hasidu hasat tao, wa juzu le salau asiliha tao ta harb/sakila wa al alat le markibat tao. ¹³ Uwo kaman bi silu banat takum le salau ariah, tabikat, wa kabisat. ¹⁴ Uwo bi silu al be akasan ta aradi takum, janain takum, wa janain zetun takum, wa wodi umon le kudam tao. ¹⁵ Uwo bi silu asara fi mia ta dura takum wa ta janain takum wa wodi le muwazifin wa kudam tao. ¹⁶ Uwo bi silu kudam al rujal wa al nusuwan takum wa al aksan ta abgar takum wa hamir takum; uwo bi kutu umon kulu le sokol le uwo. ¹⁷ Uwo bi silu asarat ta bahaim takum, wa itakum bi geni kadamin tao. ¹⁸ Biga fogo yom dak itakum bi kore ashan al melik takum al itakum kalas iktar le nufustakum; lakin Yahuah ma bi juabu itakum fogo yom dak.'' ¹⁹ Lakin al nas aba le asma le Samuel ; umon kelim, ''La! Inak lazim melik bi kun aala le nina ²⁰ kida ashan nina bikun ze kulu al umam tanin, wa kida melik ta nina bi hukumu nina wa rua bara gidam nina wa sakila/harib fi maarik tanina.'' ²¹ Zaman Samuel asma kulu al kilimat ta al nas uwo keriru umon fi al adanat ta Yahuah. ²² Yahuah kelim le Samuel, ''Tii sort tomon wa amulu wahidtani le bi kun melik le umon.'' Biga Samuel kelim le al rujal ta Israil, ''Ayi rajil lazim kede rua le medina tao.''