¹ Zaman Daud wa rijal tou kan ja le Ziklag fi yom al talit, al Amalekite amulu hujum fogo Negev wa fogo Ziklag. Huwomon hujumu Ziklag, haragu, ² wa amsuku nasawin wa kulu zol al fi fogo, soker wa kebir. Huwomon ma katulu zol, lakin shilu huwomon beid ze huwomon ruwa fi sika toumon. ³ Zaman Daud wa rijal tou ja le medina, kan haragu wa nasawin toumon, iyal toumon , wa banat toumon kan shilu asir. ⁴ Yalla Daud wa nas al kan ma huwo arfu sawt tumon wa kore hata biga ma indu guwa ketir le kore. ⁵ Nasawin ta Daud al etnin shilu huwomon asir, Ahinoam al Jazreelite mara wa Abigail mara ta Nabal al Carmelite. ⁶ Daud kan zalan, leanu nas kan bi wonusu an kede logu huwo ma jajar, leanu kulu nas kan marara fi roho, aye zol ma jena tou wa biniya tou; lakin Daud guwi nefsa tou fogo Yahwa, Allah tou. ⁷ Daud kelimu le Abiathar jena ta Ahimelech, al kahin, ''' ana bi asalu inta , jibu al gumash hini le ana.'' Abiathar jibu gumash le Daud. ⁸ Daud seli le Yahwa le ittijah, gali ''Kn ana turuju wara guwwat, hal ana bi futu huwomon?'' Yahwa juwbu huwo ''Turuju, leanu inta bi futu huwmon, wa inta bi rija kulu hajat. 'wa inta bi rija kulu hajat.'' ⁹ Fa Daud ruwa, huwo wa sutumia rujal al kan ma huwo, huwmon ja le wadi al Besor, al del kan sibu wara wa huwomon geni. ¹⁰ Lakin Daud istemir turuju, huwo wa arba rujal; miteen geni wara, al kan huwomon daeif al huwomon ma bi agder ruwa fok le wadi al Besor. ¹¹ Huwomon ligo Mesiri fi mahal zara wa jibu huwo le Daud; huwomon wodi le huwo rigif, wa huwo akulu; huwomon wodi le huwo moyo le shiraab; ¹² wa huwomon wodi le huwo qita `kayka ta tin wa etnin kutla ta zebeb. Zaman huwo akulu, huwo ligu wuwa tani, leanu huwo kan ma akulu rigif wele shiraab aye moyo le talata ayams w tltlta. ¹³ Daud kelimu le huwo, ''Inta tabe le munu? Inta ja min wen?'' Huwo kelimu, ''Ana shab rajil min Mesi kadam ta Amalekite; seid tai sibu ana leanu talata ayam al futu ana waga ayan. ¹⁴ Anina amulu huju fogo al Negev ta Kerethites, wa haja al tabe le Yahudiya, wa al Negev ta Caleb, wa anina haragu Ziklag. '' ¹⁵ Daud kelimu le huwo, Hal inta bi jibu ana le hafula ta hujum?'' Al Masiri kelimu, '''halifu le ana bi Allah inu inta ma bi katulu ana aw khun ana fi yadan ta seid tai, wa Ana bi jibu inta fi hafla hujum.'' ¹⁶ Zaman al Masiri nezil Daud tihit, al muhajimiin shetetu fi kuu al ard, bi akulu wa asharabu wa bi ragus leanu kulu ghanima huwomon shilu bara in al ard ta Philistinin wa min al ard ta Yahuiya. ¹⁷ Daud hujumu huwomon min al sabah le ashiya ta yom tani. ma zol min huwmon naja ila urbumia rujal la arkabu fi jamal wa jere. ¹⁸ Daud rija kulu al kan Amalekites shilu; wa Daud anqizu etnin nasawin. ¹⁹ ma fi haja al wodoro, wele soker aw kebir, wele iyal aw banat, wele ghanima, aw aye haja al muhajimin shilu le nefsa toumon.Daud rija wara kulu haja. ²⁰ Daud shilu kulu asrab wa al qutean, al rijal shilu gidam ta bagi mashia. Huwomon kelimu, ''De ghanima ta Daud. ²¹ Daud ja le miteen rujal al kan daeifin ashan bi ja wara huwo, del nas tanin sibu huwomon geni fi wadi Besor. Rujal del ruwa gedam ashan bi gabil Daud wa nas al kan ma huwo. Zaman Daud ja le nas del, huwo selimu huwomon. ²² Yalla kulu rujal al sharir wa al ma indu qayima fi nus ta del al ruwa ma Daud gal, ''Leanu rujal del ma ruwa ma anina, anina ma bi wodi le huwomon aye min ghanima al anina istelimu. , lakin kulu zol bi kede shilu mara tou wa iyal tou wa kede ruwa.'' ²³ Yalla Daud kelimu, ''intakum ma bi amulu ze de, akuwana tai, ma haja al Yahwa wodi le anina. Huwo hafizu wa wodi fi yadan tanina al muhajimin al huwomon ja ded anina. ²⁴ Munu bi asuma le intakum fi mushkila de? Leanu ze ma al gesma le kulu zol al ruwa fi harib, fa kaman al gesma bi kun le kulu zol al bi geni jambo afashat; huwomon bi gesimu wa gesimu sawa. ²⁵ ''Huwo kan ze de min yom dak le yom ta alela, leanu Daud amulu huwo qanuun wa karar le Israel. ²⁶ Zaman Daud ja le Ziklag, huwo rasulu bad min ghanima le shuyuh ta Yahudiya, le asdiqa, gal, Ayenu, yau le intakum min ghanima min aeda ta Yahwa.'' ²⁷ Huwo kaman rasulu tanin le shuyuk al kan fi Bethel, wa le del al kan fi Ramoth ta junub, wa le del al kan fi Jattir, ²⁸ wa le del alkan fi Aroer, wa le del al kan fi Siphmoth, wa le del al kan fi Eshtemoa. ²⁹ Huwo kaman rasulu tanin le shuyuk al kan fi Rakal, wa le del al kan fi medina ta Jerahmeelites, wa le del al kan fi medina ta Kenites, ³⁰ wa le del al kan fi Hormak, wa le del al kan fi Bor Ashan, wa le del al kan fi Athak, ³¹ wa le del al kan fi Hebron, wa le kulu mahalat al Daud bi nefsu wa rijal tou bi ruwa fogo dayiman.