¹ Saul kan teletin senawat fi umur zaman uwo bada le hukum; zaman uwo kan hakam arbein senawat ala Israil, ² uwo iktar talata alf rijal ta Israil. Itniin alf kan ma uwo fi Michmash wa fi al jebel beled ta Bethel, zema alf kan ma Jonatahan fi Gibeah ta Benjamin. Al bagi ta al asakir uwo rasal bet, ayi rajil le kema tao. ³ Jonathan hazam/gobudu al muasker ta al Phalastinien al kan fi Geba wa al Phalastinen sima anu. Biga Saul afuku al buk/trumbeta hawuli kulu al art, kelim, ''Kede al Yahudin asma. '' ⁴ Kulu Israil sima gali Saul kan hazam/gobudu al muasker ta al Phalastinen, wa kaman gali Israil kan biga riha afin le al Phalastinen. Biga al asakir kan jamao sawa le indimam ma Saul fi Gilgal. ⁵ Al Phalastinen limu sawa le sakila dit Israil, ma talata alf kawarlo, sita alf rijal le sugu al kawarlo, wa jes ketir ze al ramla fogo al taraf bahar. Umon ja fok wa tamarakas fi Michmash, serik ta Beth Aven. ⁶ Zaman al rijal ta Israil saf gali umon kan fi muskila lianu al nas kan kaifin, al nas dusu fi kuhuf/gurgur, fi al kanadik, fi hujar, fi abiar, wa fi hufar. ⁷ Juzu ta al Ebranien masa beyit la Ordon le al art ta Gad wa Gilead. Lakin Saul kan lisa fi Gilgal, wa kulu al nas rua wara uwo kaifin/bi rogus. ⁸ Uwo istanu saba ayom, le al zaman Samuel kan kutu. Lakin Samuel ma ja le Gilgal, wa al nas kan setetu min Saul. ⁹ Saul kelim, ''Jibu leana al tekdima mahruk wa al tekdima salam.'' Niga uwo gedimu al tekdima mahruk. ¹⁰ Ze guam ze uwo kalasu gedimu al tekdimat mahruk Samuel wosulu. Saul masa bara le gabilu uwo wa le selimu uwo. ¹¹ Biga Samuel kelim, ''Sunu kalas ita amulu?'' Saul jaubu, ''Zaman Ana saf gali al nas kan bisibu ana, wa gal ita ma ja fi zaman al kutu, wa gali al Phalastinen kalas limu fi Michmash, ¹² Ana kelim, 'Hasa al Phalastinen bi ja /nezil tehet dit ana fi Gilgal, wa Ana kalas ma ayinu al rahma/rida ta Yahuah.' Kida Ana asuru nefsatai le gedim al tekdima mahruk.'' ¹³ Biga Samuel kelim le Saul, ''Ita kalas amulu jahala/balada. Ita kalas ma hafis al amur ta Yahuah Allah taki al uwo wodi ita. Lianu biga Yahuah momkin bi asisu hukum taki ala Israil lelabat. ¹⁴ Lakin hasa hukum taki ma bi istemir. Yahuah kalas jahisu bara rajil al biga wara gelba tao nefau, wa Yahuah kalas iktaru uwo le bi kun amir fogo nas tao, ashan ita kalas ma tii sunu uwo ammiru ita.'' ¹⁵ Biga Samuel gum wa masa fok min Gilgal le Gibeah ta Benjamin. Biga Saul idu al nas al kan fi ma uwo, umon sutumia rijal. ¹⁶ Saul, welet tao Yonathan, wa al nas al kan mojudin ma umon, geni fi Geba ta Benjamin. Lakin al Phalastinen tamarkas fi Michmash. ¹⁷ Nas nyakama ja min al kema ta al Phalastinen fi talata majami. Wahid mujmu gilibu nahuwa Ophrah, le al art ta Shual. ¹⁸ Mujmu tani rua tija Beth Horon, wa mujmu tani masa nahuwat al hudut al belaks al wadi ta Zeboyim le tija al sahara. ¹⁹ Mafi hadaat bi agder ligou abri kulu ta Iarail, ashan al Phalastinen kelim, ''lumakida al Ebrein/Yahudien biagder amulu siuf au hirab le nufustomon.'' ²⁰ Lakin kulu al rijal ta Israil itawadu le rua tehet le al Phalastinen, fardan le seninu kasma molodo tao, hafara tao, balara tao, wa serser. ²¹ Al taman kan itniin min talata ta gurus le seninu balatat wa le sabitu/itadilu al mailan. ²² Bekida fogo al yom ta sakila, inak biga mafi siuf au hirab mojud fi idenat ta ayi asakir al kan ma Saul wa Yonathan; bes Saul wa welet tao Yonathan indu umon. ²³ Al mantika ta al Phalastinen masa bara le al memar ta Michmash.