¹ Biga Nahash al Ammonite masa wa amulu abus le Jabesh Gilead. Kulu al ujal ta Jabesh kelim le Nahash, ''Amulu tifagia/ahat ma nina, wa nina bi kadimu ita.'' ² Nahash al Ammonite juabu, ''Be surut de Ana bi amulu tifagia ma ita, al Ana agila bara kulu uyun ta yomin takum, wa fi teriga zede jibu fadia le kulu Israil.'' ³ Biga al shiuk ta Jabesh juabu le uwo, ''Sibu nina barau le saba ayom, kida kida nina bi rasulu murasilin le kulu al mantika ta Israil. Biga, kan inak biga mafi wahid le angisu/kalisu nina, nina bi istasam le ita.'' ⁴ Al murasilin ja le Gibeah, Saul bi geni fogo, wa wori al nas sunu kan kan hasal. Kulu al nas kore sedid. ⁵ Hasa Saul kan bi rua wara al abgar bara min al mazra. Saul kelim, ''Sunu yau galat/batal ma al nas al umon bi kore?'' Umon wori le Saul sunu al rijal ta Jabesh kan kelim. ⁶ Zaman Saul asma sunu umon kelim, al Roho ta Allah nezil fogo uwo, wa uwo kan biga zalan. ⁷ Uwo silu nir ta teiran, gata umon le gitaat, wa rasal umon hawuli kulu al mantika ta Israil ma al murasilin. Uwo kelim, ''Ayizol al ma ja wara Saul wa wara Samuel, de yau sunu bi amulu le abgar tao.'' Biga al roub/kafu ta Yahuah waga fogo al nas, wa umon tala bara sawa ze wahid zol. ⁸ Zaman uwo jamao umon fi Bezek, al nas ta Israil kan tultumia alf, wa al rijal ta Judah teletin alf. ⁹ Umon kelim le al murasilin al ja , ''Kede Itakum kelim al rijal ta Jabesh Gilead, 'Bukura, be al zaman al semis biga sokon, itakum biga bi ankisu.''' Kida al murasilin masa wa wori al rijal ta Jabesh, wa umon kan moksutin. ¹⁰ Biga al rijal ta Jabesh kelim le Nahash, ''Bukura nina bi istelim le itakum, wa itakum bi amulu le nina ayisunu itakum ayinu kuwes le itakum.'' ¹¹ Al yom badu Saul kutu al nas fi talata mojmuat. Umon ja fijua wasat ta al kema asna al haras sabah, wa umon hajamu wa intasar le Ammonites lakadi al sakana ta al yom. Delin al fadulu hai kan setetu, kida wele itniin tomon ma sibu limu sawa. ¹² Biga al nas kelim le Samuel, ''Munu kan uwo al kelim, Kede Saul yakum ala nina?' Jibu al rijal, kida nina bi katulu umon alela.'' ¹³ Lakin Saul kelim, ''La wahid lazim bi katulu alela, ashan alela Yahuah kan ankisu Israil.'' ¹⁴ Biga Samuel kelim le al nas, ''Taal, kede nina rua le Gilgal wa jedidu al mamlaka inak.'' ¹⁵ Kida kulu al nas masa le Gilgal wa amulu Saul melik gidam Yahuah fi Gilgal. Inak umon gedimu tekdimat zebihat salam gidam Yahuah, wa Saul wa kulu al rijal ta Israil farhanin sedit.