¹ Yala Suliman limu shiuk ta Israel,kulu raas ta gebail,wa kiadad ta Usar ta nas ta Israel , fi gidam towo fi Orshelim, asahan bi jibu Tabut al ahat ta Yahweh min medina ta Daud ,de fi zehiun. ² Kulu rijal ta Israel lama fi gidam ta Suliman fi eid ,fi shahar Ethanim,al huwo shahar al sabea. ³ kulu shiuk ta Israel ja, wa Gusus arfau al Tabut. ⁴ humon jibu al Tabut alahat ta Yahweh,al kema ta ijtima, wa kulu mofrushat al fil kema. Al Gusus wa lawiin humon jabu hajat de. ⁵ Melik Suliman wa kulu mujtama ta Israel ja sawa gidam Tabut, gedimu zebiha korfan wa abgar al mabi akder hasibu. ⁶ Al gusus jibu al tabut al ahat ta Yahweh fi mahal towo,fi dakil gurfa ta bed,fi mahal almukadas kaalis,tehed ajniha ta Malaika. ⁷ Fa almalaikaat ferishu ajniha tomon fi mahal ta Tabut al ahad,wa humon kaati al Tabut wa amida algi arfau mau. ⁸ al amida towo de tuwal lahaidi nihaya towo gi ainu min gidam ta gurfa ta mahal al mukadas,lakin ma bi ainu min bara. Humon hinak lahaidi yom allela. ⁹ hinak kan mafis haja fi Tabut al Ahat bes ethnen hujar al musate al Musa kutu kan fi Horeb,wokit Yahweh amulu ahad ma nas ta Israel wokit humon tala bara min Masir. ¹⁰ huja fi wokit Gusus ja humon tala min makan al mukadas, al sihab mala Haikal ta Yahweh. ¹¹ Gusus ma akder akdim ashan sihab,lianau mejid ta Yahweh mala bed. ¹² Yala Suliman kelim, ¹³ lakin ana abinu le ita “Yahweh huwo kelim huwo be ish fi duluma al tegil, mahal albi istehik,al ita be ish fogo lel abad.” ¹⁴ yala al melik gelibu wara wa bariku kulu alnas mujtama ta Israel, nefsa zaman mujatama kan wagifin. ¹⁵ Huwo gal, “ keli Yahweh, Allah ta Israel, mejidu , al kelim le abu tai Daud, wa huwo kemilu waad ma yeden towo ,gal, ¹⁶ min yom al ana jibu nas tai Israel bara min Masir, Ana ma iktar aiya medina bara min gabail ta Israel ashan ana bi abinu bed ,ashan isim tai bikun hinak .fi de, ana iktar Daud ashan bi hakimu itakum nas tai Israel. ¹⁷ Hasa huwo fi gelib ta Daud abui ashan abinu bed le Yahweh ,Allah ta Israel ¹⁸ lakin kelim le Daud abui,de fi gelba taki ashan abinu bed fi isim tai,ita amulu kuwes ashan fi gelba taki . ¹⁹ fi de kulu, ita mabi abinu bed; bel ax ,weled taki ,wahid albi weledu min silsila taki ,yau bi abinu bed fi isim tai. ²⁰ Yahweh amulu kelima al huwo kelim , fa ana gum fi mahal ta abu tai Daud, wa ana geni fi kursi ta Israel ,ze Yahweh waadu.Ana bana bed fi isim ta Yahweh, Allah ta Israel. ²¹ Ana amulu mahal le Tabut hinak, al huwo yau amina ta Yahweh, al huwo amulu ma Abuhat tena wokit hu jibu humon bara min Masir.” ²² Suliman wogif gidam masbah ta Yahweh, gidam mujtama ta Israel ,wa fatah yeden towo le samawat ²³ Huwo gal, “ Yahweh, Allah ta Israel ,mafi Allah tani ze ita fi samawat wa tehed hina fi ardi,al bi hafisu ahad ma amana ma kadamiin taki al gi douru gidam ita ma kulu gelba, ²⁴ inta al hafisu ma kadam taki Daud abui,al ita waadu. Naam ita kelimu ma kasma taki wa kemilu ma yeden taki ,ze huwo allela. ²⁵ Hasa yala, Yahweh, Allah ta Israel amulu al ita waadu le kadam taki Daud abui, wokit ita kelim ,” Ita ma bi fashil ashan indu rajil fi einak ashan geni fi kursi ta Israel ,iza kan ajial taki bi douru ma hazir gidam ana,ze ita douru gidam tai, ²⁶ yala hasa,Allah ta Israel keli kelima taki akidu ,al ita kelim le kadam taki Daud abui. ²⁷ Lakin hal Allah bi ish fi ardi?Shuf , al kulu ardia wa samawiat benefsu ma bi shilak – godur shunu al Haikal al ana abinu! ²⁸ fi de iktaramu salawat de al kadam taki wa ma talabat al besit ,Yahweh Allah tai; asuma le kore wa salawat al kadam taki seli allela. ²⁹ Keli eina taki geni moftu le Haikal de lel wa nahar, le mahal al ita kelim , isim tai wa wujud tai bikun hinak- ashan bi asuma salawat al kadam taki bi seli fi mahal de. ³⁰ yala asuma le talab al besid ta kadam taki wa ta nas taki Israel wokit ena bi seli fi mahal de. Naam, asuma min mahal de al ita aish ,min samawat; wa wokit ita asuma ,afi. ³¹ iza rajil amulu katiya did jeran towo wa muktaj ashan halifu, wa iza huwo ja ashan halifu gidam ita fi masba fi bed de, ³² asuma min samawat wa amulu. Hukumu kadamiin taki demiru al sharir wa jibu shunu al huwo amulu fi raasu .karar al ma indu zaam ma galtan wa wodi le huwo la hasap haak. ³³ kan nas taki Israel gelibu ma adu ashan humon amulu katiya did ita,iza kan humon rija wara ,tub fi isim taki ,seli,wa fetish wusa taki fi Haikal de. ³⁴ arjuk asuma min samawat wa afi al katiya ta nas taki Israel; jibu humon wara le ardi al ita wodi le judud tomon. ³⁵ wokit samawat mokful wa mafi matara ashan nas amulu katiya did ita –iza kan humon seli fi mahal de ,tubfi isim taki ,wa rijah min katiya tomon kan ita taabu humon. ³⁶ yala asuma min sama wa afi le kadamiin taki wan as ta Israel, wokit kan ita derisum al sika al sa al humon bi douru min fogo ,rasulu matar fi ardi ,al ita wodi le nas taki ze werasa. ³⁷ kan iza fi jaan shedid fi ardi, au iza kan amrad karap ,jarad ,dud ;au iza kana du hajim baab al medina fi ardi,au fi aiya min darbat au amrad – ³⁸ wa iza kan yala salawat dak wa talabat al besid amulu ma shaksi au ma kulu al nas Israel – aiya wahid arif al darba fi gelbu ze huwo bi arfa yedenu fi Haikal de. ³⁹ Biga asuma min Sama, al mahal al ita gi ish fogo, afi al amulu, wa wodi hadia le kulu zol le hasap amael towo; wa ita arufu gelbu,ashanita wa ita bes yau bi arif gulub ta aiya bashar. ⁴⁰ Amulu de ashan humon bi kafu ita fi kulu ayam ta maisha fi ardi al ita wodi le judud tena. ⁴¹ Ziyada fi de, kusus ashan ajanip alma taabi le nas taki Israel:kan huwo ja min beled al beid ashan isim taki – ⁴² fa humon bi asuma an isim taki al kebir, yeden taki al athim, wa kidfa taki al morfu –kan huwo ja ashan seli fi haikal de, ⁴³ yala arjuk asuma min sama, al mahal al ita aish,wa amulu aiya haj al ajnebi asalu minak. Amulu de ashan ashan kulu nas fi ardi bi arif isim taki wa kafu ita,ze nas taki Israel gi amulu. Amulu de ashan humon bi arif gal bed de ana banau fi isim taki ⁴⁴ Iza kan nas taki ruah fi harip did adu,be aiya no ta teriga inta bi rasulum, wa iza kan humon seli le inta,Yahweh gusad medina al ita iktar, wa gusad al bed al ana banau fi isim taki. ⁴⁵ Biga asuma min samawat le salawat wa talabat tomon,wa saidu fi mushkila. ⁴⁶ Iza kan humon amulu katiya,lianu mafi zol alma bi amulu katiya,wa iza kan ita zalan minum wa stelimu humon le adu,ashan al adu bi shilu asir harib min ardi,iza beid wala gerip. ⁴⁷ biga iza kan humon lahizu humon fi ardi al humon shilu fogo ,wa iza kan humon asalu maaruf min ita min ardi ta nas al amsuku humon iza kan humon kelim, ena amulu batal wa katiya. Ena amulu aklak albatal. ⁴⁸ iza kan humon rijah le ita ma kulu gelba wa ma kulu roho fi ardi ta adu tomon al amsuku humon,iza kan humon seli le ita ashan ardi tomon, al ita wodi le ajdad tomon,wa le medina al ita iktar, wa le bed al ana abinu fi isim taki. ⁴⁹ ya min sama, al mahal al ita aish,asuma le salawat tomon wa tilbat le musada,wa amulu al modus a le hum. ⁵⁰ afi le nas taki al amulu katiya did ita, wa kulu zunub al humon amulu did ita, wa amulu humon remzi muhaba gidam del al shilum masajin,wa wodi del al amsukum indu ramah fogum. ⁵¹ Humon nas taki wa warisa taki,al ita alagu min Masir ze fi nus ta furun al hadid gi haragu fogo. ⁵² Keli eina taki geni moftu fi talab al besid ta kadam taki wa talabat ta nas taki Israel, ashan asuma lom kan humon kore le ita. ⁵³ Fa ita ferigum min kulu nas ta alam ashan taabi le ita wa gabilu waad taki, ze bes ita ashra be wasad Musa kadam taki, wokit ita jibu abuhat tena bara min Masir, Rabuna Yahweh.” ⁵⁴ Yala huwo wokit kan Suliman kalasu seli kulu salawat de wa talabat le Yahweh,huwo gum fok min gidam masbah ta Yahweh,min dengiri ma rukuba wa yeden moftu le Samawat. ⁵⁵ Huwo wogif wa bariku kulu mujtama ta Israel fi sot aali ,gal, ⁵⁶ keli Yahweh mejidu, al wodi raha le nas ta Israel ,hafisu kulu waad towo,wele wahid sagit min kulu waad al kuwes ta Yahweh al huwo amulu ma Musa kadam towo. ⁵⁷ keli Allah tena kun mena, ze ma kan huwo ma ajdad tena, Keli huwo ma sibu ena au aba ena, ⁵⁸ ashan huwo bi jibu gulubna le hu.ashan ish fi sika towo wa hafisu wasaya towo wa gawanin towo,al huwo amiru ma abuhat tena. ⁵⁹ keli kelimaat al ana wonusu ,al ana asalu ramah ta Yahweh ,kun gerib ma Yahweh Allah tena fi nahar wa lel , asahan huwo bi saidu mushkila ta kadam towo wa mushkila ta nas towo Israel ze iktiyaj ta kulmayom; ⁶⁰ ashan kulu nas al fi ardi bi arif gal Yahweh,Huwo Allah, wa mafi Allah tani! ⁶¹ ashan kida keli gelba takum kun hagiga le Yahweh Allah tena, ashan douru fi gawaniin wa hafisu wasaya ze allele. ⁶² Biga Melik ma kulu Israel mau gedimu zabaye le Yahweh. ⁶³ Suliman gedimu zebiha ta sharaka le Yahweh: ethnen wa isriin alf abgar wa 120,000 korfan. Yala Melik ma kulu Israel gedimu al bed le Yahweh. ⁶⁴ Fi nefsal yom melik kasisu nus ta mahkama fi gidam ta Haikal ta Yahweh, hinak huwo gedimu zebiha mahruk, tekdima ta Dura wa shaham ta tekdima ta sharaka, lianu almasbah al min nihas gidam Yahweh kan suker kaalis ashan istakbilu zebiha al gi haragu,tekdima ta Dura,wa shaham ta zebiha sharaka. ⁶⁵ yala Suliman amulu azuma fi zaman dak, wa kulu Israel mau mojumu kebir,min fi Lebo Hamath lahaidi gerib fi hudud ma Masir, gidam Yahweh Allah tena le saba ayam wa Kaman tani saba ayam, be tajamu arbatashar ayam. ⁶⁶ Fi yom al tamin huwo rasulum bara, wa huma bariku melik wa ruah le mukeimatum ma farah wa surur fi gulubum fi kulu al kuwes al Yahweh wori lom fi Daud,kadam towo,wa le Israel nas towo.