¹ Wa baad ayamat taniin kelima ta yahwah jaa le eliya, fi sena al talit min al jafaf. Kelim gal ruwa, wori nefsa taki le ahab wa ana bi rasulu moturu fi al ardi. ² Eliya ruwa wa wori nefsa tou le ahab, wa jeyaan kan shedid fi samariya. ³ Ahab nadi obadiya al kan musaul min al ghasir wa obadiya mejidu yahwah shedid, ⁴ Ashan zaman al kan yesabel gi katulu anbiyaa ta yahwah, obadiya shilu miyaa 100, anbiyaa wa gesimu humon khamsin-khamsin wa dusu humon fi tehet jebel wa huwo jebu humon esh ma moyo. ⁵ Ahab kelim le obadiya, ruwa fi mahal kulu fi la ardi wa fetisu majari ta moyo wa khieran, yemkin nina bi ligu gesh wa bi angizu haya ta hasiin wa hamiir, ashan nina keli ma fagidu haya ta hiyawanat kulu, ⁶ Wa humon gesimu ardi de le itniin ashan bi fetisu moyo ahab ruwa bi sika tou wa obadiya ruwa bi sika tani. ⁷ Ze obadiya gi ruwa fi sika, wa gabilu eliya wa huwo arufu eliya wa huwo bada dengiri wasa tou tehet, wa huwo kelim, hal de inta, said tai eliya? ⁸ Eliya juwabu huwo, naam de ana. Ruwa kelim le said taki, asuma eliya yahu hini. ⁹ Obadiya juwabu, ana amulu yatu katiya, ashan inta bi wodi le khadim taki le ida ta ahab, le ahab ashan bi katulu ana, ¹⁰ Yahwah allah taki hai, mafi duala aw mamlaka al said tai ma rasulu rujal ashan bi fetisu inta. Wa kan humon kelim nina ma ligu huwo; ahab bi kelim le humon gali halifu takum enu huwo mafi, ¹¹ Wa hasa inta gi kelim, ruwa kelim le said taki gali eliyah yahu hini. ¹² Wa kan ana ruwa min inta hasa, roho ta yahwah bi jaa shilu inta fi mahal tani al ana ma bi arufu. Wa kan ana ruwa wa kelim le ahab, wa kan huwo ma ligu inta, huwo bi katulu ana. Wa ana khadim taki, ana bi abidu yahwah min zaman ana sukeir. ¹³ Sai tai, ma wori le ana haja al ana amulu zaman al izabel katulu anbiya ta yahwah, wa keif ana dusu miya min ambiya ta yahwah, khamsin-khamsin fi tehet jebel wa akilu humon ma esh wa moyo. ¹⁴ Wa inta bi kelim le ana, ruwa wa kelim said tai enu eliya hini, ashan huwo bi katulu ana. ¹⁵ Biga eliya juwabu, yahwah allah al hai al ana bi wogi gedam tou, ana bi wori nefsa tail le ahab allela. ¹⁶ Wa obadiya ruwa gabilu ahab wa wori le huwo kalam al eliya kelim. Biga al melik ruwa gabilu eliya, ¹⁷ Zaman ahab ainu eliya-huwo kelim le eliya, de yau inta? Zol al jebu mashakil le israel. ¹⁸ Eliya juwabu gal, ana ma jebu mashakil le israel, lakin inta wa usura ta abu taki yau nas al jebu mashakil ashan intum sibu gawaniin ta yahwah wa ruwa wara baal. ¹⁹ Hasa, keli inta rasulu wa limu le ana israel kulu fi jebel karmal, sawa maa urbumiya wa khamsin anbiya ta baal wa rubumiya anbiya ta sawari al gi akulu fi teribeza ta Jezebel. ²⁰ Biga ahab rasulu kelima le kulu shaab ta israel wa limu anbiyaa sawa fi jebel karmal. ²¹ Eliya jaa gerib le shaab kulu wa kelim, lahadi miteen intum bi geni geiru mukh takum? Iza kan kan yahwah allah, kaman intum bi ruwa wara huwo lisa al shaab ma juwabu huwo bi kelima. ²² Biga eliya kelim le al shaab, ana biga yau al nebie ta yahwah hini barau. Lakin anbiya ta baal humon urbumiya wa khamsin rajil, ²³ Keli humon wodi le nina itniin bagarat wa keir humon azilu le nefsa tomon wa bagar wahid wa humon bi gata gata wa wodi fi kasab lakin ma keli wodi nar tehet tou wa ana bi jahizu bagara al tani de wa wodi fi kasab, wa ana ma bi wodi nar tehet tou. ²⁴ Biga intum bi nadi isim ta allah takum, wa ana bi nadi isim ta yahwah, wa allah al bi juwabu be nar biga keli huwo un allah, wa shaab kulu juwabu wa kelim huwo kwes or kalam de kwes. ²⁵ . Wa eliya kelim le anbiyaa ta baal, keli intum azilu bagara wahid awel wa jahizu huwo, ashan intum yau nas al aktar wa bada nadi takum isim ta allah takum, lakin ma keli walau nar fi tehet bagara de. ²⁶ Humon shilu bagara al kan wodi le humon de wa humon jahizu wa nadi isim ta baal min sabah lahadi nahar, kelim gal” baal asuma nina, lakin kan mafi sout, mafi ayi juwab, humon alabu hawili mazbaha al humon amulu de. ²⁷ . Fi nahar(Missa Eliya hagiiru(Ataku) le humon wa kelim, kore takum shedid be sout al fok, huwo allah yemkin huwo bi fekiri aw huwo gi geni barau aw huwo safir le rehla, aw yemkin huwo gi num wa keli goumu huwo. ²⁸ Biga humon kore bi sout aali aktar wa humon gata nefsa tomon be seaf wa harbat lahadi gesim tomon bi tala doom wa de haja al humon gi amulu towali . ²⁹ Baad nus nahar wa humon lisa kan gi kore kore lahadi zaman ta gedimu zebiha ta missa, lakin kan mafi sout aw juwab wele kan fi ayi zol al kutu bal tou le kore tomon. ³⁰ Biga eliya kelim le shaab kulu, taal takum gerib le ana, wa shaab kulu jaa geriib le huwo. Biga huwo reja sala(Jahizu) mazbhaha ta yahwah al kan fi kharaba, ³¹ Eliya shilu itnashar hujar. Ayi hajer gi mesiil wahid min ghabael ta yaakub. De yaakub al kalam ta yahwah jaa le huwo kelim, isim taki bi kun israel. ³² Wa huwo abinu mazbaha maa hujar de le yahwah wa huwo hafiru hufra towil mazbaha kebiir shedid ashan bi shilu itniin shawal ta buzur(Bizra) ³³ Huwo jahizu kasab le nar, gata gata bagar de sukeriin wa wodi fi ras kasab. Huwo kelim, keli intum malaa arbaa gurumat ta moyo wa kubu takum fi mahal ta haragu ta tegdima fi ras kasab. ³⁴ wa huwo kelim, jebu takum mouyo de tani mara, wa humon jebu, kaman huwo kelim, jebu takum moyo nimra talata, wa humon amulu. ³⁵ Moyo de jere hawili mazbaha wa mala hufra al hafiru hawil mazbaha de. ³⁶ Wa fi zaman ta tegdima ta zebiha ta missa, eliya al nebie jaa gerib wa kelim, yahwah, allah ta abraham, ta isaaka, wa ta israel, fi yom de keli arufu gal inta allah ta israel, wa ana khadim taki, wa hajat al ana amulu de kulu bi kelim taki. ³⁷ Asuma ana, yahwah, asuma ana ashan shaab de bi arufu inu inta, yahwah, inta allah wa inta keli gieru gulub tomon tani le inta. ³⁸ Biga nar ta yahwah nezil wa haragu tegdima wa haragu kasab wa hujar wa shilu moyo alfi hufra al hawili mazbaha de. ³⁹ Zaman shaab kulu ainu haja al hasil de, humon dengiri usah tomon tehet le ardi wa kelim, yahwah, huwo allah yahwah huwo allah. ⁴⁰ Eliya kelim le humon, takum anbiya ta baal, ma keli intum sibu wahid jere, biga humon shilu humon wa eliya jebu anbiya ta baal fi bahar kishon wa huwo katulu humon. ⁴¹ Eliya kelim le ahab, gum fok akulu wa ashrab ashan fi sout ta motoro shedid. ⁴² Biga ahab ruwa akulu wa ashrab wa eliya ruwa fok fi jebel karmal, huwo wodi gesim tou tehet fi ardi wa dengiri usa tou biena rukuba tou. ⁴³ . Huwo kelim le kadam tou, gum hasa ruwa ainu itigah ta bahar, khadim tou ruwa wa ainu aw kelim, mafi haja, eliya kelim, ruwa tani, sabaa marat. ⁴⁴ Fi dur al saba, khadam de kelim, ainu yau dak sihab gi ruwa min bahar le fok sukeir ze ida ta zol. Eliya juwabu, ruwa wa kelim le ahab, jahizu arabat taki wa nezil gebili motoro keli ma abusu inta. ⁴⁵ Baad shuiya, samawat tala asued ma sihab wa hawa wa kan motoro shedid nezil. Ahab arkab arabat tou wa huwo ruwa le israel. ⁴⁶ Lakin ida ta yahwah kan ma eliya, huwo robutu gash tou wa huwo alagu ahab fi bab ta israel