¹ Eliyah al tishbi fi gilaad, kelim le ahab”Yahwah, allah ta israel hai, al ana wogif gedam tou gal fi senawat deel ma bi kun fi moturu wele nada, alla kan ana kelim, ² Kalam ta yahwah jaa le eliyah, kelim ³ Gum min hina wa ruwa le itejah ta al sherik; dusu nefsa taki fi nah(Khur) kerith, fi sherk ta nahar al urdon. ⁴ Wa ana amiru kurie kurie ashan bi jebu le inta akil. ⁵ Biga eliya ruwa wa amulu ze ma yahwah kelim le howo. Howo ruwa iesh fi(Khur) nahar kerith, sherik nahr el urdon, ⁶ Kurie kurie gi jebu le howo ish wa laham fi sabah wa ish wa laham fi ashiya wa howo gi ashrabu moyo min khur(nahr). ⁷ Lakin baad shueya khur de nashif ashan kan motoro ma nenzil fi ardi(Beled). ⁸ Kelima ta yahwah jaa le howo gal, ⁹ Gum ruwa le serephath al tabie le sidon wa iesh(geni) hinak, asuma ana amiru mara armala fii hinak ashan bi wodi le inta akil, ¹⁰ Biga howo gum wa ruwa le serephath wa zaman howo wosulu fi bab ta medina howo ligu mara armala hinak kan gi ligetu khasab howo bada nadi mara de wa kelim,”Min fadlak wodi le ana moyo shuiya ashan fi haja asahan ana bi ashrab” ¹¹ Wa zaman mara de gi ruwa jebu moyo de howo nadi hiya, wa kelim, min fadlak jebule ana geta ta ish fi ida taki. ¹² Hiya juwabu, yahwah, Allah taki hai, ana ma indu esh, lakin ana endu degig besit fi jerdel wa ziet shuiya fi kubaya, asuma wa hasa ana bi legetu itniin kasab de wa ana gi ruwa rakabu howo le ana wa jena tai, ashan nina bi akulu, wa nina bi mutu. ¹³ Eliya kelim le hiya, ma keli inta kafu, ruwa wa amulu ze inta kelim, lakin amulu le ana esh sukeir awel wa jebu le ana. Wa inti bi jaa amulu le inta wa le jena taki, ¹⁴ Ashan yahwah, Allah ta Israel kelim, haja ta degig de ma bi tala fadi, wele ibrik ta ziet de ma bi wogif min kubu ziet, lahadi yom al yahwah bi jaa rasulu moturu fi al ardi. ¹⁵ Wa hiya amulu ze eliya kelimu, hiya wa eliya sawa ma nas tou ta biet, akulu ayamat ketir. ¹⁶ Haja ta degig de ma tala fadi wele ibrik ta ziet de wogif min kubu ziet bes ze kelima ta yahwah wonusu ze howo kelim be wasat eliya. ¹⁷ Biga baad hajat de hasil jena ta mara de, mara sidu biet de howo biga ayan, ayan de kan shedid hata jena de biga ma gi nefis wa howo mutu. ¹⁸ Wa uma tou kelim le eliya, inta malu ma ana(Ana amulu shunu al batal), ya rujal allah? Hal inta jaa zikiru ana ma katiya tai wa katulu jena tai? ¹⁹ Biga eliya juwabu le hiya, wodi le ana jena taki de. Howo arufu jena de fi idan ta hiya wa shilu jena fok fi juwa tou al howo kan gi geni fogo, wa howo ragidu jena de fi serir tou, ²⁰ Howo kore le yahwah wa kelim, yahwah Allah tai, inta kaman jibu karisa le mara al armala al ana gi geni ma howo fi biet wa bi katulu jena tou? ²¹ Wa Eliya bada midu jesim tou fi jesim ta jena de talata marat, howo kore le yahwah wa kelim yahawah allah tai, ana gi asalu inta min fadlak keli haya ta jena de rejaa le howo. ²² Yahwah asuma le sout ta eliya, haya ta jena de rejaa le howo wa biga hai, ²³ Eliya shilu jena de bara min juwa tou wa howo nezil tehet fi biet howo silimu jena de le uma tou wa kelim, asuma yahu jena taki hai. ²⁴ Mara de kelim le eliyah, hasa ana arufu enu inta rujul allah wa kalam ta yahwah alfi kasma taki howo hak(Hagiga)