¹ Rehoboam ruah le Shechem , le kulu Israel kan gija le Shechem ashan amulu huwo Melik, ² Huwo hasil kida Jeroboam weled ta Nebat asuma de ( wa huwo lisa fi Masir ,almahal al huwo jere min Melik Suliman ) le Jeroboam huwo geni fi Masir ³ yala humon rasulu wa nadi huwo , wa Jeroboam wa kulu jemiyia ta Israel jaw a kelim le Rehoboam , ⁴ “Abutaki amulu tegila tena tegil .Hasa amulu kafif al shokol al gowi ta abutaki amulu kafif al huwo kutu fi ena ,wa ena bi kadimu ita .” ⁵ Rehoboam kelim le humon ,”ruah takum le talata yom ,yala taal takum le ana “ yala nas ruah bara . ⁶ Melik Rehoboam asalu rujal al ajusin al wogif gidam Suliman abu towo wokit huwo kan hai wa hu kelim ,” kef itakum bi arshidu ana ashan juwabu nas de ?” ⁷ Humon kelim le huwo ,iza ita bikun kadam alela le nas de ashan yakdimum ,wa juwabu humon ma kelimaat al kuwes le humon .yala humon daiman bikun kadamiin taki “. ⁸ lakin Rehoboam jahilu al irshad al rujal ajusiin kelim lehuwo wa huwo ruah asalu Shaabap al rabah ma huwo sawa wogif gidam huwo. ⁹ Huwo kelim le humon “ yatu irshad al itakum bi kelim le ana ashan juwabu ma nas al kelim le ana gal “ kafifu al tegila al abutaki kutu fi ena ? “ ¹⁰ Al rujal alshaabab al rabah sawa ma Rehoboam kelim lehuwo “kelim le nas al kelim gal abu taki Suliman kutu tegila tomon tegil ita laazim bi kafifu .ita bi kelim lehumon “ Dufur tai alsuker de tegil min sulba ta abutai. ¹¹ biga yala mahma kan abu tai tegilu itakum ma tegila tegil ,lakin ana bi zidu fi tegila takum de . Abu tai akibu itakum ma sot ,lakin ana bi akibu itakum ma agarap .” ¹² Yala Jeroboam wa kulu nas ja le Rehoboam fi yom nimra talata ,ze melik kan wori wokit huwo kelim “ taalu le ana baad talata yom .” ¹³ al Melik juwabu nas kishiin wa jahilu al irshad ta rujal al ajusiin al humon wodi le huwo, ¹⁴ huwo kelimu le humon taabi irshad ta shaabab al rujal ; hu gal “ Abu tai tabu itakum ma tegila ,lakin ana bi zidu le tegila .Abu tai akibu itu ma sot ,lakin ana bi akibu ma agarap.” ¹⁵ yala al melik ma asuma le nas, fahu kan tegeir ta mogif al Yahweh jibu, ashan huwo bi shilu shokol towo be wasad kelima al huwo kelimu ma Ahijah al Shilonite le Jeroboam weled ta Nebat. ¹⁶ Wokit kulu israeliin ainu al Melik ma asuma le humon ,al nas juwabu huwo wa gal ,” yatu sharaka ena indu fi Daud ? ena ma indu warisa fi weled ta yeshu !ruah le kemaat takum ,Israel hasa ainu le itakum ,Daud. yala israeliin ruah le mukaimaat tomon. ¹⁷ lakin le Nas ta Israel al aishin fi medina ta Yahusa , Rehoboam ja melik fok humon. ¹⁸ Yala Melik Rehoboam rasulu Adoniram , alkan masik omal ta shokol , lakin Israel kulu luku huwo ma hajer lahaidi mutu . Rehoboam al melik bada jere quam fi karlo towo le orshelim. ¹⁹ Yala kan fi tamarud did bed ta Daud lahaidi yom allela . ²⁰ Hasal kida wokit kulu Israel asuma gal Jereboam rija , humon rasulu ashan nadi huwo le mujtama tomon wa amulu huwo Melik le kulu Israeliin. Kan mafi zol gi taabi usra ta Daud ,ile wahid Gebila ta Yahuza. ²¹ Wokit Rehoboam wosulu fi Orshelim , huwo limu kulu bed ta yahusa wa Gabail ta Benyamin; kan hinak 180,000 rujal al iktaru jesh , ashan shakil did bed ta Israel , ashan bi rija Mamlaka le Rehoboam weled ta Melik Suliman. ²² lakin kalam ta Allah ja le Shemaiah, al rajil ta Allah; ²³ Kelim le Rehoboam weled ta Suliman ,melik ta Yahusa ,le kulu nas ta Yahusa wa Benyamin, wa le kulu alnas; gal, ²⁴ Yahweh kelim de : ita mabi hajim au shakil did akuanak Israeliin. Yala humon asuma le kalam ta Yahweh wa humon rija wara wa ruah be teriga tomon ,wa humon iktaramu kalam towo. ²⁵ Yala Jeroboam bana Schechem fi hajer ta beled ta Ephraim, wa aish hinak. Huwo ruah min hinak wa bana peniel. ²⁶ Jeroboam fekir fi gelbu,” Hasa al mamlaka bi rija le bed ta Daud. ²⁷ Iza kan nas de ruah ashan gedim zebiha fi Haikal fi orshelim ,yala gelba tomon bi rija tani le said tomon, Le Rehoboam melik ta Yahusa .Humon bi kataulu wa rija le Rehoboam melik ta Yahusa.” ²⁸ Yala Melik Jeroboam asalu irshad wa amulu ethnen Tor min dahap; wa huwo kelim le nas,”huwo ketir le itakum ashan bi ruah lahaidi orshelim .shuf ,hini yau Allah takum,Israel al jibu itakum bara min ardi ta Masir.” ²⁹ Huwo kutu wahid fi Bediel ,wa wahid fi Dan. ³⁰ Yala amulu de biga katiya .nas gi ruah min tani le tani kulu sika lahaidi Dan. ³¹ Jeroboam amulu bed fi mahal fok wa huwo amulu Gusus min nus al nas, alma min aulat ta lawiin. ³² Jeroboam amulu eid fi shahar tamaniya, fi yom kamistashar ta shahar ,ze eid al fi Yahusa ,wa huwo ruah fok fi mazbah. Huwo Kaman amulu kida fi Bediel ,gedim zebiha le Teran del alhuwo amulu , wa huwo kutu Gusus fi mahalat al fok huwo amulu. ³³ Jeroboam ruah fok fi mazbah alhuwo amulu fi Bethiel fi yom kamistashar fi shahar tamaniya,fi shahar al huwo katit fi muktowo; huwo resimu eid le nas ta Israel wa ruah fok fi masbaz ashan haragu bakur .