¹ Hasa melik Suliman hibu nasawin al ajanib zaid binia ta Faraon – nasawin min Mobaitiin ,Amonitiin , Edomitiin ,Sidonitiin , wa Hittitiin. ² Humon min umaa al Yahweh kelim le nas Israel ,” itu ma bi ruah fi nus tomon ashan zoju ,wa humon bija fi nus takum,lianu umon tawali bi gilubu gelba takum le rabunat tomon.“fi karar de kulu,Suliman kan mujiib shedid le nasawin del fi hub. ³ Suliman kan indu subumiya nasawin, amiraat, wa tultumiya refigat. Nasawin towo geiru gelba towo. ⁴ wokit Suliman rabah ajus , nasawin towo gelibu gelba towo; gelba towo ma stelim kulu le Yahweh Allah towo ,ze gelba ta abu Daud kan. ⁵ Le Suliman taabi Ashtoret, aliha ta Sidoniin , wa huwo taabi Molech, sanam al afin ta Amonitiin. ⁶ Suliman amulu haja al sherir fi eina ta Yahweh; huwo ma taabi Yahweh ze abu towo Daud amulu. ⁷ Yala Suliman bana mahal al aali le chemosh ,al sanam ta Mobitiin al afin , fi jebel fok sherik ta orshelim ,wa Kaman le Molech , al samam ta nas ta Ammon. ⁸ Huwo Kaman bana makanat al aali le kulu nasawiin towo al ajanip , al bi haragu bahur wa zebiha le aaliha tomon . ⁹ Yahweh kan zalan ma Suliman ,ashan gelba towo tala bara min huwo ,Allah ta Israel , mahma kan huwo zahir le huwo maraten ¹⁰ wa amiru ashan hajat del , gal keli huwo ma ruah wara aliha taniin , lakin Suliman ma iktaramu shunu al Yahweh amiru ¹¹ ashan kida Yahweh kelim le Suliman ,” ashan ita amulu de wa ma hafisu al amina wa gawaniin al ana amiru itakum ,ana be taakit bi sheretu al mamlaka min ita wa wodi le kadamtaki ¹² Ashan kida , ashan bekatir Daud Abuk , ana ma bi amulu fi fi zaman hayatak ,lakin ana bi sheretu bara fi zaman ta yeden ta weled taki. ¹³ wa lisa ana mabi sheretu kulu al mamlaka ; ana bi wodi wahid gebila le weled taki ashan bekatir Daud abid tai , wa be katir Orshelim ,al ana iktar .” ¹⁴ Biga Yahweh arfa fok adu le Suliman , Hadad min Edomiin . Huwo min usra melik ta Edom. ¹⁵ wokit Daud kan fi Edom ,Joab al kaaid ta jesh ruah ashan dofunu al meitiin ,aiya rajil al kan katulu. ¹⁶ Joab wa kulu Israel fadulu hinak le muda sita shuhur lahaidi huwo katulu aiya rajil fi Edom. ¹⁷ Lakin Hadad jere le Masir ma juzu min Edomiin tannin , kadamiin ta abu towo ,wokit Hadad kan weled suker . ¹⁸ Humon sibu Midian wa ja le paran , de yau mahal al humon shilu rujal mahum le Masir , le Faraon melik ta Masir ,al wodi le huwo bed wa ardi wa akil. ¹⁹ Hadad ligo maaruf min ena ta Faraon , ashan Faraon wodi le huwo mara ,okut ta Mara towo ,okut ta Tahpenes al melka. ²⁰ Al okut ta Tahpenes weledu weled le Hadad . humon semi huwo Genubath . Tahpenes rabah huwo fi kasri ta Faraon. yala Genubath ish fi kasri ta Faraon fi nus aulat ta Faraon. ²¹ Wokit huwo fi Masir , Hadad asuma gal Daud naimu sawa ma judud towo le raha wa Kaman Joab kaid ta jesh maat . ²² Hadad kelim le Faraon ,” keli ana ruah , asahan ruah le beled tai .” yala Faraon kelim le huwo , “ ita muktaj shunu min ana ,al ita hasa gi fetish ashan ruah le beled taki ? Hadad juwabu , “ Mafi haja ,arjuk keli ana ruah .” ²³ Allah Kaman gowimu fok adu tani le Suliman ,Rezon weled ta Eliada , al jere min said towo Hadadezer melik ta Zobah. ²⁴ Razon limu kulu rujal hawulu wa biga kaaid ta firga muzika wokit Daud katulu rujal ta Zobah. Rujal ta Razon ruah le Dasmaska. ²⁵ Huwo kana adu ta Israel fi kulu ayam ta Suliman, wa Kaman ma mashakil al hadad gi amulu. Rezon shakil Israel wa hukumu Aram . ²⁶ Yala Jereboam weled ta Nebat ,min Ephraimtiin ta Zeredah , kadam ta Suliman , al kan isim umatowo Zeruah , al armala Kaman gomu yeden towo did al melik . ²⁷ Huwo arfa yeden towo did al Melik ashan Suliman abinu fok mahal alkan fi Millo wa sianu al fatha fi heta ta medina ta Daud abu . ²⁸ Jeroboam kan rajil ta gudra . Suliman ainu gal al rajil alshaap de kan kuwes fi sinaa , huwo iktaru ashan ainu kulu omal fi bed Yusif. ²⁹ fi zaman dak wokit Jereboam tala min Orshelim , Al nebi Adijah al shilonite ligo huwo fi sika . Hasa Ahijah libisu jalabia jedid wa ethnen rujal del kan barau fi zira. ³⁰ Yala Ahija gobudu jalabia al jedid de kamil alkan huwo libisu wa sheretu le itnashar gitaad . ³¹ Huwo kelim le Jereboam ,” Shilu ashara gitaad ,lianu Yahweh ,Allah ta Israel ,kelim, “ shuf , ana bi sheretu mamlaka bara min yeden ta Suliman wa bi wodi ashara gabail le ita ³² ( lakin Suliman bi indu wahid gebila ,ashan be katir kadam tai Daud wa be katir Orshelim –al medina al ana iktar bara min kulu gabail ta Israel ), ³³ ashan humon sibu ana wa ruah abidu Ashtoret aaliha ta Sidoniin , chemosh allah Moabiin ,wa Molech allah ta nas ta Ammon . Humon ma douru fi sika tai , ashan amulu shunu al saah fi ena tai ,wa hafisu wasaya wa gawaniin tai , ze Daud amulu abu towo . ³⁴ Ashan , ana ma bi shilu kulu al mamlaka min yeden ta Suliman .bel ax , Ana amulu huwo hakim fi kulu ayam ta haya towo ,ashan be katir kadam tai Daud al ana iktar ,al hafisu gawaniin ,wa wasaya tai. ³⁵ lakin ana bi shilu al mamlaka de bara min yeden towo ,wa wodi le inta ashara gebila. ³⁶ ana bi wodi wahid gebila le weled ta Suliman , ashan Daud kadam tai daiman bi indu lamba gidam ana fi orshelim ,al medina al ana iktar ashan kutu isim tai . ³⁷ Ana bi shilu ita ,wa ita bi hakimu ashan kemilu niya de ,wa ita bikun Melik fok Israel. ³⁸ iza kan ita bi asuma le haja al ana gi amiru ita fogo ,wa iza kan ita douru fi sika tai ,wa amulu al saah fi ena tai ,ashan hafisu gawaniin wa wasaya tai ,ze Daud abid tai amulu ,yala ana bikun ma ita wa bi abinu le ita bed betakit ,ze ana abinu le Daud ,wa wodi Israel le ita. ³⁹ Ana bi akibu jil ta Daud ,lakin ma lel abad .” ⁴⁰ Yala Suliman hawil ashan katulu Jeroboam .Lakin Jeroboam gum wa jere le Masir , le Shishak melik ta Masir , wa huwo alir fi Masir lahaidi Suliman mutu ⁴¹ Ze le kalamat taniin Suliman ,kulu al huwo amulu wa hikma ,kulu ma katifu fi kitaab ta ahdath ta Suliman ? ⁴² Suliman hukumu fi kulu Israel le muda arbein senawat. ⁴³ Huwo numu ma judud towo wa dofunu huwo fi medina ta Daud .Rehoboam weled towo biga ja Melik fi mahal towo .