¹ Ana ma hur? Ana ma rasul? Ana ma ayno Yesua Rabuna ta nina? Itakum ma yao netija ta shukol tai fi Rabana? ² Kan ana ma rasul le nas tanin, alal agal ana le itakum. Leano itakum isbat ta irsaleya tai fi Rabana. ³ De yao ana be dafi nefsa tai gedam ta nas al be asalu ana: ⁴ Anna ma indu hag ashan be akulu aw ashrabo? ⁵ Anna ma indu hag ashan be shelu ma anna mara al mumen, ze bagi rusul, wa akwana ta Rabana, wa Sefa? ⁶ wele bes ele Barnaba wa ana lazem be ishtakal? ⁷ Mafi jundi be ishtakal fi jesh ala hesab ta tuo? De muno be zara shejera wa ma be akulu samar tuo? aw muno be daoru wara haiwanat wa ma be ashrab leben min fugu? ⁸ Kalamat al ana be kelimo itakum be fekir ino de fekra ta insan? Ganun ta Musa ma kelimo zede? ⁹ Leano moktub fi shreya," Mata gofulu kasuma ta bagara fi zama ta adrursu gemeh." say Allah be ihtam ma begara? ¹⁰ Huwo ma kelimo kalam de ashan anna? Katibo le anna, ashan zol al be kuruju huwo be kuruju be raja, wa zol al gi adrusu gemeh be adrusu be raja, be ino huwo bi lego min semar ta shokol de. ¹¹ Iza kan anna zara le itakum hajat ta ruhu, hal huwo batal le anna ashan be hasedo min itakum hajat madia? ¹² Iza kan nas tanin humon lego hag de min itakum, anna kman ma be akeder lego be zeyada? Lakin anna ma asalo hag de. Belask anna be ihtaml kulu haja ashan ma be kun hajes le injel ta Massih. ¹³ Itakum ma arufo gali del al gi akhdem fi haikel be ligo akil tumon min haikel? Itakum ma arufo gali del al gi akhdem fi masbah humon be shariku hajat al gedemo fi masbah? ¹⁴ Be nefsa teriga, Rabana kutu gali delen al gi beshero injel humon be lego maisha tumon min injel. ¹⁵ Lakin ana ma taliib be ai hugug de, Wa ana ma katebu zede ashan be amolo haja le ana. Ana be fadel mutu min be abusu fakhr tai. ¹⁶ Kan ana gi beshir injel, ana ma indo saba ashan be iftakhir, lean lazem ana be amulu. Wa museba le ana kan ana ma beshiru injel! ¹⁷ Kan ana gi beshir be neya, ana indu mukafa. Lakin kan bedon neya, ana lesa lazim be timu shokol al Allah wodi le ana ashan be kamilo. ¹⁸ Mukafa tai bega shunu? kan ana bashiru, ana be wodi bushara ta injil be don mugabil wa ma bi asalu nas ashan be saidu ana fi safar wa tebshir. ¹⁹ Ma rubuto ana ma ai zol, lakin ana bega kadam le nas kulu, ashan ana be aksab ketereen. ²⁰ Le Yahuden ana bega ze yahud, ashan ana be aksab Yahudeen. le delen al tehet shareya, ana bega ze zol al tehet shareya shan be aksab del al tehet shareya. Ana amulu zede ragm ana be nefsa tai ma gi ish tehet ganun ta shareya. ²¹ Le del al bara min ganun ta Musa, ana bega ze zol al bara ganun, de ma be yani ino ana ma bara ganun ta Allah, lakin tehet ganun ta Massih. Ana amolo zede ashan ana be ardah del al bara ganun. ²² Le al deif ana bega deif , ashan ana be arbah al deif.Ana bega kulu haja le kulu nas, ashan ana ankezo bad min humon be ai teriga. ²³ Ana gi amulu kulu haja min ajel ta injil, ashan ana be shariku fi barakat ta tuo. ²⁴ Itakum ma arufu be ino nas al gi jere humon kulu be jere fi medan, lakin wahed yao be ego jaeza? jere takum kman lahadi itakum be fuz be jaeza. ²⁵ Kulu zol al jere be derido nefa ta tuo shedid fi kulu haja. Humon ge amulu zede ashan be lego jaeza al be kalasu, lakin anna be amulu ashan be lego al ma be kalasu. ²⁶ Ashan keda ana ma be jere bedon hadaf aw gi dugu boniya fi hawa sakit. ²⁷ Lakin ana gi istakhdim jesem tai wa be kutut huwo ze abed, ashan baad ma ana beshero le nas, kede ana ma ja tala ma muahal.