¹ Hasa be khusos ta kalam al itakum katebo: " Huwo kwis la rajel kede ma habishu mara." ² Lakin ashan tajarub ta zena, kulu rajel kede indo mara ta tuo, wa kulu mara kede indo rajel ta tuo. ³ Rajel kede wode le mara tuo hugug ta zawaj, wa kaman mara le rajel ta heya. ⁴ Mara ma yao indo sulta le jesem ta heya, de rajel. Kaman, rajel ma indo sulta le jessim tuo, laken mara indo. ⁵ Matakum aba le badun takum ilaka al zaujeya ma baad, ele be itifagiya al kuwais wa le zaman mahdod. Amulu ta keda ashan itakum be ferigu nefsa le salawat. Baad dak kede itakum reja ashan be geni sawa tani, ashan shetan ma be jeribu itakum ashan itakum deyfen fi amsuku nefsa. ⁶ Lakin ana gi kelemu hajat de le itakum ze raya ma talemat. ⁷ Ana kan be itmanna gale kulu nas kede geni ze ana. Laken ay zol indo hadeya tuo min Allah. De indo neya ta zauju, wa tani indo neya al ma daer zauju. ⁸ Le delen al ma zauju wa aramel ana be kelimu zede huwo kowes le humon ashan be geni bedon zawaj, ze ana. ⁹ Lakin kan humon ma akeder amsuko nefsa, kede humon zauju. Fa huwo kowes le humon ashen be zauju min waja ta geni bedon zawaj. ¹⁰ Le delem al zauju de ma kalam tai, lakin ta Rabana- mara kede ma ferigo min rajel tuo, ¹¹ ( lakin kan heya dero ferigo min rajel ta heya, kede heya geni bedon zawaj aw reja le rajel ta heya)- wa rajel kede ma talagu mara ta tuo. ¹² Lakin le bagi mas ana be kelemo, ma Rabana - gali kan fi aku al indo mara ma mumen, wa heya azo ish ma huwo, kede huwo ma talagu heya. ¹³ Kan fi mara indo rajel ma mumen, huwo azo ish ma heya, kede heya ma talagu huwo. ¹⁴ Leano rajel al ma mumen huwo mukadas ashan mara tuo, wa mara al ma mumen mukadas ashan rajel ta heya. Kan ma zede iyal takum bekon ma nedef, laken hasa humon mukadasen. ¹⁵ Lakin de al ma mumen kan azo ruwa, kede huwo ruwa. Fi hala de, akh aw akhut ma rubuto ma kalam al huwo rudu. Allah nadi anna ashan be ish fi salam. ¹⁶ Leano ita ma be arufu kan ita be kalesu rajel taki al ma mumen? Aw ita ma be arufu kan ita be kalesu mara taki? ¹⁷ Bes kede ai zol ish haya al Rabana kelefu huwo, kulu zol ze Allah nade huwo. De ganun tai fi kulu ¹⁸ kanais. Kan fi zol taharu zaman kan nade huwo fi iman? Kede huwo ma hawel geni ze ma taharu. Kan fi zol ma taharu zaman nade huwo fi iman? Kede ma taharu huwo. ¹⁹ Leano kan taharu we le ma taharu ma muhem. Al muhem kede anna ihteram gawanen ta Allah. ²⁰ Kulu wahed kede geni ze ma Allah nadi le iman. ²¹ Kan ita kadam zaman Allah nade ita? Mata fekere fugu. Laken kan ita be akeder geni hur, shelu fursa ashan be feku nefsa. ²² Kan fi zol Rabana nadi wa huwo kadam huwo bega zol ta Rabana al hur. Nefsu kama zol al hur woked nadi huwo le iman huwo kadam le al Massih. ²³ Beyo itakum be taman, ashan keda matakum geni kadam le zol. ²⁴ Ya akwani, kede anna geni ze ma lego anna ge ish fi woked nade anna le iman. ²⁵ Be khosus ta delen al ma zauju, ana ma indo talimat min Rabana. Lakin ana be wode rai tai ze zol al indo le huwo seka be wasat neima ta Rabana. ²⁶ Ashan keda, ana be feker ashan taab al keter, huwo kewis le zol kede geni ze am huwo. ²⁷ Kan ita zauju mara? Mata feteso teriga ashan be sebu heya. Kan ita ma zauju? Mata fetesu mara. ²⁸ Lakin kan ita zauju, ita ma amulu kateya. Kan fi mara ma zauju zaujo, heya ma amulu kateya. Lakin delen al zauju humon be lego mashakelat al barao barao fi haya ta tomon, wa ana dear hafezu itakum min fugu. ²⁹ Lakin ana be kelemo le itakum , ya akwani: Zaman bega guser. Min hassa le gedam, delen al indo nuswan kede ish ze ka ano humon ma indo. ³⁰ Delen al be kore ze humon ma be kore, wa delen al farhanen ze humon ma farhanen, wa delen al gi ishtere ze ka ano humon ma indo haja, ³¹ wa delen al gi ishtakal be hajat al fi alam kede humon wori be amail tuomon gali humon indo raja fi Allah. Leano alam de gi ruwa le nihaya. ³² Ana der kede itakum ma fekir. Zol al ma zauju be ihtam be hajat ta Rabana, kef huwo be ardi huwo. ³³ Lakin zol al zauju be ihtam be hajat ta ard, kef huwo be ardi mara tuo, ³⁴ fikra tuo mugasam. Kaman mara al ma zauju aw al azaba gi ihtam be hajat ta Rabana, kef humon be kun mukarasin fi jesem wa ruhu le Rabana. Lakin mara al zaujo be ihtam be hajat ta ard, kef heya be ardi rajel ta tuo. ³⁵ Ana be kelimu zede le fayd takum, wa ma ashan be ithakam fi itakum. Ana be kelimo haja al sah, hata itakum be rekez ma Rabana bedon lakabata. ³⁶ Kan fi zol waad mara be zawaj, lakin kan huwo ligo nefsa ta tuo ma be itaamal ma khtiba de be ihteram ashan heya bega kebeir fi ummr, kede huwo zawoju, de ma katiya. ³⁷ Lakin kan huwo karir fi geliba ta tuo, kan mafi dagid lakin huwo be akider amsuku nefsa ta tuo, wa kan huwo kutu fi geliba ta tuo ashan be amulo zede, be hafizu khatiba ta tuo azrra, huwo amulo kowais. ³⁸ Be keda zol al zawoju khatiba ta tuo amulo kowais, wa zol al karrir ashan ma be zawoju huwo amulo ahsen. ³⁹ Mara morbut ma rajel ta tuo fi zaman al huwo hai. Lakin kan huwo mutu, heya hur ashan be zauju ai zol al fi neya tuo, lakin fi Rabana. ⁴⁰ Lakin fi hukum tai heya be murtah iza heya ma zauju tani. Wa ana be fekir ana kman indo Ruhu ta Allah.