¹ Dauro takum wara mohaba wa kede itakum indo neya le mawahib al ruhiya, be zat ta nubuwa. ² Leano zol al gi wonosu alsina huwo ma gi wonosu le nas lakin le Allah. Fa mafi zol gi fahimo huwo leano huwo gi wonosu asrar fi Ruhu. ³ Lakin zol al bi itnadaa gi wonosu le nas ashan bii abeno humon, bi shejao humon, wa bi azii humon. ⁴ Zol al gi wonosu be alsina bi abeno nefsa ta tuo, lakin zol al bi itnabaa gi abeno kenisa. ⁵ Ana bi itmanaa itakum kulu kede wonosu alsina, . Lakin akter ta tuo ana bi itmanaa kede itakum itnabaa. Zol al gi itnabaa huwo akbar min zol al bw wonosu alsina, ele kan fi zol al be terjimo le buniyan ta kenisa. ⁶ Lakin hasa ya akwani, kan ana ja le itakum wa ana gi wonosu alsina, de yato musaada al ana bi gedimu le itakum? Mafii, ele kan ana wonosu be teriga ta rawya, aw marafa, aw nubuwa, aw talim. ⁷ Kan adawat ta muzeka al ma indu haya gi alabu, wa kulu wahid ma tala sut ta tuo al mumeyaz, nas be arofu kef gali gietar aw nugara gi alabu? ⁸ Kan burugi gi kure sut tani baraw, nas be arofu kef gali de zaman ashan nas be jahizu le harib? ⁹ Huwo kaman zede le itakum. Kan ita gi wonosu kalam al ma wadeh, muno ya be fahim kalam al ita wonsu? Ita be geni wonosu wa mafi zol be fahimo ita. ¹⁰ Bedon shak fi lugat etir fi alam, wa humon kulu indo manaa. ¹¹ Lakin kan ana ma arufu manaa ta tuo, ana bi kun garib le zol al gi wonosu, wa zol de bi kun garib le ana. ¹² Huwo kaman zede le itakum. Ze ma itakum indo neya ashan Ruhu bi ishtakal fugu itakum, hawel ashan takum be naja fi mawahib al bi abino kenisa. ¹³ Fa zol al gi wonosu alsina kede seli wa asalu mawhiba ta tarjama. ¹⁴ Ashan kan ana gi seli be alsina, ruhu tai bi seli, lakin mukh tai ma indo samar. ¹⁵ Ana be amolo shuno? Ana be seli be ruhu, wa ana kaman bi seli be mukh ta. Ana bi guna be ruhu, wa kaman be mukh. ¹⁶ Be teriga tani, kan ita gi abedo Allah be ruhu, kef zol al tani de bi kelimo "Amen" fi zaman al ita gi wodi shukur kan huwo ma fahim haja al ita gi wonosu? ¹⁷ Ita wodi shukuran be teriga al tamam, lakin ma abino zol al kan gi asuma. ¹⁸ Ana bi shukuru Allah ashan ana bi wonoso be lugat keter akter min itakum kulu. ¹⁹ Lakin fi kenisa ana bi fadil wonoso khamsa kelimat be luga al nas gi fahimo ashan ana bi alimo humon, min wonoso ashara alf kelima be luga al nas ma gi fahim. ²⁰ Akwana tai, ma takum geni ze iyal sukereen fi tefkir takum. Lakin fi amulo hajat al batal fekir takum ze iyal sukereen. Lakin fi tefkir kede geni ze ta nas al raba. ²¹ Katibu fi sheriya," Be nas ta luagat al baraw wa be lisan baraw ana bi wonosu le shaab de. Lakin baad de kulu humon ma bi asuma ana," Rabuna yao keimo. ²² Izen, wanasa be luga garib huwo alama, ma le mumineen, lakin le nas al ma mumineen. Lakin nubuwa huwo alama, ma le nas al ma amin, lakin le mumineen. ²³ Kan kenisa kulu lemo wa humon kulu bade wonosu be lugat garid, wa nas al ma indo fikra aw al ma mumineen dakalu fi nus takum, humon ma be kelimo gali itakum majaneen? ²⁴ Lakin kan itakum kulu gi itnabaa wa zol min bara aw ma mumin ja fi nus takum, hwuo ma bi kun indo ozur baad ma huwo asuma. Be hakimo huwo fi kulu hajat al huwo wonosu. ²⁵ Siir al fi geliba tuo be kashifu. Wa de yao be kutu huwo bi waga be wusa tuo wa bi dengir la Allah. Huwo bi iterrif be ino Allah fi fi nos takum. ²⁶ Shono yao bi amolo nefsa ta tuo, akwani? Kan itakum limo sawa fi ibada, kede itakum ja be taranim, talim, rauya, luga majhul, aw tarjama. Amulu takum kulu haj le buniyan ta kenisa. ²⁷ Kan fi zol gi wonoso lug majhul, kede kun fi itnen aw bel keter talata, wa kulu wahid be dor, wa baad daak kede zol tani terjimu kalam al wonoso de. ²⁸ Lakin kan mafi zol al bi terjimu, Kulu wahid min humon kede askut fi kenisa. Kede kulu zol wonoso le nefsa tuo barao wa le Allah ²⁹ Kede itneen aw talata itnabaa, wa kede bagi nas asuma be hikma wa temyez. ³⁰ Lakin kan kalam wodi le wahid min nas al fi kenisa, kede zol al wonosu awel de askut. ³¹ Ai wahid min itakum bi akeder itnaba wahid wara tani ashan ai zol bi alimo wa itakum bi shejao badon. ³² Fa ruhu ta nubua tehet seytara ta anbeya. ³³ Leano Allah Huwo ma Illah ta teshwish, lakin ta salam. ³⁴ De yao nizam fi kulu kanays ta nas ta Allah al kuduseen. Nusuwan kede askut fi kenisa. Leano ma mosmuh le humon ashan bi wonoso. Al sah kede humon kon nas al gi asuma kalam ta rojal tumon, ze ma sheriya bi kelimo. ³⁵ Kan humon der alimo ai haja , kede humon asalo rojal tumon. Leano huwo bi jebo fadiya le rajil kan mara ta tuo wonoso fi kenisa. ³⁶ Hal kelima ta Allah tala min itakum? Itakum yao bes lego? ³⁷ Kan fi zol fekir nefsa tuo gali huwo nebi aw indo mawhiba ruhiya, kede huwo arufu be ino hajat al ana katibo de huwo wasiya ta Rabana. ³⁸ Kan fi zol aliso kalam de, kede alisu huwo. ³⁹ Ashan keda akwana tai, kede itakum kun indo neya le nubuwa, wa matakum abosu ai zol min wonosu alsina . ⁴⁰ Lakin kede hajat kulu amolu be teriga al kwais wa be nizam.