¹ Fi kalam ta mawahib, akwana tai, ana ma der kede itakum geni bedon marafa. ² itakum be arofu fi zaman kan itakum wasneen, kabasu itakum be abedu asnam al ma be wonosu, fi teriga al barao barao. ³ Ashan keda ana der itakum be afofu be ino mafi zol al wonosu be Ruhu ta Allah be kelim " Yesua maluon." Mafi zol be kelimo" Yesua Huwo Rabana," ile be wasat ta Ruhu al Kudus. ⁴ Fi mawahib ketir, lakin Ruhu de wahid. ⁵ Fi khidmat ketir, lakin nefsa Rabana; ⁶ wa kman fi shukolat be shekel barao barao, lakin nefsa Allah Huwo yao be amolu kulu hajat fi kulu nas. ^{7 8} Allah wodi le kulu wahid hadiya ta Ruhu le faida ta nas kulu. Wodi le wahid be wasat ta Ruhu hadiya kalam ta hikma, wa le tani kalam ta maarfa be nefsa Ruhu. ⁹ Le tani wodi iman be nefsa Ruhu, wa le tani hadiya ta aliju nas be Ruhu al wahid de. ¹⁰ Wodi le tani amulu mujezat, wa le tani nubuwa. Le tani wodi magdera ta meizu arwah, le tani wonuso lugat mukhtalifa, wa le tani terjimu lugat. ¹¹ De kulu shokol ta Ruhu al wahid de yao be amulu, gi wodi hadiyat le ai zol hasab ikhtiyar ta Tuo. ¹² Ze ma jesem de wahid, wa indo adda ketir, humon kulu adda ta nefsa jesem, huwo kaman zede ma Massih. ¹³ Leano be Ruhu al wahid anna kulu amido le jessim wahid, kan Yahudeen aw Yonaneen, kan abid aw hur, kulu ann lego hadiya ta Ruhu al Kudus. ¹⁴ Leano jessim ma indo uddo wahid, lakin ketir. ¹⁵ Kan kura kelimo," Ashan ana ma iden, ana ma juzu min jessim," ashan huwo kelim keda huwo ma min jessim? ¹⁶ Wa kan addana kelimo," Ashan ana ma ena, ana ma juzu min jessim," ashan huwo kelimo keda huwo ma min jessim? ¹⁷ Kan jessim kulu bes ena, anna be asuma kef? Kan jessim kulu bes addana, anna be shumu kef? ¹⁸ Lakin Allah retibo kulu juzo ta jessim ze ma Huwo salaw. ¹⁹ Kan kulu anna indo nefsa uddo ta jessim, jessim de be kun kef? ²⁰ Ashan keda fi adda ketir, lakin bess fi jessim wahid. ²¹ Enna ma be akeder kelimo le ida," ana ma muhtaj le ita." Wele rass be kelimo le kura," Ana ma muhtaj le ita." ²² Lakin adda ta jessim al gi zahi gali deaf humon yao muhim, ²³ wa ajza ta jessim al anna be fekir gali humon sukereen, kede anna wodi le humon karama keber, wa adda al me be akeder kashifubara indo karama akter. ²⁴ Lakin al gi ayno maf dai ashan be wodi le huwo karama, ashan huwo indo. Lakin Allah limo adda de kulu sawa, wa Huwo wodi karama kerit le del al ma indo. ^{25 27} Huwo amolu zede ashan ma be kun fi ingisam fi jessim al huwo kenisa, lakin kede fi ihtamam ta kulu adda ma badon ta tumon le maslaha ta jessim. ²⁶ Kan fi waja lw uddo wahid , humon kulu be waja, aw kan wahid wodi huwo karama, kulu adda be afrah sawa. Hasa anna jessim ta Messih wa kulu wahid uddo ta tuo. ²⁸ Wa Allah ayeno nas fi kenisa, nimra awel ta tomun rusul, itnen ta tuo anbiya, talata muderiseen, baad daak del al be amulo mujezat, yala mauhiba ta shefa, del al gi saido nas, del al gi ishtakal shukulat ta idara, wa wonosu be lugat al barao barao. ²⁹ Hal humon kulu rusul? Hal humon kulu anbiya? Hal humon kulu muderiseen? Sai humon kulu gi amulu mujezat? ³⁰ Hal humon kulu indo mawhiba ta shefaa? Hal humon kulu gi wonuso alsina? Hal humon kulu gi tergimu alsina? ³¹ kede itakum indo neya le mauhib al kebir. Lakin ana be wori le itakum le itakum ahsen seka .