¹ Dawro wa aino takum ana ze misal ze ma ana gi dawro wara Massih ze misal le ana. ² Ana murtah min itakum ashan itakum gi zekero ana fi kulu haja, wa itakum be amsuku gowii taliem ze ma wodi le itakum. ³ Ana azo kede itakum fahim galii Massih huwo yao ras ta kulu rajil, wa rajil yao ras ta mara, wa Allah yao ras ta Massih. ⁴ Kulu rajil bi selii aw be itnabaa wa huwo kati ras ta tuo huwo be jebu fadiya le nefsa ta tuo. ⁵ Lakin kulu mara be seli aw itnabaa wa heya ma kati ras ta tuo heya be jebo fadiya le nefsa ta tuo. Leano huwo gi geni ze haligo ras heya. ⁶ Leano kan mara ma be kati ras ta tuo, kede heya gata shar ta tuo guser. Ashan huwo fadiya le mara ashan be gata shar guser aw haligo ras, kede heya kati ras ⁷ Le rajil kede huwo ma kati ras, leano huwo yao sura wa mejid ta Allah. Lakin mara heya mejid ta rajel. ⁸ Leano rajil ma salao min mara, Lakin mara yao salao min rajil. ⁹ Wa rajil ma kalagu le mara. Lakin mara yao kalagu le rajil. ¹⁰ De yao sabab mara be kati ras ta tuo, ze alama ta sulta fugu heya wa ashan malaikat. ¹¹ Lakin fi Rabana, mara dero rajil ashan be saido heya, wa rajil dero mara ashan be saido huwo. ¹² Ze ma mara talao min rajil, kaman rajil tala min mara. Wa kulu haja ja min Allah. ¹³ Hakimu be nefsa takum: huwo kuwais le mara ashan be seli le Allah wa ras ta heya ma kati? ¹⁴ Tabeya be nefsa ta tuo ma be derisu itakum gali huwo fadiya le rajil ashan be kun indu shar towil? ¹⁵ Wa kan mara indu shar tawil de mejid le heya? Shar de wodi le heya ze hejab. ¹⁶ Lakin kan fi ai zol dero nakish fi kalam de, anna ma indu ai nashat tani, wele kenisa ta Allah gi amolu hajat de. ¹⁷ Ze ma ana wodi le itakum tawsiyat de, fi hajat al ana ma be shejao itakum fugu. Kan itakum gi lemo sawa, huwo ma le kuwais lakinle batal. ¹⁸ Awel haja ana asuma gali kan itakum gi ja sawa fi kenisa, fi ingisamat fi nus takum, wa ana sedegu kalam de. ¹⁹ Huwo kman lazim be kun fi nus takum, ashan be arufu de muno yao Allah rudu fi nus takum. ²⁰ Kan itakum be ja sawa, de ma yao ashaa ta Rabana itakum be akulu. ²¹ Fi zaman al itakum be akulu, kulu zol be akulu akel ta tuo gabl tanin ma akulu ta tuomon. Fi wahid be kun jeyan, wa tani be ashrab lahadi be tala sakran. ²² Hal itakum ma indu beyot al itakum be akulu wa ashrab fugu? Hal itaum be alisu kenisa ta Allah wa hagiru del al ma indu haja? Ana be kelimu le itakum shunu? Kede ana shejao itakum? Ana ma be shejao itakum fi hajat de! ²³ Al ana lego min Rabana yao ana wodi le itakum, be ino Rabana Yesua, fi bilel al selimo huwo fugu, huwo shelo aish. ²⁴ Baad ma huwo shukur, huwo kasuro wa kelimo," De yao jesem tai, huwo le itakum. Amulo takum zede le zekra tai." ²⁵ Be nefsa teriga huwo shelo kubaya baad ashaa, wa kelimo," Kubaya de ahaad jedid be dom tai. Amulo takum fi kulu marra al itakum be ashrab, le zekra tai." ²⁶ Ashan fi kulu zaman itakum be akulu aish de wa ashrab kubaya de, itakum be alino mutu ta Rabana lahadi ma huwo be ja. ²⁷ Ashan keda, ai zol be akulu aish aw ashrab kaubaya ta Rabana bedon hagg, huwo be kun muzneb fi dom wa jesim ta Rabana. ²⁸ Kede zol fahisu nefsa ta tuo awel, wa baad daak kede akulu aish wa ashrab min kubaya. ²⁹ Ashan zol al be akulu wa ashrab bedon maarafa ann jesim ta Rabana, huwo be akulu wa ashrab hukum le nefsa ta tuo. ³⁰ De yao sabab keterin fi nus takum humon deyifin wa ayanin, wa juzu min itakum mutu. ³¹ Lakin ka anna gi fahisu nufus tanna, ma be hakimu anna. ³² Lakin kan hakimu anna be Rabana, de le taadeb tanna, ashan ma be lego denuna sawa ma alam. ³³ Ashan keda akwana tai, kan itakum gi ja sawa le akulu, istena badun takum. ³⁴ Kan fi zol jeyan, kede huwo akulu fi beat, ashan kan itakum be ja wasa kede ma jebu hukum ta Allah le itakum. Wa fi bagi hajat al itakum katibu , ana be wodi tawjiha kan ana ja.