¹ Daud kan limu kulu roasa ta Israel fi orshelim : roasa ta gabael, roasa ta firae al gi akdim melik fi shokol al kutu umon, roasa ta alaf wa roasa ta miat, roasa ta kulu amwal wa amlak ta melik wata awolad towo, wa roasa alkadat, warijal al harb, zaed al indu maharat akatar. ² Biga Daud al melik kan wogif ma kura bitowo wa kelim,”asma takun le ana, akwana tai wa shaab tai. Ana kan gasid ashan ashan abinu beit al bi kutu fogo tabut al ahad / sanduk ta tifagiya ta yahwa, mahal al Rabuna bikutu kuraa towo, wa ana jahiz ashan bi abinu. ³ Lakin Rabuna kan kelim le ana, inta ma bi abinu hayikal le isim tai, ashan inta rajul al harib wa dofugu dom. ⁴ Lisa Yahwa, Rabuna ta Israel iktar ana min kulu alfi beit ta abu tai ashan bikun melik le Israel lel abad.Huwo kan iktar Yahuza reis/kaed, wa min beit ta Yahuza huwo iktar beit ta abu tai, wa min kulu awolad ta abu tai huwo kan moksut ashan kutu ana melik ta Israel kulu. ⁵ Min awolad ketir Yahwa wodile ana,huwo iktar weled tai siliman ashan bi geni fi kuris ta mamlaka ta Yahwa fogo Israel. ⁶ Huwo kan kelim le ana,’weled bitak siliman bi abinu beit tai. wa mabani janibia tai, ashan ana iktar huwo yekun weled tai, wa ana bikun abu bitowo. ⁷ Ana bisabitu mamlaka bitowo le abad, iza huwo eltezim le ehteram wasayawa kararat tai, ze inta alela: ⁸ Baden hasa, fi nazar ta kulu Israel, ijtima ta yahwa de, wafi gidam ta Rabana ta nina, intum kulu bi hafizu wa shilu kulu wasaya ta Yahwa Rabana takum. Amulu takum kalam de ashan intum bi meliku arid al kwesde wa sibu ze worisa le iyal al bija wara intum, lelabad. ⁹ Kaman le inta siliman weled tai, ehterim Rabana ta abu bitak, wa akdim huwo ma delba taki kulu wa ma roh ta irada. Amule kida ashan yahwa bi fetisu kulu gulub wa aruf kulu harak ta afkar. Iza inta fetisu huwo inta biligo huwo, lakin iza inta sibu huwo, huwo bi aba inta lelabad. ¹⁰ Kede inta aruf inu yahwa iktar inta ashan bi abinu hayikal de ze (mahal) maabad bitowo. Kun gowi wa amulu huwo. ¹¹ Biga Daud kan wodi le siliman weled bi towo kutat ta (misa) karita ta hayikal, makazin, odat al fok, odat al juwa, wa odat ta sanduk ta tifagiya (tabut al ahad). ¹² Huwo kan wodi le huwo kutat al huwo kan resimu le mabani ta atraf beit yahwa, kulu owad daera ta beit, makazin fi beit ta Rabana, wa kazaen le hajat al taabi le yahwa. ¹³ Huwo wodi le hu gawanin / nuzum le firak ta gusus wa lawiin, le mosouliat kasisu le kidma fi beit ta yahwa, wa le kulu adowat ta kidma fi beit ta yahwa. ¹⁴ Huwo wori wozin ta kulu hajat al min dahab le ayi kidma. ¹⁵ Wozin ta dahab le kulu adowat ta dahab, le hamalat ta lamba wa lambat min dahab, wozin taa dahab le kulu hmala ta lamba, wozin ta fida le ayi hamala ta a fida, hasa istimal ta ayi hamala fi kidma. ¹⁶ Huwo wodi wozin ta dahab le tarabezat al kubzleish ta hudur, le kulu tarabeza, wa wozin ta fida le tarabezat ta fida. ¹⁷ Huwo wodi wozin ta dahab sofi le maalig shok ta laham, teshitat, wa kubayat. Huwo wodi wozin le kulu sahana min dahab, wa wozin ta kulu sohana al min fida. ¹⁸ Huwo wodi wozin ta dahab al nedif le bokur ta mazbah, wa ta dahab le reism tesmin morakiba, ta kerubin al ajniha towo midu wa kati sanduk ta tifagiya tabut al ahad le yahwa. ¹⁹ Daud kan kelim “Ana katibu hajat de kulu ze yahwa kan wori le ana wa wodi le ana ashan bi fahim bes kusus tesmin.” ²⁰ Daud kan kelim le siliman weled towo, “geni gowi wa shuja. Amulu shokol, mata kafu awo rogus, leanu yahwa Rabuna, Rabana tai, ma inta. Huwo ma sibu inta wala aba inta lahadi shokol kulu le kidma fi beit ta yahwa bi kalasu. ²¹ Ayinu, del yau firak ta gusus wa lawiin le kulu kidma fi beit ta Rabana. Humon bikun ma inta, sawa ma rujal al mohirin al indu niya, bi saidu inta fi shokol wa amulu kidma, Roasa wa kulu nas jahizin ashan bi tabi taalimat bitak.”