¹ A wul shi tu, jom mya fuu, ''gya gon ɗa dleiwan ɗuu ɗaŋ ta yel mǝskǝn hŋ, hal she caa yel guŋdǝ Cognvon ya shiɗi tǝ vartǝwos.'' ² A kaar mbuɗkǝn lim gha, Yesu ta mbi Biturus tǝ Yakuɓ tǝ Yohanna tǝ tai cimshi dul wur fupmni, yanshi ngǝtnwos. ³ She dliwos ta sui a yirwasǝŋ. She luk dliwos ta sui nǝ fyali pak-pak yo ɗaŋ murghǝ mbaghǝn wos a dǝgn ɗa hŋ. ⁴ A kili gyes Iliya tǝ Musa tǝ bwaaɗi mǝnɗi ǝŋɗa tǝ ta ya wulghǝn viibtǝ Yesu. ⁵ Biturus ta su Yesu ɗa tu, ''malǝm, a ndara ɗaŋ mi ɗuun, gaami mǝ ndǝr vin mbuɗkǝn mayi, namboŋ kǝ Musa, namboŋ kǝ Iliya.'' ⁶ A kili gi a ta yisǝŋ ngǝtn ɗaŋ wo kon hŋ, durghǝ tu vǝrtǝ ta ngaɓshi washi. ⁷ A kili gi kurvon ta man dlǝpmshi washi. Yer won ta nyolɗi ɗa kurvones tu, ''gin nǝ kunetn ŋaa nyaritn. sǝn tǝ kǝǝm.'' ⁸ Gaɓak ɗaŋ tǝ ta yaal, tǝ ta man yel gonwom cimshi ɗa hŋ she Yesu ngǝtnwos. ⁹ Ɗaŋ tǝ ta ya shighǝnɗi ɗa yatl wuri, a ta caashi yir tǝ fuu gon ngǝtn yo ɗaŋ tǝ yeli hŋ, hal she ŋaa zaar a shishiɗi a giɓkǝ mǝn mǝskǝn. ¹⁰ Nǝ gi tǝ ta gaa vughǝneshi a dleiwasǝŋ tu, ''shishiɗi agiɓkǝ mǝn mǝǝskǝn'' Nǝ ni ghoi.? ¹¹ She tǝ ta ceɗ tǝ tu. ''nighǝn a ca mǝn yisǝŋngǝn ngǝtn ɗaŋ Musa dlyaaɗ tǝ wul a na ciɓ Iliya ghǝn tǝ man keniya?" ¹² A ta wulshi tu, ''kǝrǝŋ-kǝrǝŋ Iliya ǝŋ a man keni tǝ fuɗ ko ngǝrshi gyo ta nighǝn a ca nǝ dlyaaɗkǝn tu a naa ciɓ ŋaa zaar tǝ tlya forǝm mari-mari tǝ ndǝr tǝ sular tǝ nǝ gonwon ɗaŋ ci tǝ mbuni hŋe? ¹³ Beɗ tǝ gi mya fuuki tu Iliya a man ǝnda tǝ ta fitǝ kaɓ ngǝtn yo ɗaŋ vik Cogn kon a dulgamashi.'' ¹⁴ Ɗaŋ tǝ ta sushiɗi a mǝridǝn woshes, tǝ ta yel gutuli zaarsǝ ta ngilǝŋshi washi ǝnnda mǝn yisǝŋngǝn ngǝtn ɗaŋ Musa dlyaaɗ ca sǝǝɗyer cimshi. ¹⁵ paraɗ ɗaŋ tǝ yel Yesu, she a ta kwasar zarshes ɓuruk, tǝ ta kir tǝ tsaltǝ tǝ wurǝ tǝ. ¹⁶ A ta ceɗ mǝri dǝnwoshes ''nǝ nighǝn nda kya sǝrɗyere?'' ¹⁷ Gon a giɓ gutuli zarshes a ta sutǝɗa, ''malǝm,ma lǝǝr kunetn ɗi ɓaskǝ. ci tǝ zhipti won ɗaŋ ca ɗaktǝ a wulghǝn vi. ¹⁸ A kili yo ɗaŋ ya shishi tǝ mǝnɗi, ca mbi tǝ lii yatl yi ca viwos fi fufuki, mǝ kara mǝri dǝnwa tǝ ngyolar ti a ɗakshi'' ¹⁹ A ta sushi ɗa tu, ''kyani mǝn usuli gin ɗaŋ ki tǝ caaghǝn raa hŋ, hal dzaŋ gyo ghǝn mayi duŋvwa mǝ tsǝtn tǝ kyane? lǝǝrmǝn tǝ mǝnɗi.'' ²⁰ Tǝ ta lǝǝr kunes ɗi ɓastǝ. Ɗaŋ zhiptes ta yel Yesu, kyaɗ a ta mbi kunes tli ǝnnɗa dliwos yi wa dladlar. kunes ata mbi ɗaaɗi yatl ǝŋ viwos yi fi fufuki ɗi. ²¹ Yesu ta ceɗ daaghǝ kunes, ''ɗzaŋ gyo ghǝn ngǝrshi gin ngaɓ kunesso? Daaghǝ kunes ta suɗa tu, ''ɓanɗǝŋ a ŋaawos.'' ²² A tlyatǝ liiɗkǝn giɓ wuɗ tǝ giɓ zha durghǝ tu tǝ ɗuti. ǝŋ yaan ka ɗyaa ka fi ngǝtnwoni, yel gwanɗǝwopm a sommiɗa.'' ²³ Yesu wul tǝ tu, ''ǝŋ yaan ma ɗya ya? ai koni nǝ ngǝtnngǝ ɗyaghǝn a daas yo ɗaŋ citǝ caaghǝn raa'' ²⁴ Kyaɗ she murghǝ ɓwaghǝn kunes gǝm vii tu, ''mǝ tǝ caaghǝn raa! som mǝn ɗaɗkǝn caaghǝn ratn ɗa'' ²⁵ Ɗaŋ Yesu ta yel gutuli zarshe a kitar maghǝn ɗi ɓashi, a ta dlwaa yer kuskǝ zhiptes tu, ''kyaan mǝnɗǝ, nǝ bǝndǝŋǝi, mya caaghǝ tu a nyoliɗi ɓastǝ, a man nda ɓastǝ ɗa hŋ.'' ²⁶ ̀Mǝndes ta gǝm vi mbi kunes lii yatl, nyoli ɗi. kunes ta yaal ɗaŋtu nǝ gyo ɗaŋ a mǝshi, hal zarsǝ tǝ ta ya wul tu, ''a mǝshi'' ²⁷ Yesu ta ngaɓ taas woshi mbi tǝ dluri she kunes ta dlǝrni. ²⁸ Ɗaŋ Yesu ta ndai ɗa viini. she mǝri dǝnwos tǝ ta ceɗ a lǝǝɓ waɗi tu, ''ni ghai caa ghǝn mǝ ɗyaa mǝ nyolar hŋe?'' ²⁹ A wul shi tu, ''naa ngǝrshi gin yi nyol hŋ she tǝ karaghǝn Cogn.'' ³⁰ Tǝ ta nywaali ɗi ɗan she tǝ kǝǝn giɓ Galilii. A ta suu gon tǝ yisǝŋ lǝǝɓ yo ɗaŋ cighai hŋ, ³¹ duryo tu a ta yi a kuɓarghǝn mǝri dǝnwos. A ta wulshi tu, ''ta vǝr ŋaa zaari a taas zarsǝ, ta ɗuti, ǝŋ ya mǝshi, a dzaŋ kǝ mayi wa shishi.'' ³² Beɗ tǝ gi, tǝ yisǝŋ deghǝ ves hŋ, vǝrtǝ ta ɗakshi a ceɗkǝn wos saɗ. ³³ Ɗaŋ tǝ ta ndai ɗi Kafarnahum. Ɗa kaari ɗaŋ a ta ndai dǝn a ta ceɗshi tu, nghǝn kya wul vii ghai a datǝpe?'' ³⁴ Beɗ tǝ gi ta mwaali. Duryo tu ciyi a wulghǝn tǝ dlǝŋsǝ wasǝŋ tu, nuu amoɓ luughǝnno. ³⁵ Ɗaŋ a tsǝtnni, she cim dzuɓtliti mbǝtlǝmes lǝǝɓ nanboŋ wulshi tu, ''ǝŋ yaan gon ca suu tǝ naa nǝghǝ keni, a naa ciɓ tǝ naai nǝkǝ njwaati, nǝ mon konu.'' ³⁶ A ta mbi ŋaa njwaan gǝm a dlie wasǝŋ. a ta mbiiti ɗatǝ gyaŋmuŋ wulshi tu, ³⁷ ''Ɓuruk gyo ɗan ya kaɓ ŋaa njwaan ɗaŋ gin a giɓkǝ sǝǝman, a kaɓni myaanngǝndi, hal tǝ gi ɗaŋ a shinǝm ɗi.'' ³⁸ Yohanna wu tǝ tu, ''malǝm, maa yel gon gha nyolarghǝn mǝnɗǝŋsǝ a giɓ sǝəm wa, mǝ ɗaghartə duryo tu ci ɓasmi hŋ.'' ³⁹ Beɗ tǝ gi, Yesu wul tu, ''ɗagharǝntə hŋ, duryo tu gon wan wo fi laaghǝ vartə won a giɓ sǝəman, ɗa kaari ǝnda yi kwan kusǝŋsǝ ngǝtn a dul gaman hŋ. ⁴⁰ Ɓukuk gyo ɗaŋ ca nyaŋngasmi hŋ cinǝ gom. ⁴¹ Ɓuruk gyo ɗaŋ ya vǝr koɗ zha a tlya nǝ duryo tu kinǝ kǝ Ɓorghən kǝ Cogn, jom mya fuuki, wo naa mbuniwos hŋ. ⁴² Ɓuruk gyo ɗaŋ ya caa namboŋ a giɓkǝ mǝrin ɗaŋ caa caa raa ɓasǝm ngaghǝn yasǝŋ, wo moɓ dashi gi cii mbi dǝllǝ puusbvuun tǝ naɗtǝ mǝn a yer tǝ gǝmti dǝllǝ zha. ⁴³ Ǝŋ yan taaswa ca caaghǝ malghǝn, wo moɓkǝ mǝn a dzakti. wo moɓ a nda dǝn Cogb tǝ taas nǝ nɗuri, ɗaŋ a ndai giɓ wuɗ tǝ taas wa beɗ mbǝtlǝm a giɓ wuɗ ɗan caa mbǝtsǝ hŋǝi. ⁴⁴ ''Lǝǝɓi ɗaŋ zhiɓǝrwos caa mǝǝs hŋǝi, wuɗes beɗ caa mbǝtsǝ hŋ. ⁴⁵ Ǝŋ yan yasǝŋ wa caa ghǝ malghǝn, dzaktǝ a kuri. wo moɓ kǝ mǝn a ndai dǝn Cogn tǝ yasǝŋ namboŋ, ɗaŋ a ndai tǝ yasǝŋ wa mbǝtlǝm giɓ wuɗ. ⁴⁶ Lǝǝɓi ɗaŋ zhiɓǝrwos caa mǝǝs hŋǝi, wuɗes beɗ caa mbǝtsǝ hŋ. ⁴⁷ Ǝŋ yan yirwa ca caaghǝ maalghǝn, dliti a kuri. wo moɓ kǝ mǝn a ndai giɓ guŋndu Cogn tǝ yir namboŋ, ɗaŋ a naa tǝ yir mbǝtlǝm beɗ tǝ gi tǝ ggǝmghǝi giɓ wuɗ. ⁴⁸ lǝǝɓi ɗaŋ zhiɓǝrwos caa mǝǝs hŋǝi, wuɗes beɗ caa mbǝtsǝ hŋ. ⁴⁹ Durghǝ tu tǝ wuɗ ǝnnda ta tsǝnnga konu ghai. ⁵⁰ Maas a ndara, beɗ tǝ gi ǝŋ ya bǝǝltǝ tǝ wusǝŋngǝn wos, wo fi wuri ǝnnda ka sulartǝ wusǝŋ-wusǝŋ ɗe? naa tǝ wusǝŋngǝn ɗaŋ maas a dlei wan, a naa nǝ mǝn tsǝtnngǝn wusni tǝ konu.