¹ Yesu ta ga te lǝɓi gi a ta tlii te Yahudiya tǝ te dlari rupm Urdun. shezarsǝ monnda tǝ ta laɓ tə, cata yi ɓashi zhiɗkǝn ɗaŋ ca fi. ² she Farisiyawa tǝ ta man ɓastǝ tǝ, tǝ dyiɓtǝ tǝǝ ta ceɗ tǝ tu, ''a ndara zaar tǝ gǝm gǝɗi woshiya?'' ³ A ta sushiɗa tu, ''Musa ta wul ki tu ni?'' ⁴ Tǝ ta wul tu, ''Masa ta wul mii ghai tu zaar tǝ dlyaaɗ tagarta gǝmghǝn tǝ vǝr gǝɗi wos, tǝ gǝmtǝ tǝ tlii.'' ⁵ Yesu ta wulshi tu, ''a ta nǝ ɗakkǝn wan ǝŋ a ta dlyaaɗ ki bwarki gi mǝn''. ⁶ ''Beɗ tǝ gi, a ndǝr ghǝn dǝŋ keni, Cogn ta ndǝr gǝɗ tǝ momwan. ⁷ Nǝ dei gin ǝŋ momwan wo ɓǝǝl tǝ tǝ daagos tǝ naagos wo na tǝ gǝɗi wos kurum. ⁸ Yashi mbǝtlǝmi ta nai namboŋ.' nǝ durghǝ gi ci mbǝtlǝm ɗa hŋ, tǝǝ naa nǝ dlii namboŋ. ⁹ Nǝ ngǝtn yo ɗaŋ Cogn kaaŋ gon tǝ ɓǝl shi hŋ.'' ¹⁰ Ɗaŋ tǝ ta gya giɓ dǝn, she dǝn wos tǝ ta ceɗ nǝ viigin ɗa. ¹¹ A ta wul shi tu, ''gyo daŋ ya gǝm gǝɗi woshi a kaɓ gon ɗa, ca fi nǝ mbǝllǝ tǝ yaan. ¹² cik kǝn gǝɗ ya gǝm tur woshi ya kaɓ turi gon ɗa ca finǝ mbǝllǝ tǝ yaan.'' ¹³ She zarsǝ tǝ ta lǝǝr mǝri wasǝŋ di tu tǝ tiin shi beɗ tǝ gi mǝri dǝnes tǝ ta dlwa shi yer. ¹⁴ Beɗ tǝ gi, ɗaŋ Yesu ata yisǝi ata poltǝ ghai hŋ, she ata wul shi tu.. ''gaan mǝri-mǝri tǝ man ɓasǝm, aa kaɗ shi ghai hŋ dur yo tu guŋndǝ Cogn nǝ ghǝ gya gi ɗaŋ cinǝ daŋ yanshi, ¹⁵ Jom-jom mya fuu ki tu konu ɗaŋ wo guŋndǝ Cogn ɗaŋ gyo ɗaŋ ŋa-ŋaa ca kaɓ hŋ, wo nda ghai hŋ shaŋtaŋ.'' ¹⁶ she ata nyomshii a gyaŋ wos gǝmshi mbuniwos mǝn ¹⁷ Ɗaŋ ata nguɓ tlǝǝghǝ she murwon ta kiir man ɓastǝ, man dzuɓni a ken wos man ceɗ tǝ tu, ''malǝm murghǝ mbuni, nǝ ni gǝn ma fi mǝ tu raa nɗok-nɗoki?'' ¹⁸ She Yesu ta wul tǝ tu, ''ni ca kǝ cimǝ tu, murghǝ mbune? Gon cinǝ mbuni hŋ, She Cogn ngǝtn wos. ¹⁹ Kaa yisǝŋ mborki Cogn, ɓak ɗuu zaar hŋ, ɓak fi mbǝllǝ hŋ, ɓak ci mǝǝr hŋ, ɓak tlya zha mbyerni go mǝn hŋ, a kaɓ ngǝtn gon mǝn tǝ tlyaghǝn hŋ, Zhiim daagwa tǝ naagwa.'' ²⁰ She mures ta wul tǝ tu, ''malǝm, ngǝrshi hya gi ɓukuk ma taa laaɓshi ɗaŋ mǝ ta yi nǝ tlǝɓǝr. ²¹ She Yesu ta yaal yeltǝ yelghǝn suughǝn, she wul tǝ tu, ''ngǝtn namboŋ a naa ghǝ, tlǝ a ɗiɓar ngǝtn yo ɗaŋ kǝ yiir ɗeɓaɗ a ɓǝǝl gya naakui mǝn, ka tu ndaghǝnni gaam. She a man laaɓǝm.'' ²² ɗaŋ ata wumi cik she raa wos ata malari, ata tlii tǝ raa nǝ malarghǝnni duryo tu cinǝ murghǝ tughǝnni naŋ. ²³ Yesu ta yaal yel mǝri dǝn wos she ata wul tu, ''yi ɗak-ɗak mǝn tughǝn tǝ nda a guŋdǝ Cogn. ²⁴ Ves ta kwasar mǝri dǝnwos, beɗ tǝ gi Yesu wul shi ɗa tu, murghǝ ndaghǝn guŋndu Cognvon yi ɗak-ɗak! ²⁵ Amoɓ swaɗi rakumi tǝ latsǝ a giir aliɓra ɗaŋ murghǝ tughǝn tǝ ndai guŋndǝ Cognvon. ²⁶ Ves ta kwasar mǝri dǝn wos she tǝ wul dlǝŋsǝ wasǝŋ tu, ''yan yi cik ta nu ǝŋ wo fuɗiyo?'' ²⁷ Yesu yaal yelshi she ata wulshi tu, ''a zarsǝ nǝ ndzar ɗi, beɗ tǝ gi koni nǝ ngǝtn ghǝn a Cogn. ²⁸ She Biturus ata wul tǝ tu, ''yeli maa ga koni mǝ laaɓ kǝ. ²⁹ Yesu ta wulshi tu, ''jom-jom may fuu ki tu konu gaa dǝnsǝ ko yestǝ, ko watsǝktǝ, naktǝ, daktǝ, mǝri, tǝ kitn nǝ dur ratn tǝ vik wusǝŋnin, ³⁰ Ɗaŋ wo naa tughǝn ngǝtn yo ɗaŋ a tul tǝm kuri ɗaŋ gii ɗaŋninɗa a ɗǝki gin: dǝnsǝ, yestǝ tǝ wasaktǝ tǝ naaktǝ tǝ mǝri tǝ kitn tǝ buŋngǝni, ǝŋmda a ɗǝki gi wo tu raai. ³¹ Beɗ tǝ gi gya gon ɗaŋ cii ken ta naai kaar, gya gon ɗaŋ cii kaar taa naai ken. ³² Cigha ringhǝn caa man Urshelima, Yesu a ndashi ɗa keni ngǝrshi pwa mǝri ɗǝn woshi, zarsǝ ɗaŋ ci ɓashi laaɓkǝn vǝrtǝ ɗushi wasǝŋǝi. She Yesu a man byak dzuɓ tliiti mbǝtlǝme shi ata nguɓ shi fuughǝn ngǝtn ɗaŋ wo tutǝ ya ngalai: ³³ Yellǝn mya tlǝn Urshelima ta vǝr ŋaa zaari a taas dǝllǝŋsǝ pǝris tǝ malǝmshi mǝn yiseŋngǝn ngǝtn ɗaŋ Musa dlyaaɗ. ³⁴ Taa ngyer vii ɗughǝn woshi ta vǝr tǝ a taas gya gyo ɗaŋ cinǝ Yahudawa hŋ taa rii tǝ kaar, ta pyatsǝ tǝ nyognvi, taa voɗ tǝ ɓoɓtsǝ, ttaa ɗuuti, ya ɓuɗi mayi woshi.'' ³⁵ Yakuɓ tǝ Yohanna mǝri zabaɗi tǝ ta man tǝ man wul tǝ tu, malǝm, mya suu a fimii koni ɗaŋ mǝ karaghǝ ɗa. ³⁶ A wulshi tu, ''nighǝn kya suu mǝfi ki mǝn ne?'' ³⁷ Tǝ wul tǝ tu, ''gam mǝ tsǝtn cinghǝ ndzǝkni, gon a taaghǝ zarriwa, gon a taaghǝ naɓti wa.'' ³⁸ Yesu sushi ɗa tu, ''ka yisǝŋ ngǝtn yo ɗaŋ kya ceɗ hŋ, ka tlya kǝ zha a koɗ yo ɗaŋ matlya ko ka dlu vwa tǝ baɓtima yo ɗaŋ ta fim mǝna? ³⁹ She tǝ wultǝ tu, ''ma ɗyai'' Yesu wul shi tu, ''zhak koɗ yo ɗaŋ ma tlya kyani ka tlya ɗaŋ, baɓtisma yo ɗaŋ ta fim taa fiki ɗaŋ. ⁴⁰ Beɗ tǝ gi, tsǝtnngǝn a taaghǝ zaaryatn ko taaghǝ naɓtyatn nǝ ngǝtn ɗaŋ ma vǝr hŋ, nǝ kǝ gya gyo ɗaŋ taa ɓumtsǝ shi mǝn. ⁴¹ Mǝri dǝn wos dzuɓ ɗaŋ tǝ naai, tǝ wum gin she tǝ ta ngaɓ loŋsǝ gya Yakubu tǝ Yohanna. ⁴² Yesu ta cimshi ɗi ɓastǝ wul shi tu, ''kaa yisǝŋ tu gya gyo ɗaŋ taa yisǝŋ a guŋndu gyavgyo daŋ cinǝ Yahudawa hŋ, caa mwaaɓ shi guŋsǝ varaŋshi wasǝŋ cayi zhiɗ shi vartǝ. ⁴³ Beɗ tǝ gi, wo naa cik a dlei wan hŋ. Kaɓ gyo ɗaŋ caa ŋaal tǝ naai nǝ kǝ vari a dlei waan, ciɓ tǝ naai nǝ mon waan. ⁴⁴ konu ɗaŋ caa suu tǝ naai ken a dlei waan, ciɓ tǝ naai ngǝ konu. ⁴⁵ Nǝ durghǝ gi ghǝn ŋaa ghǝ zaar a man tu tǝ fi tǝ laa mǝn hŋ, she yan tǝ fi shi mǝn. Tǝ ndǝr tǝ vǝr raawos a bamvi zarsǝ monnda. ⁴⁶ Ɗaŋ tǝ ta tuliɗi Yeriko, ci gha durghǝ nyolngǝn tǝ ga Yeriko ǝnndi, yan tǝ mǝri dǝnwos tǝ zarsǝ monnda, she dwaan wan ghǝni ɗaŋ caghai karaghǝn ngǝtn, sǝǝm wos tu, Bartimawus kuni Timawus cigha tsǝtnngǝn a datǝpm. ⁴⁷ Ɗaŋ a ta wum tu nǝ Yesu mǝn Narareɗ ghǝn cigha laatsǝ ghǝn, ata nguɓ vii tlya-tlya tu ''Yesu kuni ghǝ Dauda yal gwandǝan!'' ⁴⁸ Zarsǝ monnda tǝ ta dlwaa tǝ yer tu mwaali she daɗak dlarghǝn vesghai tlya-tlya yi wul tu, ''kuni Dauda yel gwaandǝan!'' ⁴⁹ Yesu ta dlǝri wulshi tu, ''cimǝn tǝɗi'' she tǝ ta wul dwaanes tu, tlya moɗa shihi ɗi ca cimghǝ.'' ⁵⁰ Dwaanes ta kur lǝŋsǝ woshi kiir tlii a Yesu. ⁵¹ Yesu ta ceɗ tǝ tu ''kya suu mǝ fighǝn ni mǝne?'' dwaanes ta wul tu, ''malǝm, mǝ tu yalghǝnni.'' ⁵² Yesu ta wul tǝ tu, tlǝ ngǝtn wa caghǝn raawa a fuɗ kǝi, ɗa ɗan kyaɗ yir wos ta yali, ata laaɓ tǝ.