¹ Ɗaŋ Yesu tayi gaghǝni dǝn ngǝ Cognvon gon a giɓkǝ mǝǝri dǝn wos a wul tǝ tu, "Malǝm yaal aa yel ndaraghǝni puushi gyagin tǝ ndaraghǝni dǝnsǝn." ² A wul tǝ tu, "Kǝ yel dǝllǝŋsǝ dǝnsǝnni ya? Puus won namboŋ ɗaŋ wo naa a dulghǝ kamshi ɗaŋ ta paa ta gǝm hŋ. ³ Ɗaŋ a tsǝtni a dul ghǝ wuur ghǝ zaitun ɗaŋ yi dlari tǝ dǝn ngǝ Coghei, Biturus, Yakub, Yohanna tǝ ceɗ tǝ nǝ waaɗi, ⁴ "Fuu mi ɗi, dzaŋgyo ghǝrshi gyagin ta fio?Nii ghǝn wo Zhiɗ tu ngǝrshi gyagin ta nguɓe?" ⁵ Yesu nguɓshi wulghǝn tu, "Ɗaghǝn ɗa mbun mbun kaɗ gon tǝ maalar ki waanii hŋ. ⁶ Monnda ta man tǝ sǝmatn tǝ wul tu, 'Myan mi yaanio, tǝ maalar monndai. ⁷ Ǝŋ kyaa wum vik maandǝ tǝ ŋalarghǝni vik maandǝ, ɓak vuu hŋ; ngǝrshi gyagin ciɓ she yaa fishi waashii, beɗ tǝ gii ɓanngǝnes aa fi hŋ. ⁸ Yaan tu zarsǝ ghǝ yaatli gon ta shisher zarsǝ ghǝ yaatli gon mǝn, guŋndu gon wo shisher guŋndu gon mǝn. Yaatl mari mari ta zhighǝɗi tǝ ndaghǝni kusuŋ. Gyagin ngǝn ci gǝmngǝn daɗi ghǝ wumngǝni vwak ɓwaaghǝni. ⁹ Tsǝtǝn gwaam. Ta tlǝǝr ki waanii a ken mǝn yaatl, ta voɗki waanii viin laadi Yahudawa. Ta tlǝǝrki, ka dlǝǝrni a ken gya goɓna tǝ gya guŋsǝ nǝ duratn, kǝ tlyam zha mǝn. ¹⁰ Beɗ tǝ gii ciɓ keni she yaa fuu vik wusni yaatl ɓuruk. ¹¹ Kǝŋ yaa nyomki waanii, ɓak vuu nǝ ngǝtn yo daŋ ka kon hŋ. Yaan tu daɓag a kiles ta vǝrki ngǝtn yo ɗaŋ ka konii; wo naa tu kyaani ghǝnda kya wul vi hŋ; beɗ tǝ gii nǝ zhipti var. ¹² Zaar wo ver vi yesashii tǝ ɗu tii, tǝ daktǝ wo vǝr ŋaa woshii. ¹³ Ko nuu wo nyaŋngaski nǝ sǝmatn. Ko nuu ɗaŋ yaa dluu vwaa hal ɓanngǝnes ta vum tii ¹⁴ Ǝŋ kya yel ngǝtn ngǝ nyaŋ tǝ kemaskǝni a dlǝǝrghǝni a lǝɓ yo ɗaŋ a ndara tǝ dlǝǝr ghai hŋ ( kyan murghǝ kwaanngǝni yisǝŋǝi), gyagyo ɗaŋ ci giɓ yaatl Yahudiya tǝ kirr tǝ tai wuur, ¹⁵ yan kigha dulghǝ viin aashii ɗi giɓ dǝn hŋ, ko tu aa nyolar ngǝtn wonnii hŋ, ¹⁶ yaan kigha dǝǝl ɓak sughǝɗi tu kya mbi ngǝtnwon hŋ. ¹⁷ Beɗ tǝ gii a gir mǝn mǝǝri tǝ mǝn maam tlyaghǝn a mbuɗkǝni gyagii! ¹⁸ Karan tu kaɗ gii tǝ man a kili yetar ḣŋ. ¹⁹ Yaan tu dǝllǝ ghǝ buŋngǝni wo mbwaaɗi gyo ɗaŋ tayi nda ghai dzaŋgon hŋ tun ɓaandǝŋ a gǝmngǝn daɗes, ɗaŋ Cognvon ta ndǝǝr ɗǝgn, hal ɗan ɗaŋngǝnin, annda ta man fi ɗa hŋ hal nǝghǝ mbeɗi. ²⁰ She de Daadǝn ya woɗ mbuɗkǝnii ba cig hŋ ta vum gon hŋ. Beɗ tǝ gii nǝ gya gyo ɗaŋ taa waar shi waasǝŋǝi gyagyo ɗaŋ a bwaashi waasǝŋǝi wo caa mbuɗkǝnes wo naa ŋaa njwatn. ²¹ Kǝnnda ǝŋ gon ya wulghǝ tu, 'Yel gii ɗaŋ nǝ mborghǝnii ɗuunio, ko, Yel yanci ɗii,' ɓak caa raa ghai hŋ. ²² Yaan tu mǝn mberni taa mbwaaɗi monnda tu yaŋshi ghuŋ ci gyo ɗaŋ taa ɓortii, tǝ mǝn shinngǝni Cognvon, ta fi ngǝtngǝ kwasarghǝni tǝ ngǝrshi gyagon monnda, nǝ durghǝ tu tǝ mor lǝɓ,ǝŋ yaan ta kǝǝmii ci yi beɗ tǝ gyagii ɗaŋ nǝ waarghǝnii. ²³ Mbǝrǝn ki waanii! Maa fuuki ngershi gyagin annda kili waasǝŋ. ²⁴ Beɗ gii a kaar buŋngǝni gyagin, kǝ dzanyi gya ges, dzaŋ wo diɓi, lǝpm wo man mbaa ɗa hŋ, ²⁵ gya caar ta vunndai ɗi gaami tsogn, tǝ vartǝ yo ɗaŋ ci gaami ta zhighǝɗi. ²⁶ Kǝnnda ta yel ŋaa zaar cigha manngǝnɗi a giɓ kurvon tǝ vartǝ wos monnda tǝ zǝkkǝni wos. ²⁷ Kǝnnda wo shin zhipti shinngǝni wos.Wo jwaam mǝnyo ɗaŋ cinǝ bwaaghǝni ɓuruk ate bandi gǝshi tǝ bandi gaami, tǝ banndi zaari tǝ banndi naɓti, gyo ɗaŋ tǝ poktii yatl tǝ poktii gaami. ²⁸ Kuuɓǝn ngǝtn won a gwaas gwaam, kyaa naa yel dlaŋri ya nguɓ ɗǝǝlghǝn kǝ yisǝŋǝi tu waatlǝŋ aa naa mel. ²⁹ Yi cig ɗaŋ, ǝŋ kya yel yaa nguɓ ngǝrshi gyagin fighǝni aa yisǝŋ tu ci mel, ndok tǝ ken ɓiil. ³⁰ Jomi mya fuukini usuli gin wo laatsǝ hŋ she yaa fi ngǝrshi gyagin nii. ³¹ Gaami tǝ yaatl ta laatsǝi, beɗ tǝ gii, vietn wo laatsǝ hŋ hal nǝghǝ ndok ndoki. ³² Beɗ tǝ gii a dulgaam dzanyi ges, ko kiles, gon won ɗaŋ a yisǝŋ hŋ, hal ko yaŋshi zhipti shinngǝn Cogn gaami, ko yaan kunes,beɗ tǝ gii she Daashes. ³³ Mbǝrǝn ki waanii! Gaan yirr durghǝ yo tu kǝ yisǝŋ yini a kili gyo hŋ.(Ndosaŋsǝ tǝ tagarta gyagon tǝ dlyaaɗ tu,Naan gwaan gaan yirr tǝ karaghǝn nǝ dur yo tu.. ³⁴ .Yini ɗaŋ muryo ɗaŋ a tlii riighǝni a gaa dǝn woshii, she a gaa monsǝ wos tǝ paŋ dǝnes, ko gyo tǝ laa wos, a fuu mǝn yaalgheni ɗa nǝ dǝni tǝ naa gwaam. ³⁵ Nǝ durghǝ gii naan gwaam durghǝ yo tu kaa yisǝŋ ko a kili gyo ghǝn murghǝ dǝni wo mani hŋ. Wo ɗyaa manni sutua, nǝ dlǝk kaviɗ kǝ varra, nǝ kili gǝmngǝn vii geria, ko nǝ ɓitlndi. ³⁶ Ǝŋ ya mbwaaɗi gaɓag kaɗ tǝ man tughǝ a kuci hŋ. ³⁷ Ngetn yo ɗaŋ mǝ fuu ki mǝ fuu ni ko nuu: Gaan yirr!