^{3 1} Yesu ta nguɓ shi zhiɗkǝn ngai tǝ yerghǝ vii. Wul tu, "Murwon gii kitn darndu dǝn, ngirǝŋ tii tǝ darne,ɓǝl giir tsaɗkǝn zhak darnduos. A nal viin ɓuɓ ndǝr gaa kiti a mǝn laaghǝ kiti a taas mǝn laaghǝ kiti tlii riighǝn. ² Ɗaŋ kiles tuliɗi she a shin mon wos won a mǝn laaghǝ kiti tǝ kaɓtǝ guuri gyagon mǝn ɗi kǝ gwaas darnduos. Beɗ tǝ gii, tǝ ta ngaɓ tii tǝ voɗ tii tǝ gaa tǝ tlii taas vati. ⁴ Ata shin moni gon ɗa, tǝ ta ngaa tǝ wus ka gaam tǝ sular tǝ nǝ ngǝtn ndzuun. ⁵ Hal ghǝni ata shin gon ɗa, gin ngǝn tǝ ta ɗu tii. Cikkǝn tǝ ta fi tǝ gyagon monda, tǝ voɗ gya gonnii, tǝ tlaa gyagonnii. ⁶ Hal ghǝni ata yir namboŋ gonda ɗaŋ wo shin,ŋaa, suughǝn wos. Yaan ǝŋ ata yi nǝ zaar kǝ kaari ɗaŋ ata shin. Ata wul tu,"Ta yel luughǝn kunetn. ⁷ "Beɗ tǝ gii mǝn laaghǝ kites tǝ wul dlǝŋsǝ waasǝŋ tu, "Gin ngǝn cinǝ gami wos. Manǝn mǝ ɗu tii, duules wo naai nǝ gopm." ⁸ Tǝ ta ngaɓ tǝ tǝ ɗu tii tǝ kur tii a laŋsǝ kitn darndu dǝnes. ⁹ Nǝ gii nii ghuŋ murghǝ kitn darndu dǝneswo man fi tǝ mǝn laa ghǝ kitn darndu dǝnes see? Wo man datsǝ mǝn laa ghǝ kitn darndu dǝneshii vǝr kiti gyagon. ¹⁰ Kaa kwaan vik Coki gin hŋaan? "Puushi gii ɗaŋ mǝn nalghǝn viin tǝ nyaŋngashii, yaan nguŋ a naa nǝ puus gyetlei. ¹¹ Gin a Daadǝn nǝ ngǝtn ngǝ kwasarghǝn a yir wopm.' ¹² "Tǝ ta ŋal tǝ ngaɓ Yesui, beɗ tǝ gii tǝ ta cl vǝrtǝ zarsǝ nǝ durghǝ yo tu taa yisǝŋǝi tu a kon yerghe vii gin a dulgama waasǝŋ. Nǝ gii tǝ ta gaa tii tǝ ngaɓ tǝpm tǝ tlii ¹³ She tǝ ta shinndar tǝ Farisawa tǝ Hiridiyawa gyagon mǝn tǝ ngaɓ tii nǝ konngǝn vii wos. ¹⁴ Ɗaŋ tǝ ta man, tǝ wul tǝ tu, "Malǝm maa yisǝŋǝi kya vuu tǝ ɓitalghǝn gon hŋ, kha zhiɗ ni tǝpm Cogn naa jom jomni. Yi waari mǝ vǝr zhakka Kaisaraa ko yei? Mǝ vǝraa ko mǝ vǝr hŋaa? ¹⁵ Beɗ tǝ gii Yesu aa yisǝŋ kuuskǝn waasǝŋǝi, a wulshi tu, "Kyaa diiɓǝm nǝ nii? Lǝǝrǝm wurɓa mǝn ɗi mǝ yeli." ¹⁶ Tǝ lǝǝr Yesu mǝn ɗi namboŋ. "Nǝ zhipti ghǝ nuu ghǝn yi ɗuunio?" ca wulshi, tǝ wul tu,"Nǝ kǝ Kaisar." ¹⁷ Yesu wul tu, "Vǝrǝn Kaisar ngǝtn yo ɗaŋ nǝghǝ Kaisar,aa vǝr Cogn ngǝtn yo ɗaŋ nǝghǝ Cogn. Ata kwasarshi nǝ ŋaanyi hŋ. ¹⁸ She Sadukiyawa yaŋshi ɗaŋ caa wul tu shishighǝn mǝn mǝskǝn ɗa hŋ, tǝ ta man ɓastǝ tǝ ceɗ tǝ tu, ¹⁹ "Malǝm, Musa dlyaaɗ mi mǝn tu yeskǝ zaar ya mǝs ɗaŋ a gaa gǝɗi wos tǝ ŋaa hŋ, mures tǝ kǝǝn gǝɗi yesashii, tǝ ɓwaa mǝǝri yesashi mǝn." ²⁰ Gya yestǝ won tǝ tayi wottsǝmai; kǝ nambonyi ta kaɓ gǝɗ, ata mǝshi a gaa mǝǝri hŋ. ²¹ Cikkǝn kǝ mbǝtlǝmi ta kǝǝn gǝdeshii, yaanvma a mǝshi a gaa mǝǝri hŋ. Kǝ mayes ma cikkǝn ci. ²² Ɗeɓaɗ wottsǝmaiyi tǝ ta gaa mǝǝri hŋ. Ɗa kaari ɗeɓaɗ gǝɗes ta mǝshii ɗaŋ. ²³ A shishighǝn mǝn mǝskǝn, ǝŋ caa shishi ɗa gǝɗes wo naa nǝghǝ nuu? Durghǝ tu ɗeɓaɗ yestǝi wottsǝmaiyi taa kaɓtǝ nǝ gǝɗi waasǝŋ." ²⁴ Yesu wul tu, "Tǝ dyak gin ngǝn kyaa maal hŋaa, durghǝ tu kaa yisǝŋ vik Cogn tǝ vartǝ Cogn hŋaan? ²⁵ Yini tu ǝŋ yaa shishi tǝ mǝn mǝskǝn, kaɓkǝn gǝɗ ɗa hŋ, cikkǝn verghǝn gǝɗ ɗa hŋ, beɗ tǝ gii cini ɗaŋ zhipti shinngǝn Cogn gaami. ²⁶ Beɗ tǝ gii a dulgaam mǝn mǝskǝn ɗaŋ ta shishi, kaa kwaan hŋaan a giɓ ngǝtn yo ɗaŋ Musa dlaaɗ ɗaŋ Cogn wul tu, 'Myan mi Cogn ngǝ Ibrahim tǝ Ishaku tǝ Yakuɓ hŋaa? ²⁷ Cinǝ Cogn mǝn mǝskǝn hŋ, nǝghǝ mǝn gwaam. Kǝ maali monnda." ²⁸ Namboŋ a giɓkǝ maalǝmci ghǝ attaura ɗaŋ a wumshi gha wulghǝn vi tǝ dlǝŋsǝ waasǝŋ; a yel tu Yesu ca sushi ɗa ɗa giiri. A ceɗ tu, "Nǝ mborki yo ghǝn a ndara moɓ ɗeɓaɗɗo?" ²⁹ Yesu su ɗa tu, "Kǝ ndaraani ɗeɓaɗ, aa 'Wumǝn Isar'ila, Daadǝn wopm Cogn, Daadǝn ci namboŋ. ³⁰ Yi ciɓ aa suu Daadǝn Cogn wa tǝ ɗeɓaɗ ɓitalghǝn wa, tǝ raa wa tǝ ɗeɓaɗ tlyaaghǝn wa.' ³¹ Mborki kǝ mbǝtlǝmi nǝ gin, "Yi ciɓ aa suu muryo ɗaɗ ci mel tǝ kyanɗaŋ gama.'Mborki won ɗa ɗaŋ tǝ man moɓ gyagin ɗa hŋ." ³² She Malǝm kǝ mborki Musa's a wul tu, "Malǝm naa mbuni! Kǝ konni jomi tu Cogn ci namboŋ, tǝ cig gon ci da hŋ. ³³ Aa suu tǝ tǝ ɗeɓaɗ raa, tǝ ɗeɓaɗ yisǝŋngǝn, aa ndǝr aa suu murghǝ mel tǝ kyan ɗaŋ gama, gin a moɓ ɗeɓaɗ baiko tǝ vaaghǝn ngǝtn ngǝ nyaarghǝn kǝ gǝǝpii. ³⁴ Ɗaŋ Yesu yel tu a suɗa taŋ taŋ a wul tǝ tu, "Kaa fupm tǝ guŋndu Cogn hŋ." A kaari gii gon ta man tlyaa waa tǝ ceɗ tǝ nǝngǝtn won ɗa hŋ. ³⁵ Yesu suɗa ɗaŋ cigha zhiɗkǝn ngai dǝn Cogn a wul tu, "Nii caa ghannda Malǝmci ghǝ ngetn yo ɗaŋ Musa dlaaɗ tǝ wul tu nǝ kuni Daudae? ³⁶ Dauda ngǝtn wos a giɓ zhipti var, a wul tu, ' Daadǝn a wul Daadǝnatn tu, tsǝtni a taaghǝ zaretn, hal she mya sular kusǝŋsǝ zarsǝ waai a kar yaasǝŋ waa." ³⁷ Dauda gamashi a cim tǝ tu, 'Daadǝn,' tǝ cig wo fi wur ghǝnnda Ɓorghǝn Kǝ Coghǝi wo naa nǝ kuni Daudae?" A pol jwaamngǝn zarshes a wumngǝn wos. ³⁸ A zhiɗkǝn wos Yesu wul tu, "Ɗaghǝnɗa nǝ Malǝmci ghǝ ngǝtn yo ɗaŋ Musa dlyaaɗ, mǝn suughǝn ngyelaŋngǝn tǝ dǝllǝŋsǝ luu, caa su tǝ yi wuru shi a lǝɓ ɗiiɓkǝn tǝ ɗiɓarghǝn, ³⁹ Caa yi tǝ tsǝtn a lǝɓ tsǝtn ngǝn ndaraani viin laadi Yahudawa tǝ gya lǝɓ jwaamngǝn polghǝn. ⁴⁰ Taa ndǝr tǝ kaɓ densǝ guɗi gyagii mǝnii ɗaŋ gya tur waasǝŋ taa mǝǝshii, tǝ karaghǝn Cogn fupm fupm durghǝ yo tu zarsǝ tǝ yelshi.Mǝni gyagi ta tu forǝm nǝ naa vik lyai hŋ." ⁴¹ She Yesu tsǝtn mel tǝ koɗ kǝ baiko ɗa te dǝn ngǝ Coghes; cigha yelghǝn zarsǝ ɗaŋ caa gǝm wurɓa ɗa koɗ kǝ baikoi.Zarsǝ mǝn tughǝn monda caa gǝǝm wurɓa ɗa giɓi. ⁴² Ɗani gǝɗ won ɗaŋ turwos aa mǝshii cinǝ kui a man gǝm anini mbǝtlǝm ɗa giɓ koɗ baikos. ⁴³ She a cim mǝǝri dǝn wos wulshi tu, "Jom jomi mya fuu ki tu gǝɗin ɗaŋ turwos aa mǝshii a gǝm ngǝtnyo ɗaŋ a moɓ kǝ ɓuruk mǝnyo ɗaŋ tǝ gǝm baikon. ⁴⁴ Durghǝ yo tu tǝ vǝr ni njwaatn a giɓkǝ monnda ɗaŋ tǝ yirr. Beɗ tǝ gii, gǝɗin ɗaŋ turwos aa mǝshii tǝ dwaandǝ wos a vǝr ni ɗeɓaɗ wurɓa yo ɗaŋ yirr."