¹ A naai nǝghǝ yo ɗaŋ zarsǝ tǝ jwaamshiɗ a Yesu cigha wumngǝn vik Cogn, cigha dlǝrghǝn a ɓil zhakkǝ Janisarata. ² A yel zhirgi zha mbǝtlǝm a dlǝrghǝn ɗa ɓil zhes. Mǝn nyomngǝn gyahes taa nwaalɗi ɗa giɓ zhirges cigha coɓkǝn ngǝtnngǝ nyomngǝn gyashes. ³ Yesu ndai a giɓ zhirgi zhei gon ɗaŋ nǝghǝ Biturus, a wultǝ tu tǝ ɓǝtar zhirges ghai njwatn ɗa giɓ zhes. A tsǝtnni ndǝr kuɓar zarsǝ ɗaŋ ciɗa giɓ zhirges. ⁴ Ɗaŋ a ɓan viwos wulghǝnni, a wul Siman tu, ''ɓǝtar zhirges ghai a lǝǝɓ shoŋni a gǝm ngǝtnngǝ nyomngǝn gyas waai ghai nǝ dur yo tu a nyom gyas.'' ⁵ Siman sutǝ ɗa a wultu, ''Daadǝn , mǝ mbuɗnǝni a laan maa ngaɓ ngǝtn hŋ, beɗ tǝ gi ma man gǝm ngǝtn nyomngǝnnes ɗa.'' ⁶ Ɗaŋ tǝ fi cik, tǝ nyom gyas monnda, hal ngǝtnnghǝ nyomngǝn gyashes ta ngɓ taarghǝn. ⁷ Tǝ ta kara gya kamsawasǝŋ ɗaŋ ca fi laa cimshi ɗaŋ cigha kamshi zhirgi gon tu tǝ mab somshiɗa. Tǝ ta man tǝ yugn zhirge shi beɗ wasǝŋ mbǝtlǝm tǝ gyas, hal tǝ ta nguɓ ndaghǝn giɓi. ⁸ Beɗ tǝ gi Siman Biturus, ɗaŋ a yel cik a nguɓni a ken ghǝYesu, a wultu, ''ɓǝǝlghǝ tǝ myan Daadǝn, nǝ duryo tu minǝ murghǝ kuskǝ ngǝtn.'' ⁹ Nǝ duryo tu a kosartǝ, tǝ ɓuruk gya gyo ɗaŋ ci cimshi, nǝ durghǝ lǝǝɗkǝn gyas yo ɗaŋ tǝ nyom. ¹⁰ Gi a ta yi nǝ gya Yakubu tǝ Yahaya mǝri Zabadi kamngǝ laa Siman. She Yesu ta wul Siman tu, ''ɓak wum vǝrtǝ hŋ, duryo tu ɗaŋ ɗaŋnin, ka yi nyomni zarsǝ.'' ¹¹ Ɗaŋ tǝ nyolar zhirgi wasǝŋǝi ɗi ɓǝdlǝŋ a dul yatl, tǝ ta koni tǝ laaɓtǝ. ¹² A kili yo ɗaŋ a ta yi ɗa giɓ yatli gon, murwon ɗaŋ citǝ ndomtsǝ a ta yi ɗa lǝǝɓes. Ɗaŋ a yel Yesu, a ndaaɗ a ken wos hal yatl ca karatǝ, ca wultu, ''Daadǝn ǝŋ kya kaɓi, ka ɗya ka fuuɗmi.'' ¹³ Yesu taa taaswos tǝntǝ ghai, ndomtses ta ɓǝltǝ tǝ yan. ¹⁴ A wultu ɓak tǝ fuu gon hŋ, beɗ tǝ gi a wultǝ tu, ''Tlǝ a a giɗ gamawa a pǝris a ndǝr a vǝr ngǝtn Cogn nǝghǝ byatlkǝn wa, ɗaŋ gi ɗaŋ Musa koni, gi wo ca zarsǝ ta yisǝŋǝi tu ka fuɗi.'' ¹⁵ Beɗ tǝ gi vesta kaɓ lǝɓi hal ndoŋngai, zarsǝ monnda tǝ ta jwami ɓastǝ dur yo tu tǝ wumtǝ, tǝ ndǝr tǝ tu byatlkǝni nǝ gya gonngǝn yo daŋ tǝ yir. ¹⁶ Beɗ tǝ gi ca ɗya nyoli tlii a lǝɓ yo ɗaŋ gonngai hŋ nǝ karaghǝn Cogn. ¹⁷ A naai namboŋ a giɓkǝ mbuɗkǝn yo ɗaŋ ca kuɓar, Farisiyawa tǝ malǝmshi ngǝtn ɗaŋ Musa dlyaaɗ ɗaŋ caa tsǝtn a lǝɓkǝ gya gi ɗaŋ tǝ dlamɗi te mǝri yatl yo ɗaŋ ta ngiriŋ Galilii tǝ Yahudiya tǝ gya yatl kǝ Urshelima. Vartǝ Daadǝn citǝ yaan nǝ durghǝ byatlkǝn zarsǝ. ¹⁸ A kili gin, mǝnwon tǝ man taa mbi murwon ɗi nǝ pwaaghǝn dulghǝ lǝmmbuɗ, tǝ ndǝr tǝ ndǝr tǝ ŋal tǝpm yo ɗaŋ ta ndartii giɓi, duryo tu tǝ mbutar tǝ a kenngǝ Yesu. ¹⁹ Tǝ tu tǝpm yo ɗaŋ ta ndalar tǝ ghai hŋ, nǝ durghǝ jwaamngǝn zarsǝ, she tǝ ta tai a gam dǝnnes, tǝ shilartiɗi ɗa mboi gam dǝnnes, a dulghǝ lǝmmbuɗwos, ɗa dlǝk zarshes, taŋ-taŋ a ken Yesu. ²⁰ Ɗaŋ a yel caaghǝn raa wasǝŋ,Yesu wultu, ''murghǝ dǝn, taa dlaaghǝ loŋsǝ kusǝŋsǝ ngǝtn wa mǝni.'' ²¹ Mǝn dlyaaɗkǝn tǝ Farisiyawa tǝ nguɓ wulghǝn ngǝrshi gya gon ci wultu, ''Gin nǝ nu ǝŋ ca kemas Cognvon cighǝiyo? Nu ǝŋ wo ɗya dlaa loŋsǝ kusǝŋsǝ ngǝtiyo? ǝŋ yan nǝ Cogn ngǝtnwos hŋo?'' ²² Beɗ tǝ gi ɗaŋ Yesu yisǝŋ ngǝtn ɗaŋ caa ɓital, a sushiɗa a wultu, ''Ni caa ǝnnda kya ceɗ ngǝrshi gya gi a giɓ raawane? ²³ Gyo ǝŋ a moɓ swaaɗ ɗaŋ tǝ wultu, 'Taa dlaa loŋsǝ kusǝŋsǝ ngǝtn wai' ko tǝ wultu, ' shishi a riinio?'' ²⁴ Beɗ tǝ gi ka yisǝŋǝi tu ŋaa zar vitǝ dǝǝl ghǝ dlaaghǝn loŋsǝ kusǝŋsǝ ngǝtn adǝgn, mya wulghǝ tu, 'shishi, mbi lǝmmbuɗ wai, a tlii ɗaghǝ dǝn.''' ²⁵ Swaaɗ a ken wasǝŋ a shishi mbi lǝmmbuɗeshi ɗaŋ ca mbuɗ ghai, a ta sutǝ ɗatǝ dǝn cigha luughǝn Cogn. ²⁶ A kosar konu tǝ ndǝr tǝ luu Cogn. Vǝrtǝ ta ngaɓshi washii, cii wultu, ''yawon maa yel ngǝtnngǝ kosarghǝn.'' ²⁷ A kaarghǝ ngǝrshi gya gi, Yesu ta nyoliɗi ɗa ɗan ata yel murghǝ kaɓkǝn zhakka ɗaŋ sǝǝmwos tu Lawi caa tsǝtnngǝn a lǝǝɓ kǝ kaɓkǝ zhakka. A wul tǝ tu, ''Laaɓmɗi.'' ²⁸ Lawi ga koni, a shishi laaɓ tǝ. ²⁹ Lawi fi dǝllǝ byalak ɗatǝ dǝn, mǝn kaɓkǝn zhakka monnda ci ɗa ɗan, tǝ mǝri gya gon ɗaŋ ci a tsǝtnngǝn a kenngǝ tebǝl ghǝ byalakes ci a cighǝn ngǝtn cighǝn cimshii. ³⁰ Beɗ tǝ gi Farisiyawa tǝ mǝn dlaaɗkǝn tǝ nguɓ wulghǝnbvi a dulgam mǝri dǝnwos, cii wultu, ''Ni ǝŋ a ca kyaa ci kǝ tlya tǝ mǝn kaɓkǝn zhakka tǝ zarsǝ mǝn fighǝn kusǝŋsǝ ngǝte?'' ³¹ Yesu wulshi tu, Mǝnyo ɗaŋ cii byatl-byatl caa ŋal lǝɓ murghǝ wugn hŋ, gya gi ɗaŋ a byatlshi hŋ ǝnnda caa ŋal lǝɓ murghǝ wugn. ³² Mǝ man nǝ durghǝ cimngǝn mǝ fighǝn ngǝtnngǝ mbuni hŋ, beɗ tǝ gi mǝ man nǝ cimngǝn mǝn fighǝn kusǝŋsǝ ngǝtn tǝǝ man kaɓ ndaɗkǝn wasǝŋǝi. ³³ Tǝ wultu, ''mǝri dǝnngǝ Yahaya caayi ngaɓ vi tǝ karaghǝn Cogn, cik kǝn mǝri dǝnngǝ Farisiyawa caa fi cik ɗaŋ. Beɗ tǝ gi mǝri dǝnwa cigha cighǝn tǝ tlyaaghǝn.'' ³⁴ Yesu wulshi tu, ''Gon ciɗa ɗaŋ wo ca kamndǝ ghǝ murghǝ kaɓkǝn gǝɗ muuri a ngaɓkǝn vi, a kiliyo ɗaŋ ya murghǝ kaɓkǝn gǝɗmures ciɗa ɗaniya? ³⁵ Beɗ tǝ gi dzaŋ a manngǝnɗi ɗaŋ ta mbi murghǝ kaɓkǝn gǝɗ muureshi ɓaski, ɗa dzaŋes ǝnnda taa ngaɓ vi. ³⁶ Yesu fuushi ngǝrshi gya gon ɗa ɗa. ''Gon wo dlaatǝ luu muuri wos, tu tǝ tǝ ndǝr gǝrǝ luu wos ghai hŋ. Ǝŋ ya fi cighǝi, wo naa tu a ngaɓ luu muures dlaatǝi, riɓkǝn ghǝ muures wo ndara tǝ kǝ gǝres hŋ. ³⁷ Cik ɗaŋ, gon wo shin zhak gurghǝ darndu dǝn muuri a giɓkǝ ndotsǝ jigha hŋ. ǝŋ ya fi cik zhak darndu dǝn muures wokwaɓ jigha shi, cikǝn zhak gurghǝ darndus wo paashi, jigha wo ndǝr laaɓ zha. ³⁸ Beɗ tǝ gi a ngaɓ ciɓ tǝ shin zhak gurghǝ darndu dǝn muures a jigha muuri. ³⁹ Gon ɗa ɗaŋ wo moɓ suughǝn zhak darndu dǝn muuri, ɗa kaari ɗaŋ a tlyaa kǝ mwames hŋ, wo wul tu, ' kǝ mwames moɓ kǝ muures.''