¹ She Yesu,ɗaŋ ata yi nǝ yuŋǝn tǝ zhipti vaar,a ta sutǝɗa ruum Urdun ,she zhipti vaar ta tlǝǝr ti nɗǝǝr. ² Shetan a tayi ɓastǝ diipkǝn nǝ ghǝ mbukǝn tashi wubsǝ. A ta ci ngǝtn cigǝn a mbudkǝni gya gii hŋ, ɗa kari kusuŋ a ta ɗuti ³ Shetan ta wultǝ tu "Yan kinǝ kuni Cogn ,caa gya puusǝn tǝ naai nǝ duŋ." ⁴ Yesu ta sutǝ ɗa tu,"Nǝ dlyaadkǝn tu zaar wo fuɗ tǝ nghǝtn cigǝn viwos hŋ." ⁵ Shetan a ta tlǝǝrtǝ a duli won nǝ fubni,a ta zhitṫǝ guŋdǝ ɗǝgǝn ɓuruk aŋaa dǝǝl. ⁶ Shetan a ta wultǝ tu, "Ma vǝrgǝ guŋdu gya gin ɓuruk tǝ zhimgǝn wasǝŋ. Duryo tu taa vǝrǝm mǝ vǝr gyo ɗaŋ mǝ suu. ⁷ Nǝ ghǝ gii,yaŋ ka ngubni kǝ mbuum, ɗeɓad ta naa nǝ gwa." ⁹ Shetan ta tlǝǝr Yesui Urshalima tlǝŋ tar ti yeŋdi gǝ viin Cogn ,a wultǝ tu," Yaŋ kini kuni Cogn, diim aa ndai yatl. ¹⁰ Duryo tu nǝ dlyaadkǝn tu, "Wo fuu zhipti shingǝn wos tǝ tlyaagǝ ; ¹¹ a,ndǝǝr wul ɗa tu,'Ta mbiigǝ gaami a taas wasǝŋ nǝ duryo tu a ngaa yasǝŋ a puus hŋ'." ¹² Yesu sutǝ ɗa tu, "Ne kongǝn tu aa diip daadǝn wa Cogn hŋ'."́ ¹³ Daŋ Shetan ta ɓan diipkǝn Yesui, she a ta tlii ga tǝ sad tu she a kili gon ɗa. ¹⁴ She Yesu a ta sutǝ ɗi Galili a vartǝ gǝ zhipti vaar, she vii a dul gamashi a basaŋǝi ɓuruk a te yatles. ¹⁵ She ngubshi kuuɓar gǝn ngai viin Ladi Yahudawa wasǝŋ, zarsǝ ɗeɓad tǝ ta mbuu tǝ. ¹⁶ Dzaŋ gon she a ta ndai gib Nazarat,lǝǝb yo ɗaŋ a luu ghai.She a ta ndai gib viin ladi Yahudawa wasǝŋ dzaŋ Wolgi ɗaŋ gyo ɗaŋ cayi fi a ta shishi dlǝǝrni tǝ kwaan tagarda wasǝŋ. ¹⁷ She tǝ ta vǝǝrtǝ tagarda ngǝ murgǝ shingǝn cogn,Ishaya. Ɗaŋ a ta ɗǝǝrǝ tagardeshi , she a ta tu lǝǝb yo ɗaŋ nǝ dyaadkǝn tu, ¹⁸ "Zhipti var Daadǝn yi mbasǝm,duryo tu aa ɓomii tu mǝ fuu gyaa naa kwui vii wusni.Aa shinǝm mǝ gǝm vii gǝmgǝn ngǝ mǝni yo ɗaŋ ci nǝ naadkǝn,tǝ tugǝn yalgǝn mǝni yo ɗaŋ cinǝ dwansǝ,mǝ dlaa mǝni yo ɗaŋ ca buŋǝn. ¹⁹ Mǝ gǝm vii voni tugǝn gyaal ngǝ Daadǝn. ²⁰ She a ta karghad tagarta shi,sular murgǝ laa viin ladi Yahudawas mǝǝn tsǝdni.She yir zarsǝ ɗa viin ladi Yahudawos ɗeɓad tǝ ta nai ɓastǝ. ²¹ She a ta ngubshi wulgǝn vii,"Yawon vii gina yugǝi a kǝǝm waan ²² .Ɗeɓad mǝni yo ɗaŋ tǝ tayi ɗa dan tǝ wum ngǝtn yo ɗaŋ a kwaan she vii gyal yo ɗaŋ a ta kwaan a ta pwashi wasǝ ŋǝi ɓuruk tǝ ta ngubced kǝn tu ,"Giin nǝ kuni Yusufu hŋ ŋaan? ²³ She a ta wulshi tu kǝrǝŋ -kǝrǝŋ ka wulǝm gam vii gin tu ,"Murgǝ wuŋ fud gamai .Ngǝtn yo ɗaŋ mǝǝ wumi kya fi gib Kafarnahum fi ɗagǝ yatl ɗaŋ. ²⁴ "Bed tǝ gii a ta wul shi tu, "Jom -jom mya fuki tu murgǝ shingǝn Cogn yii luu ɗaatǝ yatl hŋ. ²⁵ Bed tǝ gii mya fuki na jom jomi tu gya guɗi yo ɗaŋ gua tur wasǝŋ ta mǝǝshi tǝ tayi monda gib Israila a kili ghǝ Iliya ,ɗaŋ von a ta shii hŋ nǝ gǝ voni maai tǝ kumbai, dǝǝlǝ kusuŋ a ta ndai ɗa yatli ɓuruk. ²⁶ Bed tǝ gii tǝ ta shin Iliya a gon wasǝŋ hŋ,she a gǝǝd yo ɗaŋ turwos aa ta mǝǝshi gib Zarefat a yatl kǝ Sidon. ²⁷ Ndomtsaŋsǝ tǝ tayi ɗa monda gib Israila a kili gya Elesha murghǝ shingǝn Cogn,bed tǝ gii gon wasǝŋ a ta tu fud kǝn hŋ she Naaman mǝn Suriyai." ²⁸ Ɗaŋ zaarsǝ ɗa viin ladi Yahudawos tǝ ta wum vii gya gin kab raa wasǝŋ a ta malari. ²⁹ Tǝ ta nyolarti naa tlyaagǝn a yatl wasǝŋ.Tǝ ta tlǝǝrti amɓill wur yo ɗaŋ yatl wasǝŋ yi ɗa duli, tu tǝ paa tǝ gǝǝmi ɗi yatl. ³⁰ Bed tǝ gii a ta nyoli a dlei wasǝŋ tlii a lǝɓi gon. ³¹ She a ta tlii Kafarnahum ,a gib yatl Galili a ta ngabshi kuuɓargǝn ngai dzaŋ Wolngi. ³² Ngǝtn yo ɗaŋ a ta ya kuɓarshi ngai a ta pwashi wasǝŋǝi duryo tu a ta ya kuɓarshi ghai tǝ vartǝ. ³³ Murwon a ta yi ɗa viin ladi Yahudawos ɗaŋ ci tǝ mǝndǝŋsǝ , a ta dlaar vii tlya-tlya tu, ³⁴ "Wui ni mbimi tǝ kyan,Yesu mǝn Nazaredi ye? Kǝ man a tlaa miwopiya ? Ma yisǝŋǝi , kyan ki nǝ murgǝ ndzǝkkǝni ngǝCogn!" ³⁵ Yesu ta dlwaa yer mǝndes tu," A wuul vii hŋ ,nywallǝn ni ɗi ɓastǝ!" Ɗaŋ mǝndes a ta mbitǝ lii yatl a dlei wasǝŋ ɓuruk , a ta nyoli ɓastǝ ,a ta man fi tǝ ngǝtn ɗa hŋ. ³⁶ Ngǝrshi a ta pwaa zaarsǝ ɓuruk, tǝ ta dafa wulgǝn vii ɗa dulgami a dlei wasǝŋ . Ci wul tu, "Gin nǝ naa vii gyo ngǝnio? A wul vii mǝndǝŋsǝ tǝ vartǝ tǝ nywalli. ³⁷ Nǝ gii,vii a dul gamashi a ta basaŋǝi ɗeɓad ɗa te yatli. ³⁸ She Yesu a ta gaa viin ladi Yahudawoshi a ta ndai dǝn gǝ Siman. A kili gii kawa ghǝ Simanes a ta ya gon nyaŋ-nyaŋ ,she tǝ ta kara Yesu nǝ dul gamashi. ³⁹ She Yesu ya dlǝǝr ɗa tǝ gaam ,a ta dlwaa yer gongǝnes, gongǝnes a ta gaa yi. Kyaad ɗa ɗan, a ta shi shi fi shi laa mǝn ⁴¹ Ɗaŋ dzaŋ a ta tlii nɗagǝn ,zaarsǝ tǝ ta lǝǝr Yesu mǝn gongǝn mǝnɗi tǝ giir mari - mari . A ta gaa taas wos mɓashi fuud shi wasǝŋi. ⁴⁰ Mǝndǝnŋsǝ monda tǝ ta nywaldi a zaarsǝ monda ,ci yi dlaar vii," Kyaan kinǝ kuni cogn!" Yesu ta dlwaa yer mǝndǝŋshes ndǝr ɗak shi a wulgǝn vii , dur yo tuta yosǝŋǝi yani ǝŋ cinǝɓorgǝni ⁴² Ɗaŋ lǝǝb ta tlaai she a ta wor gamashi tlii a lǝǝb won ɗaŋ ba gon ngai hŋ.Zaarsǝ monda tǝ yayi ɓastǝ ngalgǝn she tǝ ta tuli a lǝǝb yo ɗaŋ cighai .Tǝ ta suu tǝ ɗak tǝ mbashi gaagǝn . ⁴³ Bed tǝ gii a ta wulshi tu."A naa cib mǝ vǝǝr vik wusni cogn a yatli gya gon ɗa monda duru tu nǝ dei gin ghǝn tǝ shinǝmɗi. ⁴⁴ She a ta ciken tǝ vǝrgǝn vik Cogn a vinsǝladi Yahudawa ɓuruk yatl Yahudiya.