¹ Dzaŋ wolngi wonYesu ta yi a laatsǝghǝn kittn, she mǝri dǝnwos cii nga ngǝtnngǝ kites cii vurghaɗ tǝ taas cii yi ci. ² Beɗ tǝ gi Farisiyawa gya gon tǝ wultu, ''Nǝ durghǝ ni kyaa fi ngǝtnwon ɗaŋ a ndara tǝ fi dzaŋ wolngi hŋe?'' ³ Yesu sushiɗa a wultu, ''kaa kwan ngǝtn yo ɗaŋ Dauda fi a kiliyo ɗaŋ a wum kusǝŋ hŋaa, yan tǝ zarsǝ yo ɗaŋ ci cimshiya? ⁴ A tli a giɓ dǝn Cogn, a mbi dugn ngǝ Cogn a ta ndǝr cii, a ta ndǝr vǝr mǝn monci yo ɗaŋ tǝ ta yi cimshi tu tǝ ci, ko ɗaŋ yi tu gon wo kǝǝm ci hŋ she pǝris ngǝtn wasǝŋ ǝnnda taa ci'' ⁵ A ta wulshi tu, ŋaa zaar ghǝn ci Daadǝn dzaŋ wolngi.'' ⁶ A ta naai tu a dzaŋ wolngi won a ta ndai giɓ vin laadi ndǝr ndǝr kuɓar zarsǝ beɗ ɗa ɗan. Murwon a ta yi ɗa ɗan gyo ɗaŋ gyaŋ te zariwos nǝ pwaaghǝn. ⁷ Mǝn dlaaɗkǝn tǝ Farisiyawa cigha gaaghǝn yir ɓastǝ tǝ yel ko wo fuuɗ goni dzaŋngǝ wolngi, nǝ duryo tu tǝǝ tu dekkǝ caaghǝnwos vii nǝ fighǝn ngǝtn won ɗaŋ yi ndarara hŋ. ⁸ Beɗ tǝ gi a ta yisǝŋ ɓitalghǝn wasǝŋǝi, a ta wul murghǝ gyaŋ pwaaghǝnnes tu, ''shishi, dlǝǝrni ɗuun a dlek zarsǝ'' mures ta shishi dlǝǝrni ɗa ɗan. ⁹ Yesu ta wulshi tu, ''mya ceɗki , nǝ ni ghǝn a ndara tǝ fi dzaŋ wolnge tǝ fi nǝ ngǝtn mbuniya ko ngǝtn kuushiya, tǝ fuɗni raa ko tǝ ɗuutǝniya?'' ¹⁰ A paŋshi ɓuruk, a wul mures tu, ''Taa gyaŋ waai'' A fi cik gyaŋwos byatlii. ¹¹ Beɗ tǝ gi a tlishi ghai nyaŋ-nyaŋ, tǝ ta nguɓ vi wulghǝn tǝ dlǝŋsǝ wasǝŋ nǝ ngǝtn yo ɗaŋ ta fi tǝ Yesu. ¹² A naai a mbuɗkǝnnes, a ta tai wuur nǝ duryo tu tǝ kara Cogn. A ta ciken tǝ mbuɗi cigha karaghǝn Cogn. ¹³ Ɗaŋ ɓintli fi, a ciim mǝri dǝnwos ɗi ɓastǝ, a ta ndǝr bwaa dzuɓ tliti mbǝtlǝŋ a giɓi wasǝŋ, gya gyo ɗaŋ a cimshi tu ''mǝn laa Cogn. ¹⁴ Sǝmndǝ mǝn laa Cokes ghǝn nǝ gya Siman (gyo ɗaŋ a ndǝr cimtǝ tu Biturus) tǝ yasashi Andarawus, Yakubu, Yahaya, Filibus, Bartalamawus, ¹⁵ Matta, Toma Yakubu kuni Halfa, Siman gyo ɗaŋ caa cimtǝ tu Zaloti, ¹⁶ Yahuda kuni Yakubu, Tǝ Yahuda kuni Iskaryoti, gyo ɗaŋ a ta ɗiɓar Yesui. ¹⁷ Yesu ta shiiɗi ɗa wuures ci cimshi, tǝ ndǝr tǝ dlǝǝrni a lǝɓwon pǝɗ-pǝɗ. Mǝri dǝnwos monnda ci ɗa ɗan, tǝ gya zarsǝ monnda ɗaŋ tǝ dlamndi Yahudiya tǝ Urshelima, tǝ ɓil zhakkǝ Taya tǝ Sidon. ¹⁸ Tǝ man nǝ duryo tu tǝ wum tǝ, tǝǝ ndǝr tǝ tu fuɗkǝnni a ɓuruk gya gonngǝn wasǝŋ. Zarsǝ gya gyo ɗaŋ cigha vuughǝn tǝ kusǝŋsǝ mǝnndǝŋsǝ beɗ tǝ ta tu fuɗkǝni. ¹⁹ Ɓuruk jwaamngǝn ngǝ zarshes caa mbǝrshi tu tǝ tiintǝ nǝ duryo tu vartǝ ghǝ fuɗkǝn cigha nyolghǝnɗi ɓastǝ, a fuuɗshi washi ɓuruk. ²¹ A yaal yel mǝri dǝnwoshes a wultu, ''A mbaaki kyaani gya naakui, nǝ duryo tu guŋndǝ ghǝ Cogn nǝ gwaan. ²⁰ A mbaaki kyaani ɗaŋ kya wum kusǝŋ ɗaŋngǝni, nǝ duryo tu vwa waan wo yugnngǝi. A mbaaki kyaani ɗaŋ kigha ngwarghǝn ɗaŋngǝni, nǝ duryo tu kaa gomtlǝ. ²³ A mbaaki kyaani ǝŋ zarsǝ ya nyaŋngaski, tǝ giɗki worghǝn ci sular sǝmndǝ waan nǝkǝ kuuskǝn, nǝ durghǝ ŋaa zaar. ²² Ka fi polghǝn, nǝ duryo tu cik ka tu bamves nǝ vari gaami, duryo tu cik gya jiɗwaan tǝ fi mǝn laa Cogn. ²⁴ Beɗ tǝ gi wo girki mǝn tughǝn! Nǝ duryo tu kaa tu mbutarghǝn raavwaani. Wo girki kyaani ɗaŋ ka ci kǝǝmki ɗaŋni! Duryo tu kaa wum kusǝŋ ken. ²⁵ Wo girki kyaani mǝn gyomtlǝghǝn ɗaŋni! Duryo tu kaa wa mitsǝ kǝ ndǝr kǝ ngwaar ken. ²⁶ Wo girki ǝŋ zarsǝ ɓuruk caa luuki! nǝ duryo tu cik ǝnnda gya jiɗwan tǝ fi mǝn shinngǝnngǝ mberni. ²⁸ Beɗ tǝ gi mya wulki tu kyaani mǝn sǝǝghǝnetn kǝǝm, suun mǝn nyangaskǝn wan, a ndǝr a fi mbuni mǝni gya gi ɗaŋ caa suuki hŋǝi. ²⁷ Gǝ mǝn mbuni mǝn vǝrghǝnwan, a ndǝr a kara nǝ gya gyo ɗaŋ caa fiirki forǝm. ²⁹ Gyo ɗaŋ ya maaraki a te kwaaŋnga gi, sughǝɗǝn tǝ te kamshes mǝn. Ǝŋ gon ya mbighǝ ngǝtnngǝ dlǝpmngǝn wa mǝni. Ɓak ɗaghartǝ luu wa mǝn hŋ. ³⁰ Vǝrǝn muryo ɗaŋ ya karaki. Ǝŋ gon a mbi ngǝtnwoni ɗaŋ nǝ gwaan, ɓak ngalǝn tu tǝ sularɗi hŋ. ³¹ Ɓuruk ngǝtn yo ɗaŋ kya su zarsǝ tǝ fighǝ mǝn, fishi mǝn cik ɗaŋ. ³² Ǝŋ kya suuni mǝn suughǝnwan kurum, nǝ ngǝtn mbuni yo ǝŋ kaa tu ye? mǝn fighǝn kuskǝ ngǝtn beɗ caa suu mǝn suughǝn wasǝŋ. ³³ Ǝŋ kyaa giɗni gyal a mǝn yo ɗaŋ caa fiki gyal mǝn kurum, ngǝtnngǝ mbuni yovghǝn ka tuye? mǝn fighǝn kuskǝ ngǝtn beɗ caa fi cik ɗaŋ. ³⁴ Ǝŋ kyaa vǝr ngǝtn zarsǝ yo ɗaŋ kǝ caa raa ɓashi ta sularki mǝn kurum, ngǝtnngǝ mbuniwaan yi ɗo ɗuniyo? mǝn fighǝn kuskǝ ngǝtn caa vǝr mǝn fighǝn kuskǝ ngǝtn ɗaŋ, caa caara tǝ sularshi mǝn ɗyakcak ɗaŋ gi ɗaŋ. ³⁵ Beɗ tǝ gi suun mǝn nyaŋngaskǝn waan, a ndǝr a fi shi gyal mǝn, vǝrǝnshi ngǝtn, ɓak caanraa tu tǝ sularki mǝn hŋ, nǝ duryo tu bamvi fighǝn cik wo naa nǝ vari, kaa naai nǝ mǝri murghǝ moɓkǝn ɓurukǝi, nǝ duryo tu yan tǝ gamas ca giɗ gyal a mǝni gya gi ɗaŋ caa nyar hŋǝi tǝ kusǝŋsǝ zarsǝ. ³⁶ Naan nǝ mǝn yelghǝn gwanndǝ, duryo tu Daawan nǝ murghǝ yelghǝn gwanndǝ ɗaŋ. ³⁷ Ɓak naan nǝ mǝn ɗǝǝlghǝn vi hŋ, kyaani beɗ ta ɗǝǝlki vi mǝn hŋ, ɓak ɗuun hŋ, kyaani beɗ taa ɗuuki hŋ. Dlaan loŋsǝ gya gon mǝni, kyaani beɗ ta dlaaki loŋsǝ mǝni. ³⁸ Vǝrǝn gya gon, kyaani beɗ ta vǝrki monnda. A kolaaɗ zuk-zuk, tǝ ndǝr tǝ tǝk-tǝktǝ yugn hal yi paas, taa paas hal a cign wan. Duryo tu ɓuruk kolaaɗ yo ɗaŋ kǝ ɓǝǝɗghai, tǝ yan ǝnnda taa ɓǝǝɗki mǝn ghai. ³⁹ A ndǝr fuushi ngǝrshigya gon, ''Dwaan wo ɗya ngaɓ dwaana? ǝŋ ya fi cik, ɓuruk wasǝŋ mbǝtlǝm taa ndaɗi giɓ giir, yi hŋaan? ⁴⁰ Murghǝ kuuɓkǝn wo moɓ murghǝ giɗkǝn woshes hŋ, beɗ tǝ gi ɓuruk gyo ɗaŋ ya tu kuuɓarghǝnni ndaara wo ɗya naai ɗaŋ murghǝ giɗkǝn woshes. ⁴¹ Ni ca ǝnnda kya yel ŋaa yaar a yirvŋaa na ye, beɗ tǝ gi kǝ ɗya kǝ yel vik ŋaantsǝ yo ɗaŋ yigha yiri gwaayi hŋǝi? ⁴² Ni ca ǝnnda ka wul ŋaa na tu, 'ŋaa na, ga mǝ dlighǝ ŋaa yaari mǝni a ɗaŋ yi a yirwai', ɗaŋ kyan tǝgama ka ɗya kǝ yel vik ŋantsǝ yo ɗaŋ yigha yiri gwaai hŋei? kyan kuskǝ zaar! Dli vik ŋantsǝi a yir waai keni, ǝnnda ka yaal ndarara nǝghǝ yo ɗaŋ a dli ŋaa yaar yo ɗaŋ yigha yir ŋaa na. ⁴⁴ Nǝ duryo tu gwaas won ɗa ɗaŋ ci ndaara wo guur nǝ kusǝŋshi hŋ, ko kuskǝ gwaas ɗaŋ wo guur ndarara hŋ. ⁴³ Nǝ duryo tu caa ɗya tǝ yisǝŋ ko gwaashi gyo a te guuri yo ɗaŋ ca vǝr. Duryo tu zarsǝ caa ɗya tǝ tsal gurghǝ gwaamɗi a tsogn yiɓka hŋ, ko tǝ ngaa darndu dǝn a tsogn raɗi hŋ. ⁴⁵ Zarghǝ mbuni a giɓkǝ tughǝnngǝ raawos ǝnnda ca vǝr ngǝtn ndarara, beɗ tǝ gi kuskǝ zar a giɓkǝ kusǝŋsǝ ngǝtn yo ɗaŋ a num a raa wos ǝnnda ca fi kuskǝ ngǝtn. Duryo tu ngǝtn yo ɗaŋ yi gha raawos ǝnnda viwos ca kon. ⁴⁶ Ni ca ǝnnda kyaa cumtu, 'Daadǝn', beɗ tǝ gi kyaa kaaɓ vetn hŋe? ⁴⁷ Ɓuruk gyo ɗaŋ ya man ɓasǝm tǝ wum ngǝtnyo ɗaŋ mya wul tǝ ndǝr tǝ laaɓshi, mya fuuki ko ci wuri. ⁴⁸ Cini ɗaŋ zaar yo ɗaŋ cigha nalghǝn dǝn, gyi ɗaŋ a ɓǝlti shoŋ-shoŋ hal daɗ yatl ǝnnda a gǝm daɗ vin woshes a dulghǝ taari. Ɗaŋ zha man, zhes man ndu dǝnnes, beɗ tǝ gi a ɗya zhighǝɗ tǝ hŋ, dur yo tu tǝ naalti ndarara. ⁴⁹ Beɗ tǝ gi, muryo ɗaŋ ya wum ngǝrshi gin ɗaŋ mya wullǝn ua ndǝr laaɓshi, cin ɗaŋ zaryo ɗaŋ a nal vinwos a dul yatl daɗes yi ndarara hŋ. Beɗ gi ɗaŋ zha man ɗuu daɗes, swaaɗ she a wuui, dǝnnes fi kuskǝ wuughǝn nǝ vari.