¹ She ɓuruk jwamngǝn zarsǝ tǝ shishi tǝ lǝǝr Yesu ɗi a ken Bilatus. ² Tǝ caa tǝ vi tu, ''Mǝ tu murin ca mor zarsǝ yatl wopm. A ndaara ciɓ tǝ vǝr Kaisar zhakka hŋ, ca wul tu yan gamas nǝ ɓorghǝni, guŋ. ³ Bilatus a ceɗ tǝ tu, ''Kyan ghǝn kinǝ Guŋ Yahudawa? she Yesu suɗa tu wul tu, ''Yi cik ɗaŋ kǝ koni.'' ⁴ She Bilatus wul mǝn varaŋsǝ pǝris tǝ zarsǝ ɗaŋ tǝ jwaamshi monnda, ''Mǝ tuu malghǝn namboŋ a murin hŋ. ⁵ Beɗ tǝ gi ci wul tu ca shisher raa zarsǝ mǝn tǝ kuɓarghǝn ɓuruk Yahudiya, a nguɓɗi Galilii hal a lǝǝɓi gin.'' ⁶ A kili yo ɗaŋ Bilatus a wum gini, she a ceɗ tǝ tu ko murin nǝ mǝn Galiliiyan, ⁷ Kili yo ɗaŋ a yisǝŋǝi tu cighǝi laaɓkǝn guŋndu kǝ Hiridus, she a shinndar Yesu a lǝǝɓ Hiridus, gyo ɗaŋ yani tǝ gashi ci Urshelima a mbuɗkǝn gya gin. ⁸ A kili yo ɗaŋ Hirodus yel Yesu, she a yughǝi tǝ polghǝn nyaŋ nyaŋ, durghǝ tu caa suu yelghǝniwos ɓnndǝŋ. Ɓanndǝŋ a wm ngǝtn won nǝ yan, she a ga yir tǝ yel ngǝtnngǝ kosarghǝn ɗaŋ wofi. ⁹ Hirudus a ceɗ Yesu gǝgn monnda, beɗ tǝ gi Yesu sutǝ ɗa hŋ. ¹⁰ She dǝllǝŋsǝ pǝris tǝ mǝn dlyaaɗkǝn tǝ ta dlǝǝri ci ɓaantǝ toɗak. ¹¹ Hiridus tǝ mǝn maanndǝ tǝ ɓanntǝ ci riitǝ kaar tǝ caa tǝ lǝŋsǝ mǝn ndaara. A kili gi a man tlǝr tǝ a lǝǝɓ Bilatus. ¹² She Hiridus tǝ Bilatus tǝ naai nǝ kamndǝ a dzaŋngi (tǝ ta ya gyomtlǝ dlǝŋsǝ tǝ wasǝŋ hŋ). ¹³ Bilatus cim mǝnvaraŋsǝ pǝris ɗi ɓuruk tǝ mǝn guŋndu tǝ zarsǝ ɗaŋ tǝ jwaamshi, ¹⁴ She a wulshi tu, ''kǝ lǝǝrǝm murin mǝnɗi ɗaŋ tu caa riitǝ zarsǝ a kusǝŋsǝ ngǝta, yelǝn ma ceɗ tǝ a ken wan mǝ tu malghǝnwon namboŋ ɓastǝ hŋ a ngǝtn yo ɗaŋ kya kon a dulgamas hŋ. ¹⁵ Yei Hiridus ma a mannda suular tǝ ɓasmi, ka yeli, ngǝtn won ɗaŋ a fi ɗaŋ a kǝm mǝskǝni hŋ. ¹⁶ Nǝ durghǝ gi ma vǝrtǝ forǝm mǝ gǝǝmtii.'' ¹⁷ (A naa ciɓ Bilatus tǝ gǝǝm Yahudawa murghǝ naɗkǝn won namboŋ a kili belakes) ¹⁸ Ɓuruk wasǝŋ tǝ ta ɗuu kaaghǝn vii namboŋ tǝ wul tu, ''Tlǝr murin ni, she a gǝǝmi Barabas mǝni!'' ¹⁹ Barabas nǝ zaar yo ɗaŋ ta ta gǝǝmtǝ giɓ jarum duryo tu a ta shisher raa zarsǝ mǝn ɗa giɓ yatli tǝ ɗuughǝn zaar. ²⁰ Bilatus wul shi saɗɗa tu, caa suughǝnatn tu tǝ gǝǝm Yesui. ²¹ Beɗ tǝ gi tǝǝ ta dlaar vi tlya tlyaa tu, ''ghǝmmbalǝnti ghǝmmbalǝntii,'' ²² She a wulshi kǝ mayi tu, ''Nǝ durghǝ ni, nǝ kuskǝ ni ǝŋ murin fe? Ma tu tǝ ngǝtnwon ɗaŋ a tul nǝ dyak kǝ mǝskǝn wos hŋ. Nǝ durghǝ gi ma vǝrtǝ forǝm mǝ gǝǝmtii.'' ²³ Beɗ tǝ gi tǝ ɗakghǝi nǝ dlaarghǝn vi tlya tlyaa tu caa suu tu tǝ ghǝmmbalti. She dlaarghǝn vii wasǝŋes a lǝǝɗi, ²⁴ she Bilatus kaɓ gwaasǝŋǝi. She Bilatus a kaɓi tǝ fishi ngǝtn yo mǝn ɗaŋ caa suu. ²⁵ A gǝǝm gyo ɗaŋ tǝ ceɗ tǝ ɗa, gi ɗaŋ ci giɓ jarumi, duryo tua ta shisher raa tǝ ɗuughǝn zaar. Beɗ tǝ gi a ta vǝr Yesui kaɓkǝ suughǝn raa wasǝŋ. ²⁶ Ɗaŋ ci ɓastǝ tlǝrghǝn, She tǝ goɓ Siman mǝn Sarinai ɗaŋ a dlamɗiba ŋaa yatl won, tǝ ga tǝ ghǝmmbales mǝn tǝ kǝni, nda laaɓkǝn Yesu. ²⁷ Zarsǝ monnda tǝ jwaamshi tǝ guɗi gya gyo ɗaŋ raa wasǝŋ malarghǝn tǝ waaghǝ mitsǝ nǝ durwos cii ɓastǝ laɓkǝn. ²⁸ Beɗ tǝ gi Yesu suu yir te ɓastǝ a wul tu, ''Guɗ mǝn Urshelima, ngwaarǝn nǝ myani hŋ, ngwaarǝn nǝ gama wan tǝ mǝri wan. ²⁹ Yelǝnni, dzaŋ a manngǝnɗi gyo ɗaŋ ta wul tu, 'shiɗshiɗi nǝkǝ guɗi yo ɗaŋ taa yi ɓwaa hŋ, Ta yi vǝr maam hŋ. ³⁰ Ta ngaɓ wulghǝn tu gya wuur, ndaaɗi ɓasmi, tǝ gya danndi tu, 'dlǝpǝn mii wopi. ³¹ Caa fi ngǝrshi gya gin tǝ gwaas ɗaŋ ɗyaghas nǝ ɗyaki, Nighǝn wo fi ǝŋ ya kuŋǝi ye?'' ³² Mǝni won ci mbǝtlǝŋ ɗaŋ nǝ mǝrǝŋsǝ tǝǝ ta tlǝǝrshi washi ciimshi tǝ ɗuushi washi. ³³ Ɗaŋ tǝ maan a lǝǝɓ gi ɗaŋ caa cimtǝ tu, ''Moɗ gam'' ɗa ɗan tǝ ghǝmmbalti, tǝ kusǝŋ zarses namboŋ a zaari namboŋes a naɓti. ³⁴ Yesu wul tu, ''Daa dlaa shi loŋsǝ mǝni taa yisǝŋ ngǝtn yo ɗaŋ caa fi hŋ.'' She tǝ ta ɗuu bwaagha. tǝ ɓǝl lǝŋsǝ woshi. ³⁵ Zarsǝ yo ɗaŋ tǝǝ dlǝǝr ca yelghǝn mǝn guŋndǝ ci riitǝ kaar tǝ wulghǝni tu, ''caa vum gya goni.. tǝ vum gamashi ɓa ǝŋ yan cinǝ Ɓorghǝn kǝ Cogn ɗaŋ tǝ bwaatǝ.'l ³⁶ Mǝn manndǝ tǝ ta duundu tǝ ciyi man ɓastǝ tǝ vǝr tǝ zha ndzaŋni, ³⁷ Ciyi wul tu ǝŋ yan kinǝ guŋ Yahudawa, ''vum gaamai ɓa.'' ³⁸ Tǝǝ dlyaaɗ ngǝtn won a gaami wos tu, '' Gin nǝ guŋngǝ Yahudawa.'' ³⁹ Namboŋ a giɓkǝ mǝrǝŋshes ɗaŋ cinǝ ghǝmmbalghǝni a ta vertǝ wul tǝ tu.. ''Kyani kinǝ Ɓorghǝn kǝ Cogn hŋaan? vum gaamai tǝ myaani ɓa.'' ⁴⁰ Beɗ tǝ gi kamshi gi a ta dlwaa tǝ yer a wul tǝ tu, ''Kya ci vǝrtǝ Cogn hŋaan? paŋ tǝ ngyerki vii mǝn namboŋǝi. ⁴¹ Myaani ɗaŋ mi ɗuun mya kaɓni bamvi ngǝtn yo ɗaŋ mǝ fi. Beɗ tǝ gi murin a fi ngǝtn won ɗaŋ yi ɗa giri hŋ.'' ⁴² She wul ''Yesu tu ɓital tǝ myan ǝŋ kya man a guŋndu waa.'' ⁴³ Yesu wultǝ.'' Yesu wul tǝ tu, ''Jon jomi mya fuughǝ yawon mi cimngǝ a dǝnngǝ wusnetn. ⁴⁴ Ɗaŋ dwaam lin fi lǝǝɓ ta diɓi ɗa yatl ɓuruk ɗaŋ dwaam toknandam ta fi. ⁴⁵ Ɗaŋ yir dzaŋ a maan ndaghǝni lampiɗi a ta dlaatǝi hal yatl. ⁴⁶ Yesu gǝǝm riiŋ tǝ yer tlya tlyaa a wul tu.. ''Daa, a giɓkǝ taas wa ǝŋ mǝ gaa zhiptetn'' ɗaŋ a wul cik she a gǝǝ raai woshi. ⁴⁷ A kili gi ɗaŋ murghǝ manndes yel ngǝtn won ɗaŋ tǝ fi, she a luu Cogn, she wul tu, ''Ciɓ gin nǝ zaar zaari.'' ⁴⁸ A kili gi ɓuruk zarshes ɗaŋ tǝ man vii namboŋ tǝ yel ngǝrshi gya giin tǝ fin, tǝ sushi cigha voɗkǝn gǝǝɓ. ⁴⁹ Beɗ tǝ gi ɓuruk wasǝŋ ɗaŋ ta yisǝŋ ti tǝ guɗi ɗaŋ tǝǝ laaɓ tǝ ɗi Galilii, tǝǝ dlǝǝrni ɗi ɗonngai cii yel ngǝrshi gya gin. ⁵⁰ Yellǝn, murwon ɗaŋ sǝǝm wos tu Yusufu, cigha mǝn varaŋsǝ yalt. Cinǝ zaar mbuni tǝ zaar zaari. ⁵¹ Murin a kaɓ vii won ɗaŋ mǝn varaŋsǝ yatl tǝ dlǝǝrghai tǝ gyo ɗaŋ tǝ fi hŋ. Mures cinǝ mǝn Judiya a yatl kǝ Arimatiya,ɗaŋ caa gaa yir nǝ guŋndu Cogn. ⁵² Muri gines a tlǝ a guŋ Bilatus a ceɗ tǝ nǝ dlii Yesu. ⁵³ A shilariɗi, a karghaɗti tǝ lǝŋsǝ gaati vik giir gyo ɗaŋ tǝ ndǝr tǝ puus, gyo ɗaŋ taa yi gǝǝm gonngai hŋ. ⁵⁴ Gini nǝ dzaŋngǝ wolngi, dzaŋ wolnges a ta na mel. ⁵⁵ Guɗi yo ɗaŋ tǝǝ laaɓtǝɗi hal Galilii tǝ laaɓshi tǝ tlǝn yel vi giri tǝ datǝpm yo ɗaŋ tǝǝ gaa dliiwos ghai. ⁵⁶ Tǝ ta sushi kaar tǝ ndǝr miirghǝ dlǝǝrǝŋ dlǝǝrǝŋi. Kǝnnda tǝ ngaa laa dzaŋ wolnges ɗaŋ gi ɗaŋ nǝ konngǝni.