¹ Dzaŋ lades ,taaghǝ ɓitntli kǝ mbudkǝn wotsǝmai,gudes tǝ ta tlii ɗa vii giiri tǝ ngǝtn ghǝ dlǝrǝŋ dlǝrǝŋes ɗaŋ tǝ ndǝr. ² She tǝ ta tu taa ɓǝrǝŋ pushi ɗa ɓill vi giiri tǝ ga a laŋshi . ³ Tǝ ta ndai ɗa gibi, bed tǝ givtǝ yel ghǝmbli Daadǝn Yesu hŋ. ⁴ Ɗaŋ ghǝshi ci ɓashi vuughǝn raa mǝn, she gya gon ghǝnin zarsǝ mbǝlǝm a dlirghǝni ,mel tǝ yaŋshi, taa ca luk fyalaŋshiɗi pak-pak nǝ ŋaanyi hŋ. ⁵ Ɗaŋ vǝrtǝ ɗushi monda, gudes tǝ ta caa gami giir , mǝnes tǝ wulshi tu, "Nǝni a caa kya ŋaal murghǝ gwaam a gibkǝ mǝn mǝskǝne? ⁶ Ciɗa ɗuun hŋ, a shishi. Ɓitalǝnki aghǝn yo ɗaŋ ata fuuki ɗaŋ ci Galili. ⁷ A ta wultu ,taa vǝr ŋaa zaar a taas kǝ mǝn kuskǝ ngǝtn, ta ghǝmbalt, a dzaŋ kǝ mayes ta shisherti." ⁸ She gudes tǝ ta ɓital vi woshe shi, ⁹ ɗaŋ tǝ ta sushiɗi ɗa vi giiri, she tǝ fuu dzub tliti namboŋes tǝ zaarsǝ ɓuruk ghǝshi gya gin. ¹⁰ Gudes ɗaŋ tǝ fuu dǝllǝŋsǝ mǝn shighǝnes ghǝn yo ɗaŋ ci,nǝ gya Maryamu Magadaliya, tǝ Yawaina ,Maryemu naa Yakub , tǝ guɗi gyagon ɗaŋ ci cimshi. ¹¹ Bed tǝ gi dǝllǝŋsǝ mǝn shighǝnes tǝ mbi vi gudes ɗaŋ vik mbuni hŋ , nǝ durghǝ gi tǝ ta kab hŋ. ¹² Bed tǝ gi Bitrus ta shishi wup! a ta tli ɗa vi giires tǝ kitar . A ta tlǝn zubni a paŋ giɓes , a yel pǝres nǝ gaaghǝn a laŋshi te namboŋ . She asutǝ dǝn,ngǝtn yo ɗaŋ a ta fi a ta kwasartǝ. ¹³ A dzaŋi gi saɗ-ɗaɗa, mbǝlǝm a gibkǝ mǝn labkǝn Yesu civha tlǝghǝn a yatl won ɗaŋ ca cimtǝ tu Immawus, gyo ɗaŋ a ngaa fupi tǝ Urshelima. ¹⁴ Cigha wulghǝn te dlǝŋsǝ wasǝŋ a dulgam ghǝn yo ɗaŋ ci, ci gha vi wasǝŋ, tǝ paŋ ghǝtn ghǝn yo ɗaŋ a fi kab. ¹⁵ Ɗaŋ cigha vi wasǝŋ tǝ paŋ ghǝyn yo ɗaŋ ci ,Yesu gamas a man mel cigha riighǝn cimshi. ¹⁶ Bed tǝ gi ta dlǝmshi yiri ɗaŋ tǝ yisǝŋ tǝ hŋ. ¹⁷ She a wulshi tu ,"Nǝ vik ni ghǝnda kya wul tǝ dlǝŋsǝ waan kigha riinghǝne?" ¹⁸ She tǝ dlǝǝri saɗ,raa wasǝŋ nǝ malarghǝn. Namboŋ a gib wasǝŋ ɗaŋ sǝm wos tu ,Kiliyobas,a sutuɗa a wul tǝ tu, "Kyan ngǝtn wa ghuŋ kini sǝmbǝr ɗa Urshelima ɗaŋ kǝ yisǝŋ ngǝtn yo ɗaŋ tǝ fi ɗa ɗani a mbudkǝnin hǝŋaa? ¹⁹ She a wul shi tu ghǝshi gya gyo ? Tǝ wul tǝ tu," Ngǝtn yo ɗaŋ tǝ fi tǝ Yesu mǝn Nazarat. Cinǝ murghǝ shinghǝn Cogn, murghǝ fighǝn dǝllǝŋsǝ ngǝtn ghǝ kwasarghǝn , hal tǝ wul ghǝn vi a ken Cogn tǝ zarsǝ ɓuruk . ²⁰ Ɗaŋ cinǝ muryo ɗaŋ dǝllǝŋsǝ pǝris tǝ mǝn varaŋsǝ wopm tǝ vǝrti tu tǝ ɗuti .She tǝ ghǝmbalti. ²¹ Mǝ ya yel tu yan wo vum Israila. Daŋ ghǝnin mbuɗken mayi ghǝnin,ɗaŋ tǝ fi ghǝshi gin. ²² Gi hǝŋ ma,guɗi,gya gon a gibi wopm,tǝ kwasae'rmi tǝ tlǝ ɗa vii giiri ɗa ɓintlin, ²³ ɗaŋ tǝ tu dliwos hŋ, she tǝ sushiɗi tǝ wul tu , tǝ yel zhipti shinghǝn Cogn, ɗaŋ tǝ wulshi ɗa tu ci gwaam. ²⁴ Gya gon agib wopm ma tǝ tlǝ ɗa vi giiri, tǝ tlǝŋ tu ɗaŋ gi ɗaŋ gudes tǝ koni, bed tǝ gi yanes gamas tǝ yeltǝ hǝŋ." ²⁵ She Yesu wulshi tu,kya ɓitalki hŋ,kǝ byatl a kabkǝn ghǝn yo ɗaŋ mǝn shighǝn Cogn tǝ konhŋ. ²⁶ Yi cib tu murghǝ ɓorghǝn tǝ buŋ nǝ ghǝrshi gya gin,tǝ ndǝr tǝ ndai a gibkǝ luughǝn woshǝŋaa?" ²⁷ She a gidshi ɓuruk ghǝn yo ɗaŋ cinǝ dlyaadkǝn,ɗaŋ vik Cogn kon a dul gamashi, ɗaŋ a ngab a mborki Musa hal a ngǝtn yo ɗaŋ mǝn shighǝn Cogn tǝ dlyaad ɓuruk. ²⁸ Ɗaŋ a ta na shi mel tǝ ŋaa yatl won ɗaŋ ca man ghai, she Yesu fi ɗaŋ tu wo latsǝi. ²⁹ Bed tǝ gi tǝ vu tǝ raa mǝn, tǝ wul tǝ tu, ".Mbudi ɗuun suutu a fi dzaŋ a nda ngalai." She a ta labshi. ³⁰ Ɗan tǝ tsǝtni tǝ ci ngǝtn cighen, she ambi dugn a nyar Cign mǝn , a tsal vǝrshi. ³¹ Kyad yir wasǝŋ ta yaali, tǝ yisǝŋǝi tunǝ yani, bed tǝ gia mali. ³² Tǝ wul dlǝŋsǝwasǝŋ tu, "A pol mi a gib raa monda , ɗaŋ a wul vi tǝ myani a datǝpmi,ɗaŋ ca gid mi a vi Cogn hŋaa?" ³³ Tǝshishi kyad tǝ su shi Urshelima, tǝ tu dzub tliti namboŋi cigha lǝb namboŋi ,tǝ zarsǝ gya gon, ³⁴ cigha wulghǝn tu, " Daadǝn a shihi jom-jomi hal a mɓadi a Bitrus." ³⁵ Yaŋshi mbǝlǝŋǝi tǝ fuushi ghǝn yo ɗaŋ a tushi a datǝpm, ɗaŋ tǝ yisǝŋǝi tu nǝ yani ɗaŋ a tsal dughǝi. ³⁶ Ɗaŋ cigha wulghǝn vi a djlgam ghǝshi gin, she Yesu ghǝnin gamas dlǝrghǝn adlei wasǝŋ, awulshi tu,"Raa wusni tǝ naaki mǝn." ³⁷ Vǝrtǝ ngabshi , dli wasǝŋ yi wan dlar,ca vǝrshi tu nǝ liri ǝŋ caa yeli ³⁸ She Yesu wulshi tu," Ni ghun a ca kya ci vǝrtǝ cighǝ? kǝ ndǝr kǝ gadlar raa wani ya? ³⁹ Paŋǝni gya taasatn tǝ gya yaasǝŋan ayeli, nǝ myan gaman, tǝnnǝm a wumi ,nǝ durho tu liri ci tǝ tluu tǝ mod hǝŋ, ɗaŋ kya yel mǝn, mǝ yirshi." ⁴⁰ Ɗaŋ a wul cighǝi, a gid shi gya taas wos tǝ gya yaaseǝŋ wos. ⁴¹ Ɗaŋ tǝ dyaghas shi tǝ gadlarghǝn raa ,nǝ durghǝ polghǝni monda tǝ kwasarghǝn ,she a wulshi tu, "Ki tǝ ghǝn ghǝ cighǝn ɗuunya?" ⁴² Tǝ vǝrtǝ gyas nǝ vaghǝni, ⁴³ a kab cii, ci ɓastǝ yelghǝn. ⁴⁴ She awul shi tu,gya gin ghun mǝ wul vi a dul gama wasǝŋ ɗaŋ mǝ dyaghasǝm cimki ɓanndǝŋ, tu, shaŋtaŋ, tafi ghǝn ɓuruk ɗaŋ tǝ dlyad a dul gaman ɗaŋ Musa dlyaad, tǝ ngǝtn yo ɗaŋ nǝ dlaad kǝn a ngil, tǝ ghǝ mǝn shingǝn Cogn." ⁴⁵ She atlaashi raa mǝni, tǝ yisǝŋ ghǝn tlyaaghǝn vik Cogn. ⁴⁶ A ndǝr wulshi tu, cik kuŋ tǝ dlyaad tu," A nai tu murghǝ ɓorghǝn Cogn wo buŋ ,a dzaŋi kǝ mayi tǝ shishidi a mǝn mǝskǝn. ⁴⁷ A gib sǝm wos ta fuu zaarsǝ a ɗǝgn vi wusni kǝ kabkǝn ndadkǝn wasǝŋ tǝ dlaaghǝn loŋsǝ kusǝŋsǝ ngǝtn wasǝŋ, tangub ɗi Urshelima. ⁴⁸ Kinǝ tleghǝn zha ghǝrshi gya gin ɓuruk. ⁴⁹ Myani gaman, ma shindarki ngǝtn yo ɗaŋ Daaghǝn mbi araa wos.Bed tǝ gi na ɓubǝn gib yatl, she caa vǝrki vartǝ ɗi tsogn gami gami ⁵⁰ She a nyolar shi washi , te ga gib yatli , tǝtuli Betani. Ɗaɗani a nyom taas wos gami , a shinshi mbuni mǝn. ⁵¹ Ci ɓashi shinghǝn mbuni mǝn ghǝndi she a ɓǝǝl tǝ yaŋshi, tǝ mbitǝ tǝtlǝǝri gaami. ⁵² She tǝta mɓutǝ, tǝ sushi Urshelima ,tǝ polghǝn nyaŋ-nyaŋ . ⁵³ Ko dzaŋ gyoci gib dǝn Cogn cigha luughǝn wos.