¹ Ɗaŋnin ɗaŋ belakes kǝ dugn gyo ɗaŋ yiis kai hŋ ɗaŋ a ta na mel, gyo ɗaŋ caa cim tǝ tu belak ghǝ dlaarghǝn. ² Dǝllǝ Pǝrishes tǝ mǝn dlyaadkǝn tagarda Musa, tǝ ta tsǝtn ngai tu wuri ghǝn ta fi tǝ ɗuu Yesu tǝ mǝǝshi, nǝ duryo tu tǝ ta ya cin vǝrtǝ zarsǝ. ³ She Shetan ta ndai a Yahuza Iskaryoti,namboŋi a gib kǝ dzub tliti mbǝlǝm. ⁴ Yahuza ta tlii a dǝllǝ ghǝ pǝris tǝ gya mǝn varaŋsǝmǝn mandǝ tǝ ta tsǝtn ngai wurghǝn wo vǝr Yesue. ⁵ A ta polshi ,tǝ ta kabi, tǝ tavǝrtǝ wurɓa. ⁶ A ta kabshi ghai, a ta ngal mboi wan ɗaŋ wo vǝrshi Yesu ghai lǝb yo ɗaŋ zarsǝ ghai hŋ. ⁷ Dzaŋes kǝ dugn yo ɗaŋ kai hŋ a ta tuliɗi, gyo ɗaŋ yin cib gǝghǝbm,ŋaa tiim kǝ belak kǝ dlarghǝn. ⁸ Yesu ta shin gya Bulus tǝ Bitrus , a ta wul tu," Tlǝǝnǝn asǝn fi fibǝn mi nghǝtn ghǝ idi dlarghǝn mǝn,ɗaŋ ma ci." ⁹ Tǝ ta ced tǝ, " kyeɗo ghǝn kya suu mǝ fighai yo?" ¹⁰ A ta sushi ɗa , "Womǝn,ǝŋ kya ndai ɗa gib yatli, murwon citǝ shellaŋ ghǝ zha wo tkǝn fu ki. Laabǝn tǝ a dǝn yo ɗaŋ wo nda ghai. ¹¹ She a wullun murghǝ dǝnes tu,"Malǝǝmes a wul mi tu 'vin ngǝ sǝmbǝrsǝ yiɗo ,lǝb yo ɗaŋ ma ci nghǝtn cighǝn tǝ mǝǝri dǝnan ghai yo?"' ¹² Wo zhid ki ghai a dǝllǝk viin yo ɗaŋ lǝb tsǝtn ghǝn ghai turǝn ɗa ɗan." ¹³ She tǝta tli ,tǝ cig tǝ ta sǝn tu ɓuruk gya nghǝtn yo ɗaŋa fushi she yǝ ta tur nghǝn cighǝni kǝ idi ghǝ dlarghǝn ɗa ɗan. ¹⁴ Ɗaŋ kiles ta tuliɗi, a ta tsǝtnni tǝ gya mǝǝri dǝn ngǝ mǝnshigǝnes. ¹⁵ She a wul shi tu,"Myan nǝ suughǝ nan mbun -mbun tu mǝ ci nghǝn cighǝn ghǝ idi ghǝ dlarghǝncimki ǝŋ ɗa mǝ bugn. ¹⁶ Ǝŋ mya wulki tu,ma man cighǝn cighǝnɗahŋ. She yayughǝi a guŋdu ghǝ Cogvon." ¹⁷ She Yesu ta mbi kot tlyaghǝn zha ɗaŋ a tapok nyar Cogn mǝn she a wultu, " Kaɓɓǝn gin ambǝlǝn dlǝŋsǝwan mǝn. ¹⁸ Mya wul ki tu ,ma tlya zhak gur ghe dardu dǝn hŋ, she hal guŋdu ghǝ Cogvon ya man." ¹⁹ Ɗaŋ a mbi dugn,she a nyar ghai ,a tsaal tii,a wul tu, " Gin nǝ dlyen gyo ɗaŋ mǝ vǝrki - fin gin nǝ ɓitalghǝn nǝ myan." ²⁰ A mbi kot tlyaghǝn zhes ɗaŋ gyo ɗaŋ ai mbi kǝ dugn ,ca wultu, "Gin ghǝn nǝ kot tleghǝn zha kǝ mbighǝn ɗa rai kǝ muri a gib voraŋ ngan , gyo ɗaŋ a paas nǝ kyani. ²¹ Bed tǝ gi sǝǝn kǝǝm,gyo ɗaŋ wo vǝr vetn mi cim tǝ a dakci vinǝn. ²² Tǝ gi ŋaa ghǝ zaar,jom-jomi ca rin ɗaŋ gyo ɗaŋ taa caa raa. Bed tǝ gi buŋgǝn nǝ kǝ gyo ɗaŋ wo vǝr vetn.!" ²³ Tǝ ta ngub ced kǝn dlǝŋsǝ wasǝŋ ,nǝ nu ghǝn wo fu ghǝshi gino. ²⁴ She ɗaɗan wutluŋnghǝn ta ndai a dlei wasǝŋ a dulgam tu nughǝn wo nani mǝn vari agib wasǝŋngo. ²⁵ A wulshi tu," Guŋ mǝn tsadkǝn waar nǝ mǝnvar a dlei wasǝŋ ,tǝ gya gyo ɗaŋ tǝ yiir vartǝ a dulgam wadǝŋ caambi shi, ɗaŋ gya gyo ɗaŋ ca fini nghǝn mbuni zarsǝ wasǝŋ mǝn. ²⁶ Bed tǝ gi tǝnaa tǝ kyani ɗaŋ gin hŋ . A bamvi gi tǝ naa tu gyo ɗaŋ cin kǝ vari a gib wan tǝ nai ɗaŋ ŋaa jwatn, tǝ cig tǝ nai tu gyo ɗaŋ a mob mbunes tǝ nai ɗaŋ gyo ɗaŋ yan ca buŋǝi. ²⁷ Tǝ gi nughǝn cin kǝ vario, gyo ɗaŋ caa tsǝtn a dakca,ko gyo ɗaŋ buŋǝi ya? Mɓak nǝ gyi ɗaŋ a tsǝtn a dakci ya? Hal ɗaŋ nin migha dlei wan ɗaŋ gon ɗaŋ caa buŋni. ²⁸ Bed te gi kyani ghǝn kini gya gyo ɗaŋ ki tǝ myan a diibkǝna tǝn. ²⁹ Mǝ vǝrki guŋdu,ɗaŋ gyo ɗaŋ daagǝn vǝrǝm guŋdu, ³⁰ duryo tu a ci a tlya a dakci vin a gib kǝ guŋdan, ka ndǝr ka tsǝtn a daan ghǝ guŋdu kǝ ɗǝǝl vi a balgham Israila dzub tliti mbǝlǝmi. ³¹ Siman,Siman ɗakɗa,shetan a ced tu tǝtu mboi mboi ɓaskǝ, ɗaŋ tu tǝ tsǝnga ghǝ ɗaŋ alkama. ³² Bed tǝ gi ma kara Cogn nǝ kyan, tucaaghǝn raa wa wo nɗaad hŋ. Ɗa kari kya ǝŋ kyasughǝɗi ɗa,tlya mod gya yestǝ wa." ³³ Bitrus wul tǝ tu,"Daadǝn, ma mbǝrmi mǝ tli cim gǝ jarum tǝ meǝskǝn baɗ." ³⁴ Yesu suɗa tu, "Mya fu ghǝ Bitrus ,ǝŋ da geri tǝ gǝm vii yawon, she kya ci vighai tǝ maii tu ka yisǝŋ mǝhŋ." ³⁵ She Yesu wul shi tu,"Ɗaŋ mǝta shin ki a nywal ɓak taraŋ taas, numǝn ghǝn cighǝn ko tǝ gya kwate hŋ, kǝta naa ngǝshi gya gyo ?" Tǝ ta suɗa ," Ko ngershi gon." ³⁶ She a ta wulshi, " Bed tǝ gi ɗagnin, gyo ɗaŋ citǝ taraŋ taas ,gaan tǝ, tǝǝ mbi tǝ gya taraŋ,numǝn ghǝn cighǝn. Gyo ɗaŋ citǝ dellǝk sǝɓǝr hŋ tǝ ɗibar ghǝn dlǝmghǝn woshi tǝ ɗiib namboŋai. ³⁷ Ǝŋ mya wulki tu, ngǝtn won ɗaŋ nǝ dlaadkǝn a dulgaman yin cib tǝ yughǝi, 'Tǝ mbi tǝ a gib kǝ tsalghǝn mborki .' Duryo tu ngǝtn won ɗaŋ tǝ kon a gaman a yughǝi." ³⁸ She tǝ wultu,"Daadǝn ,yaal! yaghǝnin dǝllǝŋsǝ sǝḅǝr mbǝlǝm." A wul shi tu,A fii." ³⁹ Ɗaŋ tǝ ta ci ngǝtn cighǝn kaviɗi,Yesu ta nyoli tli ,ɗaŋ gyo ɗaŋ cayifi, a wur Zaitun,she mǝǝri dǝnwos tǝ ta laabtǝ. ⁴⁰ Ɗaŋ tǝ ta tuli, a ta wulshi tu, "karan Cogn tu a ndaɗ a gibkǝ diibkǝn hŋ." ⁴¹ A ta ɓǝdtǝ ghai ŋaa ken tǝ yaŋshi,she a ngubni tǝ gaŋvwaraŋ yatl a kara Cogn. ⁴² Caa wultu, " Daagǝn,ǝŋ kya kabi a mbi koɗǝn ni ɓasǝm. mɓak nǝ suughǝnen hŋ ,bed tǝ gi gwa ǝŋ tǝ yughǝi." ⁴³ She zhipti shighǝn Cogn dii gami a ta mbwa tǝ mǝnɗi, yi tlyaa tǝ mod. ⁴⁴ Cigha kuskǝ buŋngǝn ,a kara Cogn na jom -jomni ,hal lǝbvagǝn wos caa nɗwaak ɗaŋ tu nǝ guruŋshi voraŋ yo ɗaŋ ca bwa ndad yatl. ⁴⁵ Ɗaŋ ashishi a karaghǝn Cogn,a man amǝǝri dǝnes , a tushi a kuci nǝ durghǝ raa ghǝ ji wasǝŋ, ⁴⁶ She a ced shi,"Ni ghǝn a ca ki gha kuce? shinshin akara Cogn tu a nda adibkǝn hŋ." ⁴⁷ Ɗaŋ caa wulghǝn vii ,she gutuli zarsǝ tǝ mbwaɗ ,tǝ gya Yahuza,namboŋ a gibkǝ dzub tliti mbǝlǝm a ndashi ken . A ta man mel tǝ Yesu tu tǝ ngab tǝ rumtsuk, ⁴⁸ bed tǝ gi Yesu wul tǝ tu ."Yahuza kya vǝrni ŋaa zaar tǝ rumtsǝkǝniya?" ⁴⁹ Gya gon ɗaŋ taa ,ta ngirǝŋ Yesui tǝ ta yel ngǝtn yo ɗaŋ caa rii tǝ ta wul tu,"Daadǝn, mǝ dzak shi tǝ dǝllǝk sǝɓǝra?" ⁵⁰ She gon wasǝŋ ta dzak mon ghǝ dǝllǝk pǝris, a ta ngyer tǝ kǝǝm te zariwos mǝni. ⁵¹ Yesu ta wultu,"Gi a fi" She a tin kǝǝm mones,a ta byalti. ⁵² Yesu wul dǝllǝŋsǝ pǝris,tǝ mǝn ɓub a dǝn Cogn ,tǝ mǝn varaŋsǝgya gyo ɗaŋ caa gaa gǝǝb tǝ yan ,"Kǝnywalɗi ɗaŋ tu kya ngabni mǝǝr, tǝ gya dǝllǝk sǝbǝr tǝ gya shirŋaa? ⁵³ Ɗaŋ mǝ tayi kodzaŋ gyo mi cimki a gibkǝ dǝn ghǝ Cogn,kǝ ta taas ɓasǝm hŋ. Bed tǝgi gin nǝ dǝǝl wan, tǝ vartǝ lǝb jii." ⁵⁴ Tǝngab ti, tǝ kǝǝn ti, tǝ tlǝr tǝ dǝn gya dǝllǝk pǝris. Bitrus ma a labshi kar mbwatiɗi ɗoŋngai. ⁵⁵ Ɗa kari ɗaŋ tǝ ngab wud a dlek didlǝŋ ta tsǝtni a lǝb namboŋ,Bitrus ma a tsǝtni a dlei wasǝŋ. ⁵⁶ Gǝd won ɗaŋ cinǝ mon a yel tǝ a lǝb yaali ghǝ wud, ayel tǝ taŋ -taŋ she a wul tu,"Muri gin ma a ta yi cimtǝ ɗaŋ." ⁵⁷ Bed tǝ gi Bitrus ci vi ghai yi wultu,"Gǝdǝn ma yisǝŋ tǝ hŋ." ⁵⁸ Ɗaŋ a ngaalai jwatn gon won mari a yeltǝ, she a wultu,"Ki namboŋ a gib wasǝŋɗaŋ." Bitrus wultu , "Murin, mighai hŋ." ⁵⁹ Ɗaŋ a ngaalai nǝ ghǝ dwam namboŋ,muri gon a ɗaghǝi ghai a wultu,"Jom -jomimuri gin a ta yi cimtǝ ɗaŋ, cin mǝn Galili." ⁶⁰ Bed tǝ gi Bitrus wultu,"Murin, mayisǝŋ ghǝr won ɗaŋ kya kon hŋ." Kyaɗ ɗaŋ cigha wulghǝn vi, geri gǝm vi. ⁶¹ Daadǝn sughudtǝ yal yel Bitrus ,she Bitrus ta ɓital vik Daadǝn ,ɗaŋ a ta wul tǝ tu," Ǝŋda geri tǝ gǝm vi yawon ka ci vi adulgaman tǝ maai tu ka yisǝŋ mǝ hŋ." ⁶² Bitrus nyoli ɓǝdlǝm tlǝn ngwar nyaŋ-nyaŋ. ⁶³ She mǝn yo ɗaŋ caa fi ɓub kǝ Yesu,tǝ ta riyatǝ,tǝ ndǝr tǝ vod tǝ. ⁶⁴ Tǝ dlǝm tii yir mǝn tǝ ced tǝ tu,"Fi konghǝn jan! Nǝ nu ghǝn a vod ko?" ⁶⁵ Tǝ ɓotak kusǝŋsǝ vi a dulgam Yesu monda, tǝ yi kemastǝ. ⁶⁶ Kyad ɗaŋ a ta yi tǝ dzaŋ, mǝn varaŋsǝ wasǝŋ tǝ gya dǝllǝŋsǝ pǝris,tǝ gya mǝn dlyaadkǝn tagarda Musa. Tǝ ta jwami gam wasǝŋǝi ,tǝ ta tlǝr ti balgam. ⁶⁷ She, tǝ ta wultǝ tu , Ǝŋ yan kyan ǝŋ kini ɓorghǝni, fuumi." Bed tǝ gi a wul shi tu," Ǝŋ mya fuuki ,ka kab hŋ, ⁶⁸ tǝ cig ǝŋ mya ced ki, ka suɗa hŋ. ⁶⁹ Bed tǝ gi ɗaŋnin, a ngab ŋaa zaar wo tsǝtn a taaghǝ zari tǝ vartǝ ghǝ Cogn." ⁷⁰ Ɓuruk wasǝŋ tǝ ta wul tu, "Tu kini ŋaa ghǝ Cognŋaa?" Yesu wulshi tu, "Kǝ wultu nǝ myan." ⁷¹ Tǝ wultu, " Nighǝn a caa hal ɗaŋi mya ngal murghǝ tlyaghǝn zhe?" Myani tǝ kǝǝm wom maa wum a vi wos."