¹ Ɗaŋ dzaŋ gon won, ɗaŋ Yesu ta yigha giɗkǝni zarsǝ ghai guɓ dǝn Cognvon kǝnnda ci ɓashi fuughǝn vik wusni, she dǝllǝŋsǝ pǝris tǝ malǝmshi tǝ mǝn varaŋsǝ tǝ man ɓastǝ. ² Tǝǝbtaa wul vi, cigha wulghǝnni wos tu, '' Fuumi ɗi tǝ vartǝ gyo ghuŋ kya fi ngǝrshi gya giniyo? Nǝ nuu ghuŋ a vǝrghǝ vaetesso?'' ³ A sushi ɗa a wulshi tu, ''Myan beɗ na ceɗki ɗaŋ. fuumǝn ɗi a durghǝ, ⁴ baɓtisma Yohanna. A taa mbwaaɗi tsogn gaamiya? ko a zarsa? ⁵ Tǝǝ wuli a dlei wasǝŋ cigha wulghǝnni tu, ''ǝŋ myaa wul tu, 'yiɗi tsogn gaami, wo wul tu, 'kǝnnda ni ca kǝn kǝ caa raa ɓastǝ hŋe?' ⁶ Beɗ tǝ gi ǝŋ myaa wul tu, 'yiɗi gha zarsǝ, 'zarsǝn ɓuruk taa liiɗ mii tǝ puus, yan tu taa kaɓi ɗa raai tu Yohanna ta yinǝ murghǝ shinngǝni Cognvon.'' ⁷ Nǝ durghǝ gi tǝǝ ta suɗa tu tǝǝ yisǝŋ lǝǝɓ yo ɗaŋ ambwaaɗi ghai hŋ. ⁸ Yesu wulshi tu, ''cik ɗaŋ myan beɗ ma fuuki ko tǝ vartǝ nuu ghiŋ mya fii ngǝrshi gya gini hŋ.'' ⁹ A fuu zarsǝ vi gini, ''Gon won a gii kitn ngǝ darndu dǝn wos a vǝr mǝn yo ɗaŋ caa paŋ kiti naa ginǝn, she a tli a yatli gon gǝrǝi ɗi. ¹⁰ Kili yo ɗaŋ a tuli ɗi a shin mon wos gon a mǝn paŋngǝn kites, tu tǝ ngaa tǝ gurghǝ darndu dǝnes gonɗi. Beɗ tǝ gi, mǝn paŋngǝn kites tǝ vɗ tii, a sutǝ taas vati. ¹¹ A man shin moni gon ɗa, yan beɗ tǝǝ voɗtii, tǝ caatǝ ndzun, a sutǝ taas vati. ¹² A shinndar kǝ mayi saɗɗaɗa yan beɗ tǝ ngaa tǝ wus tǝ kurti ɓǝdlǝŋ. ¹³ Nǝ durghǝ gi Daadǝn murghǝ kitn darndu dǝnnes wul tu, 'Ni ǝŋ ma fiye? Ma shin ŋatn na suughǝnnetn. Gon hŋ taa sǝǝtǝ kǝǝm. ¹⁴ Beɗ tǝ gi ɗaŋ mǝn paŋngǝn kites tǝ yeltǝ, tǝǝ wul a dlei wasǝŋ, tu, gin ǝŋ nǝ murghǝ duuli. Mǝǝ ɗuunti, duryo tu duules tǝ naa mii mǝn.' ¹⁵ Tǝǝ nyolar tii ɗa kites, tǝ ɗuutii. Ni ghuŋ Daadǝn murghǝ kitn darndu dǝnnes wo fishiye? ¹⁶ Wo man tlaa mǝn paŋngǝn kiteshi, she vǝr kites gya gon mari.'' Ɗaŋ tǝ cik, tǝǝ wul tu, ''Cogn tǝ lyaa taa kai!'' ¹⁷ Beɗ tǝ gi, Yesu yal yelshi saɗ shebwul ty, ''Dei yinǝ tu nii a gi ɗaŋ nǝ dlyaaɗkǝnni ye? ¹⁸ Puus gii ɗaŋ mǝn nalghǝn dǝn tǝ nyaŋngashi, ta naai nǝ kiili puushes'? Konu ɗaŋ ya ndaɗ a puushes wo tsaali ɓorarak. Beɗ tǝ gi kǝn ya ndaɗ a konu wo nyiiti ɓilǝklǝk!'' ¹⁹ Nǝ durghǝ gi gya malǝmshi ghǝ ngǝtn ɗaŋ Musa dlyaaɗ, tǝ dǝllǝŋsǝ pǝris tǝ ŋal tǝ ngaɓ a kili ges, yan tu taa yisǝŋǝi tu vi gini yinǝ a dulgama wasǝŋ. Beɗ tǝ gi tǝǝ taa yaa ci vǝrtǝ zarsǝ. ²⁰ Tǝǝ gaa tǝ yir, she tǝ shinndar zarsǝ gy gyo ɗaŋ caa giɗ tu cinǝ zarsǝ mbuuni, tu tsǝn ta tǝǝ tu ngǝtn won ɗaŋ wo kon ɗa giiri hŋ, nǝ duryo tu tǝ vǝrti a taas ghǝ guŋndu tǝ vartǝ goɓna. ²¹ Tǝǝ ceɗ tǝ tu, ''Malǝm, maa yisǝŋǝi tu kya kon kǝ ndǝr kǝ giɗghai taŋ taŋ, gon caa ɗyaa sughǝɗ kǝ raa mǝn hŋ, beɗ tǝ gi kya giɗni jom jomni kǝ datǝpm Cognvon. ²² Yigha datǝpm ndaara mǝ vǝ zhakka Kaisara ko mǝ vǝr hŋaa?'' ²³ Beɗ tǝ gi, Yesu ngaɓ nyaŋngǝn wasǝŋ, a wulshi tu, ²⁴ ''Giɗǝm danari. Nǝ zhipti tǝ sǝǝmngǝ nuu yiɗa dulesso?'' Tǝǝ wul tu, nǝ Kaisar.'' ²⁵ A wulshi tu, '' yan cik vǝrǝ Kaisar ngǝtn ɗaŋ nǝ kǝ Kaisar, Cognvon ngǝtn yo ɗaŋ nǝ jǝ Vognvon.'' ²⁶ Tǝǝ tuu malghǝn a ngǝtn yo ɗaŋ akon a ken zarsǝ hŋ, beɗ tǝ gi, she yi kosarshi ni a ngǝtn yo ɗaŋ a kon, she tǝǝ ta mwali saɗ. ²⁷ Ɗaŋ mǝn Sadukiyawa gya gon tǝ man ɓastǝ, yashi ɗaŋ tǝ ta wul gwasǝŋ tu mǝn mǝǝskǝni taa shisii hŋǝi, ²⁸ Tǝǝ ceɗ tǝ tu, ''malǝm Musa dlyaaɗ mi mǝn tu, ǝŋ yeskǝ zaar ya mǝshi ɗaŋ ci tǝ giɗ, a gaa ŋaa hŋ beɗ, daashi tǝ kǝǝn gǝɗi yes wosheshi, tǝ tuu ŋaa yes wos mǝn ngai. ²⁹ Gya yestǝ won tǝ taa yiɗa watsǝmai, kǝ kenes taa kaɓ gǝɗi a man mǝǝshi, citǝ ŋaa hŋ, ³⁰ gyo ɗaŋ caa laaɓtǝ cik daŋ. ³¹ Kǝ mayes taa kǝǝn tǝ ɗaŋ, ko wattsǝmayes cik ɗa ɗaŋ a gaa ŋaa hŋ, a taa mǝǝshi. ³² Ɗa kaari gǝɗes beɗ a taa mǝshi. ³³ A shishighǝn mǝn mǝskǝnni, wo naa nǝ nǝ gǝɗi nuu? Yan ta ɓuruk wattsǝmayii ta kaɓtǝ nǝ gǝɗi wasǝŋ.'' ³⁴ Yesu wulshi tu, mǝri mǝn ɗǝghǝn caa kaaɓ guɗi tǝ kaaɓ tuur. ³⁵ Beɗ tǝ gi gya gyo ɗaŋ tǝ tuli ɗa giiri ɗaŋ taa shishi a mǝn mǝskǝnni taa kaaɓ guɗi ko tuur hŋ. ³⁶ Beɗ ɗaŋ tu taa man mǝǝs ɗa hŋ, nǝ dur yo tu taa naai daɓak ɗaŋ zhipti shinngǝnni Cogn cinǝ mǝri Cognvon nǝ mǝri Cognvon kǝ shishighǝni a mǝn mǝskǝnni. ³⁷ Beɗ tǝ gi taa shishir mǝn mǝskǝnni, Musa ta giɗ beɗ ɗaŋ ma a te durghǝ zaktǝghǝri, ɗaŋ a cim Dauda tu Cognvon kǝ Ibrahim, tǝ Cognvon kǝ Ishaku tǝ Cognvon kǝ Yakubu. ³⁸ Cinǝ Cognvon kǝ mǝn gwaam. Yan tu ɓuruk cigwaam ɓasyǝ.'' ³⁹ Gya gon a mslǝmshi kǝ ngǝtn ɗaŋ Musa dlyaaɗ tǝ suɗa tu, ''Malǝm kǝ suɗa, ɗa giri ndara.'' ⁴⁰ A man girshi tǝ ceɗ tǝ ngǝshi gya gon ɗa hŋ. ⁴¹ Yesu wulshi tu, ''A fi wur kǝnnda tǝ wul tu yan ɗaŋ taa ɓortii cinǝ kuni Daude? ⁴² Yan yu Dauda gamas a wul a tagarta ngil tu, Daadǝn wul Daadǝnatn tu, tsǝtni a taaghǝ zaretn, ⁴³ she mya sular mǝn nyaŋngaskǝni wa nǝ lǝǝɓ yasǝŋ wa.' ⁴⁴ Yan Dauda a cim gi ɗaŋ nǝ ɓorghǝnni tu, 'Daadǝn, a wurghǝn kǝnnda cinǝ kuni Daude?'' ⁴⁵ A kǝǝm zarsǝ ɓuruk a wul mǝri dǝn wos tu, ⁴⁶ Ɗaghǝnɗa nǝ malǝmshi kǝ ngǝtn yo ɗaŋ Musa dlyaaɗ, gya gyo ɗaŋ suughǝni raa wasǝŋ yin tu tǝ caa dǝllǝŋsǝ luu kǝnnda ciyi riighai, caa suu tǝ yiwurǝshi naa mari kasuwa kasuwa, tǝ lǝǝɓ tsǝtnngǝnni kǝ mǝn varaŋsǝ vin ladi Yahudawa, tǝ lǝǝɓ tsǝtngǝngǝ mǝn varaŋsǝ a lǝǝɓ belak. ⁴⁷ Caa basaŋ dǝnngǝ guɗi gya gi ɗaŋ tuur wasǝŋ mǝǝshi, tǝǝ zǝghǝr gaama wasǝŋ caa gǝrǝi a karaghǝn Cognvon zarsǝ ɗaŋ gya gin girghǝn wasǝŋ yi monnda.''